Во амандманот 33 зборовите „Република Македонија“ се заменуваат со зборовите „Република Северна Македонија“, а зборот „Македонија“ се заменува со зборовите „Северна Македонија“, освен во членот 36. од Уставот каде стои:

„Републиката им гарантира посебни социјални права на борците од Антифашистичката војна и од сите националноослободителни војни на Македонија, на воените инвалиди, на прогонуваните и затвораните за идеите на самобитноста на македонскиот народ и неговата државност, како и на членовите на нивните семејства кои немаат можности за материјална и социјална егзистенција. Посебните права се уредуваат со закон“.

Деновиве Претседателот на Грција, Прокопис Павлопулос, како што пренесоа медиумите во Грција се спротивставил на членот 36, кој ги содржи референците за македонскиот „народ и идентитет“ и потребата да се заштити македонскиот „народ“ што живее надвор од земјата.

Павлопулос инсистира на тоа нашата земја да даде писмена обврска дека договорот за името потпишан во јуни не ја признава македонската нација, туку државјанството. За новите амандмани реагираше и поранешниот министер за надворешни работи на Грција, Никос Коѕијас. Тој искажа несогласување со процесот на уставните промени во Македонија.

Според Коѕијас, Македонија „не го затвора прашањето со македонското малцинство во Грција“.