Ова е второ истражување на јавното мислење оваа недела што укажува на пресврт, и ако резултатите од анкетата бидат потврдени на есенските избори, за прв пат во германската политичка историја, „Зелените“ би имале канцеларско место.
Анкетата спроведена од институтот „Кандар“ за неделникот „Билд“ им дава 28 проценти од гласовите на Зелените, што е скок од шест процентни поени од претходната анкета по назначувањето на нивната претставничка Аналена Баербок за кандидат за канцелар.
Според анкетата, конзервативната партија на Ангела Меркел губи два процентни поени и добива 27 проценти од гласовите, по контроверзното назначување на нивниот лидер, претседателот на ЦДУ, Армин Лашет, кој не ужива голема популарност во јавноста и се смета за „човек на естаблишментот“ и самата Меркел.
А, Социјалдемократската партија (СПД) се чини дека го губи тлото со само 13 проценти од гласовите, како и екстремната десница (со 10 проценти) и екстремната левица (со 7 проценти).
Резултатите од втората анкета, објавена во вторникот по налог на РТЛ и НТВ, им даваат на Зелените првпат предност од 28 проценти од гласовите, што ги става пред десницата.
Зелените во понеделникот ја избраа својата потпретседателка, Аналена Баербок, за кандидат за канцелар на парламентарните избори во септември.Зелената партија долго време ужива голема јавна поддршка, од 20 до 23 проценти, според анкетите, рангирајќи се на второто место по популарност зад Христијанско-демократската унија.
Во случај на формирање левичарска влада со Зелените, Социјалдемократите и Левичарската партија, Баербок би била новата канцеларка.
Но, во исто време, партијата е отворена за коалиција со демохристијаните, што досега се покажало како успешна опција во неколку сојузни држави.