Како што информира претседателката на Здружението на медицински сестри, Гордана Бешлиовска, станува збор за висококвалитетни и стручно обучени медицински сестри и техничари, кои зад себе имаат и по 6 и 7 години работно искуство во статус договор на дело, а се до денес биле составен дел од здравствените установи, Општите болници во Прилеп, Битола, Кавадарци и Куманово. Според неа, едно од можните решенија за да се надмине проблемот, е правилната прераспределба.
Од министерство за здравство велат дека имаат дадено одобрене за да се продолжат договорите на медицинските сестри на кои им беа прекинати договорите, а на почетокот на април се планира да се отвори конкурс за вработување на медицински сестри, доктори и други здравствени соработници.
Барањата на здружението се итно да се вработат лицата кои имаат повеќегодишни стажови во здравствените установи, но и да се вклучат во сите инстанци и на сите нивоа на кои се носат било какви одлуки за медицинските сестри и медицинските техничари. Бешлиовска апелираше ова конечно системски да биде решено, да нема вработувања со договор на дело, туку редовни вработувања, со оглед на одливот на кадри кога е во прашање оваа професија. Според неа, некои од медицинските сестри работеле и по повеќе години без здравствено и пензиско осигурување, па биле приморани да бараат дополнителна работа надвор од секторот.