Претседателката на Либерално-демократската партија (ЛДП), Моника Зајкова, викендов престојува во Брисел на состанок на Бирото на АЛДЕ партијата (ALDE Party – Liberals and Democrats for Europe), во својство на претседателка на Алијансата на либерали од Југоисточна Европа (ЛИБСЕЕН) и дел од Бордот на АЛДЕ партијата.

На состанокот, Зајкова го информираше раководството на АЛДЕ за политичките случувања во земјите од соседството, за дејствувањето на либералните партии во регионот и побара поддршка за зајакнување на статусот на либералите во регионот, како и за демократските процеси и европската интеграција на земјите од Западен Балкан.

„Воедно ја искористив приликата да побарам поддршка за деблокада на евроинтегративниот пат на Македонија преку изнаоѓање на креативно решение, согласно стандардите и вредностите на ЕУ. Либерализмот во Југоисточна Европа има глас, има енергија и има визија. ЛИБСЕЕН е доказ дека прогресивните сили во регионот се подготвени да бидат дел од европските решенија, а не проблем. Либералите мора да делуваат обединето и со јасни политики против популизмот“, напиша Зајкова во објава на социјалните мрежи по завршувањето на состанокот на АЛДЕ групата.

Во рамки на посетата на Брисел, Зајкова реализираше средба и со германската европратеничка и актуелна претседателка на АЛДЕ, Свења Хан, од која двете испратија јасна заедничка порака со која се согласуваат дека е потребна брза интеграција во ЕУ на Македонија и земјите од Западен Балкан.

На средбата беше истакната силната поддршка од страна на АЛДЕ и Германија за евроинтегративниот и реформски пат на Македонија, како и за достигнување на европските вредности и стандарди кон кои се стремиме како држава.

„Горда сум што ЛДП останува глас на разумот, подготвени за креативни и одговорни решенија во однос на уставните измени, како клучен чекор за започнување на преговорите по поглавја и забрзана интеграција во Европската Унија. ЕУ не е само цел – ЕУ е вредност“, изјави Зајкова по завршувањето на средбата со претседателката на АЛДЕ, Хан.

Партијата АЛДЕ (Алијанса на либерали и демократи за Европа), е европска политичка партија составена од 76 партии на национално ниво од цела Европа, претежно активни во Европската Унија. Партијата АЛДЕ е поврзана со Либералната интернационала и е призната европска политичка партија. Основана е на 26 март 1976 година во Штутгарт, како конфедерација на национални политички партии под името „Федерација на либерални и демократски партии во Европа“ и преименувана во „Европски либерали и демократи“ (ЕЛД) во 1977 година и подоцна, во „Европски либерални демократи и реформисти“ (ЕЛДР) во 1986 година. На 30 април 2004 година, ЕЛДР е реформирана како официјална европска партија, „Европска либерална демократска и реформска партија“ (ЕЛДР ПАРТИЈА), а од 2012 го носи името АЛДЕ. ЛДП е полноправен член со право на глас во европската партија, а претседателката Моника Зајкова е членка на Бордот на АЛДЕ.

Со почит,

Либерално-демократска партија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.