Светската организација за заштита на природата WWF денес предупреди дека е итно да се заштитат ливадите со морски треви во Средоземното Море од штети предизвикани од закотвување на бродовите, бидејќи само во минатата година потенцијално 50.000 хектари Posidonia oceanica биле директно погодени од сидрата на пловилата.

Обемот на штетата предизвикана од сидрата на големите пловила на ливадите со морска трева во Медитеранот е откриен во новиот извештај на WWF објавен на Светскиот ден на океаните, 8 јуни.

Извештајот, насловен како „Заштита на ливадите со морска трева во Медитеранот од штети предизвикани од сидрата“, се базира на сателитски податоци од Системот за автоматска идентификација (AIS) за следење на бродови.

Клучен вид морски цветни растенија

Проценето е дека во Медитеранот во 2024 година потенцијално 50.000 хектари Posidonia oceanica - клучен вид морски цветни растенија - биле директно погодени од сидрата на пловилата, што претставува економска загуба од над четири милијарди евра од разни екосистемски услуги, изјави WWF.

Тие ги посочуваат сидрата како една од најкритичните, но и најлесно спречливи закани за Posidonia oceanica, бавнорастечки ендемски вид кој е важен за заштита на брегот од ерозија и забавување на губењето на биодиверзитетот.

Како клучно живеалиште, место за размножување и место за мрестење за голем број комерцијални видови риби, позидонијата е важна за рибарството, а поради својата способност да врзува големи количини јаглерод, таа е сојузник во борбата против климатските промени, додаваат од WWF.

„Сепак, приближно 34 проценти од ливадите со позидонија се изгубени во последните 50 години“, предупредуваат тие.

Потенцијално закотвување на повеќе од 179 илјади пловила

Извештајот на WWF открива дека во Медитеранот, повеќе од 179.000 пловила би можеле потенцијално да се закотват на ливадите со морска трева, од кои 45 проценти се пловила подолги од 24 метри.

Големите пловила што се закотвуваат на морската трева се одговорни за речиси 60 проценти од вкупните погодени области, со жаришта во регионите вклучувајќи ги Италија, Шпанија, Турција, Грција, Франција и Хрватска. Во некои зони, вели WWF, дури 50 проценти од ливадите се погодени од нерегулирано закотвување.

Областите со строги прописи за закоптвување, како што е јужниот дел на Франција, имаат значително пониски стапки на влијание врз ливадите со морска трева.

„Штетата од сидрата бавно се заздравува. На ливадите им требаат повеќе од 100 години за да се опорават. Заштитата и подобреното управување се најефикасните начини за зачувување на овие важни екосистеми“, рече Патрик Крстиниќ, раководител на морската програма на WWF за Јадранското Море.

Тој забележува дека зачувувањето и реставрацијата на ливадите со морска трева не е само мисија за животната средина, туку и стратешка, а владите треба да дејствуваат за да ги забранат штетните практики на закотвувањето.

Клучните препораки на WWF вклучуваат спроведување на забрана за закотвување на ливади со морска трева за пловила подолги од 15 метри, проширување на инфраструктурата за еколошко закотвување и заштитени зони и зајакнување на прекуграничната соработка во заштитата на морската трева.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.