Сите знаат дека Кинезите брзо учат, а сега може да се случи ученикот да го надмудри наставникот. Така барем говорат зголемениот број новитети кои покажуваат дека кинеската автомобилска индустрија веќе не заостанува ниту во однос на технологијата, а камоли кога е дизајнот во прашање.
Такви примери има сѐ повеќе. Еден од нив е неодамна претставениот Wulling Bingo, атрактивен компактен од сегментот Б. Симпатично дизајнираниот автомобил нуди димензии слични на Toyota Yaris, а ќе се нуди во две електрични верзии.
Основниот модел има електричен мотор од 41 КС (и 110 Nm) и батерија со капацитет од само 17,4 kWh, додека помоќната опција има 68 КС и речиси двојно поголема батерија (31,9 kWh).
Во двата случаи, брзината е ограничена на 100 km/h, што јасно укажува на урбаната улога. Според CLTC, досегот е 203 km со послабата верзија и 333 km со помоќната верзија. Но, најдобрите работи допрва доаѓаат. Овој автомобил има целосно дигитален кокпит, многу дарежлива опрема, вклучувајќи кожен тапацир во ретро издание со шиење, но и опции кои тешко дека ќе ги најдете на некои други автомобили.
На пример, багажникот може да биде опремен со специјални кутии за чување храна, како и кревет на надувување. Баш така, откако ќе се склопат сите седишта како на пример на првата генерација на Twingo, се поставува воздушниот душек и Bingo станува погоден за спиење.
Бингото, за кое CarNewsChina вели дека е наменет првенствено за помлади жени, ќе има премиера наскоро на саемот за автомобили во Шангај, а цените ќе се движат од 9.500 до 13.500 евра.