Во возвишениот амбиент на црквата „Света Софија“, тој празник го приреди младиот пијанистички виртуоз од Кина Сихенг Сонг кој ги демонстрира не само неговата техничка супериорност што ја поседува секој врвен пијанист од висок формат, туку и чувствата што извираа од неговата длабоко емотивна душа.

Поради неговите маркантни динамички градации, на моменти, пијаното постигнуваше волуменозност на мал оркестар.

Со неверојатна леснотија, прецизност и висока концентрација, концертната програма започна со Месечевата светлина од Дебиси, продолжи со Сонатата за пијано бр 16 во це-дур од Моцарт, а специјално за овој настап на „Охридско лето“ Сонг избра да ја свири Есенска месечина врз мирното езеро од кинескиот композитор Пејжун Чен, но и Избор од Клавирски поеми од Земјата чиј композитор е самиот тој.

Восхитувачката меморија на Сонг да го отсвири на памет целокупниот репертоар што траеше речиси час и половина, дополнително ја воодушеви публиката која не ги штедеше аплаузите кои до крајот на концертот беа сè погласни и погласни.

-Беше навистина неверојатно. Сметам дека програмата беше мал предизвик бидејќи некои дела беа мои и публиката првпат ги слушна. Имаше и едно многу долго дело, 24 Прелудиуми од Шопен, но публиката, иако беше премногу топло, остана до крај на своите места. Нејзината реакција е многу важна за уметникот. Тоа се нарекува хемиска размена помеѓу луѓето. Затоа музиката е многу важна зашто ги зближува луѓето, рече виртуозниот шангајски пијанист Сихенг Сонг.

Сонг се смета зa еден од најдобрите пијанисти на неговата генерација. Студирал во Франција на Високата школа за музика во Париз во класата на Маријан Рубицки, а откако се стекнал со диплома за концертен пијанист, продолжил да студира на Парискиот конзерваториум со Оливие Гардон и приватно се усовршувал со Доминик Мерле.Од 2010 година тој започнува со нов тип на концерти комбинирајќи го стандардниот рецитален формат со мултимедија. Досега има создадено пет такви проекти во кои прави спој на музиката и театарот, уметноста и литературата што придонесува кон доближување на класичната музика кон публиката на 21 век.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Посебно внимание се обрнува на фактот дека легендарната НБА-франшиза двапати го смени сопственикот за помалку од 18 месеци.

Новиот сопственик е Џош Кушнер, основач на инвестициската компанија „Thrive Capital“ и брат на Џаред Кушнер, зет на американскиот претседател Доналд Трамп.

Со тоа, Кушнер ќе ја преземе една од најпознатите спортски франшизи во светот.

Продавач е Марк Волтер, кој ги купи „Лејкерс“ пред само 14 месеци, кога вредноста на франшизата се проценуваше на околу 10 милијарди долари.

Во тој краток период, вредноста порасна за дури 2,5 милијарди. Во меѓувреме, Волтер работеше на промена на структурата на клубот и инвестираше во спортскиот и деловниот сектор, поради што неговата одлука толку брзо да ја продаде франшизата привлече дополнително внимание.

Дополнителен контекст даваат наводите за федерална истрага против осигурителните компании под контрола на Волтер.

Според претходните извештаи, федералните истражители му ги одзеле телефонот и лаптопот, а се спомнуваат и истраги од страна на американските обвинители и Комисијата за хартии од вредност (SEC).

Сепак, важно е да се нагласи дека против Волтер не е покренато обвинение и не постои потврда дека истрагата е причината поради која тој ги продал „Лејкерси“.

Според достапните информации, самата франшиза не е предмет на истрагата. Контроверзиите не завршуваат со продавачот.

Компанијата „Thrive Capital“ на Кушнер неодамна беше меѓу инвеститорите поврзани со план вреден околу 20 милијарди долари, кој вклучуваше комерцијални права за Светското првенство во фудбал на ФИФА. Тој проект предизвика големи контроверзии и на крајот не се реализираше во предложената форма.

Истовремено, поврзаноста на семејството со администрацијата на Трамп дополнително го привлече вниманието на јавноста.

Џош Кушнер е брат на Џаред Кушнер, кој е во брак со Иванка Трамп. Тоа само по себе не значи дека претседателот Трамп има сопственички удел или улога во купувањето на „Лејкерс“.

Сепак, комбинацијата од рекордната цена, многу брзата промена на сопственоста, истрагата поврзана со Волтер и политичките и финансиските врски на новиот сопственик, ја направија оваа трансакција една од најинтересните приказни во светот на спортот. „Лејкерс“ претходно беа во сопственост на семејството Бас цели 46 години. Волтер ги поседуваше само 14 месеци. Сега франшизата влегува во нова ера – и тоа по најголемата продажба во историјата на американскиот спорт.

Извор: Б92.нет

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Податоците се дел од годишниот извештај за цивилни жртви, доставен до Конгресот во средата, а беа објавени во време на зголемена загриженост поради цивилните жртви во воените операции на администрацијата на Трамп.

Оваа загриженост кај законодавците се зголеми и откако американска ракета погоди иранско основно училиште на почетокот на годината, при што загинаа до 168 луѓе.

Покрај тоа, агенцијата АП објави дека министерот за одбрана Пит Хегсет наводно драстично го намалил бројот на вработени во канцеларијата задолжена за намалување на штетите врз цивилите, пишува „Еуроњуз“. Фокусот е ставен на нападите од април 2025 година.

Ревизијата на Пентагон се фокусираше на три воздушни напади изведени во април 2025 година, за време на американската кампања против Хутите. Милитантите тогаш напаѓаа трговски бродови во Црвеното Море – клучен воден пат за светската трговија што води кон Суецкиот Канал, Средоземното Море и Израел.

Во извештајот се наведува дека цел на нападите биле непријателски сили во Сана – главниот град под контрола на бунтовниците – и во близина на пристаништето Рас Иса.

Во овие напади загинале вкупно 153 цивили, а 243 биле ранети. Нападот врз пристаништето бил најсмртоносен, при што загинале 80 лица, а 171 биле повредени.

Експлозиите предизвикале огромни огнени топки, а цистерните биле претворени во јагленисани остатоци. Хутите емитувале снимки од местото на настанот на својот сателитски канал „Ал-Масира“, на кои се гледале тела расфрлани низ пристанишниот простор. Централната команда на САД (CENTCOM), која раководи со воените операции на Блискиот Исток, тогаш изјави дека „нападот немал за цел да му наштети на народот на Јемен“.

Во соопштението издадено од Централната команда во април 2025 година се наведува: „Американските сили дејствуваа за да го елиминираат овој извор на гориво за терористите Хути поддржани од Иран и да им ги скратат незаконските приходи што повеќе од една деценија ги користат за финансирање терор низ регионот“. Командата заклучи дека е „поверојатно отколку не“ оти трите напади предизвикале штета врз цивилното население. Оваа проценка се заснова на американски разузнавачки податоци, снимки и јавно достапни извештаи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.