Регион

Вучиќ побара од Американците подолг рок за воведување санкции за НИС: Ние не сме им целта

Српските медиуми јавија дека Вучиќ изразил уверување дека неговото барање ќе биде разбрано од САД. Тој, наводно, побарал „мало поместување на роковите...10, 15, 20 дена“.

Српскиот претседател Александар Вучиќ, денеска,по средбата со американскиот заменик државен секретар за управување и ресурси, Ричард Верма, во Белград, изјави дека побарал подолг рок за примена на американските санкции за нафтената индустрија на Србија (НИС), што беа воведени затоа што компанијата е во мнозинска сопственост на Русија.

Српските медиуми јавија дека Вучиќ изразил уверување дека неговото барање ќе биде разбрано од САД. Тој, наводно, побарал „мало поместување на роковите...10, 15, 20 дена“.

Српската влада во 2008 година го продаде НИС на руски „Газпромњефт“, а во моментов според официјалните податоци, „Газпромнефт„ и Газпром“ имаат 56,15 отсто сопственост, додека 29,87 отсто е во сопственост на српската држава, додека остатокот е во рацете на граѓаните, вработени и поранешни вработени.

-Ние не бевме цел, иако тоа ќе биде мала утеха, изјави Вучиќ на заедничката прес-конференција со Верма во Белград.

Американското Министерство за финансии вчера го додаде НИС на листата на санкционирани лица и субјекти и рокот за промена на сопственичката структура е 45 дена.

По средбата Верма рече дека целта на санкциите е да се отстрани Русија од сопственичката структура на НИС, додека промената на сопственичката структура на НИС ќе доведе до повеќе мир во регионот и диверзификација на српските енергетски извори.

Тој тврди дека Србија нема да трпи економски последици доколку ја отстрани Русија од сопственичката структура на Нафтената индустрија на Србија (НИС).

Верма го повтори ставот на Вашингтон дека санкциите се насочени против Русија, а не против Србија, наведувајќи дека НИС е само една од 2.000 компании во руска сопственост што САД ги ставија на „црната листа“, пренесе Бета.

Американскиот функционер рече дека НИС е најпрофитабилната компанија во Србија, но дека нејзиниот профит ја напушта земјата и дека Русија го користи за „финансирање брутална агресија против Украина“.

Тој рече дека со Вучиќ разговарал за воспоставување стратешки дијалог меѓу двете земји, кој ќе ги подигне нивните односи на повисоко ниво.

Вучиќ рече дека Србија во наредниот период ќе се потпира на енергетските резерви и дека нема да има недостиг на гас или нафта./МИА

Македонија

Водата во Скопје безбедна за пиење

Водата за пиење во Скопје е безбедна покажуваат резултатите од направените физичко-хемиски и микробиолошки испитувања од 43 мерни места во градот.

- Секторот за санитарна контрола во периодот од 13 до 17 јануари 2025 зема 191 примероци за физичко-хемиска и 191 примероци за микробиолошка анализа на вода за пиење од 43 мерни места во Градот Скопје. Согласно добиените резултати од испитувањата, сите примероци одговараат на Правилникот за барања за безбедност и квалитет на водата за пиење, информираат денеска од ЈП Водовод и канализација.

Македонија

Скопје со умерено аерозагадување, Сараево најзагаден град во светот

Скопје утрово се најде на 26. место на листата на најзагадени градови во светот. 

Според платформата за мерење на квалитетот на воздухот „Ај-кју ер“ („IQAir“), со индекс во однос на штетните честички од 137, главниот град се наоѓа во портокаловата зона со категоризирање на воздухот како штетен за лицата со чувствително здравје и хронични заболувања.

На првото место е Сараево со многу нездрав воздух и индекс од 296 во однос на присуството на штетни честички.

Меѓу првите 10 од Европа на второто место е Краков во Полска, со индекс од 198 единици, а трет е Ханој (196 ) во Виетнам.

Според податоците на табелата на „IQAir“, во 10 часот утрово од регионов, Приштина е на 19. место, Софија на 22, Букурешт на 23, Љубљана 37, Загреб 46 место, Белград на 51 и Атина на 87 место.

Специјализираната страница за мерење на квалитетот на воздухот „IQAir“ ги прикажува вредностите на аерозагаденост во реално време.

Македонија

До крајот на денот облачно со сончеви периоди, од утре дожд и снег

 Времето до крајот на денот ќе биде променливо облачно со сончеви периоди. По одделни котлини во поголем дел од денот со магла и ниска облачност. Ќе дува слаб ветер од променлив правец.

Максималната температура во котлините со магла ќе биде во интервал од -3 до 2, а во останатиот дел од земјата од 6 до 10 степени, информираат од УХМР.

Во Скопје, во поголем дел од денот ќе има магла и ниска облачност. Попладне ќе има делумно намалување на облачноста. Температурата ќе биде до 2 степени.

Синоптичарите за утре најавуваат повремени врнежи од дожд и снег во пониските и снег на повисоките места и на планините.

- Врнежите ќе бидат со слаб, а во западните делови со умерен интензитет. Потоа во следните денови ќе се задржи променливо облачно време со сончеви периоди. По котлините во претпладневните часови ќе има појава на магла. Во петок претежно во северните делови ќе има локални врнежи од дожд, а на планините од снег, известуваат од УХМР.

притисни ентер