Балкан

Вучиќ од Брисел: Тешко се разговара со оние, кои одамна решиле да го признаат Косово (ВИДЕО)

Српскиот претседател Александар Вучиќ денеска во Брисел се сретна со европските претставници.

Вучиќ и премиерот на Косово, Албин Курти денеска разговараа, но не меѓу себе, туку на одвоени средби со европските претставници.

Покрај претставниците на ЕУ, Вучиќ и Курти разговарале и со таканаречената голема тројка - лидерите на Франција, Германија и Италија. Денеска нешто по 15 часот заврши првата средба на претседателот Вучиќ со европските претставници во Брисел.

„На состаноците зборувавме за сите клучни теми, а Србија јасно кажа дека сака да ги спроведе сите договори што се потпишани. Секогаш сме нагласувале само едно, тоа што го повторуваме 10 години, а тоа е дека Србија не може да го прифати членството на Косово во ОН, ниту независноста на Косово“, рече Вучиќ.

Како што рече, „хартијата што ја добивме на 21 октомври е добра основа за продолжување на преговорите“.

„Изразивме резерви за членството на Косово и Метохија во ОН. Подготвени сме за формирање на ЗСО, согласно предлозите што ги добивме, но ми се чини дека денес на сите им е јасно, без разлика на сите трикови, дека не станува збор за потпишување, туку за спроведување на потпишаното и договореното во меѓувреме“, рече Вучиќ и додаде дека е неопходно да се постигне напредок, а на сите во Европа ќе им биде јасно кој го кочи напредокот.

Одговарајќи на новинарски прашања, тој вели дека трудот што го добивме на 21 октомври се однесува на формирањето на ЗСО.

„Не можам да зборувам за детали, никаде не протече ниту еден детал. Тоа беше договорот“.

Како што истакна, „блиску сме до договор за енергетиката“.

„Електросевер утре има средба во Скопје. Работиме на ова прашање, и се трудиме да се однесуваме одговорно. За нас е важно, врз основа на принципите потпишани во 2015 година, Србија да може да финансира различни активности, како на пр. образование и здравство, а знаете колкаво е мешањето на овие прашања од Приштина“, рече Вучиќ.

Тој уште еднаш повтори дека е тешко да се разговара со оние кои одамна ја донесоа одлуката да ја признаат независноста на Косово, објави Телеграф.

„Секогаш кога се повикувате на Повелбата на ОН, на резолуциите на ОН, како што гледате во случајот со Израел и Палестина, сите се повикуваат на ОН. Но, кога станува збор за Србија, тие сакаат да ги избегнат ОН и Повелбата на ОН. Тоа е зошто позицијата на Србија е тешка и мислам дека нема да биде полесно во иднина. Ќе се бориме за опстанок, ќе ја задржиме резолуцијата 1244 и ќе го почитуваме меѓународното право“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Штерјова: Пет години лаги за модуларната - ВМРО и Мицкоски водат монструозна кампања против Филипче

Пет години ВМРО и Мицкоски водат монструозна кампања против Венко Филипче со злоупотреба на трагедијата во модуларната болница во Тетово и болката на семејствата на загинатите.

Пет години шират лаги, конструкции, клеветат, само за пресметка со претседателот на СДСМ, проф. д-р Венко Филипче.

Пет години ниту Филипче ниту СДСМ не се мешаше во работата на Јавното обвинителство.

Не вршеше притисок. Не ја коментираше постапката. Не бараше заштита.

Затоа што институциите мора да работат независно и без притисок.

Модуларните болници беа набавени преку меѓународна постапка на Светската банка, со механизми на контрола, во време на најголемата здравствена криза во поновата историја.

Тие болници не се градеа за тендерски профит, туку за да се спасуваат животи.

Се градеа во време кога болниците беа преполни, кога немаше доволно кревети, кога здравствените работници водеа битка за секој пациент.

Ако постоела и најмала основа за кривична одговорност на Филипче, зарем некој верува дека Мицкоски и ВМРО немаше да најдат начин да ја искористат?

По две години власт, со целата моќ што ја имаат, ќе оставеа нешто неискористено против својот најголем политички противник.

ВМРО-ОКГ водеше јавен линч и политички суд цели 5 години.

Без докази. Без пресуда. Без никакви граници.

Човек кој е доктор, хирург и универзитетски професор, го нарекуваа убиец.

Човек кој целиот професионален живот лекува пациенти, спасува животи и образува идни лекари, го нарекуваа „д-р Менгеле“.

Тоа е дел од кампањата на ВМРО и Мицкоски за ширење омраза и поделби.

Истата кампања која потоа организирано се рашири низ медиумската машинерија на ВМРО и

Орбановите 40% од медиумите.

Пет години ја користат трагедијата како политичко оружје, си поигруваат со болката, чувствата и жалта на семејствата на загинатите.

ВМРО и Мицкоски треба да им се извинат на граѓаните за пет години манипулации и ширење невистини.

Но, пред сè, да им се извини на семејствата на загинатите.

Затоа што пет години нивната најголема болка ја претвораат во политичка кампања и бесрамно си поигруваа со нивната болка.

Тоа е бездушно. Неморално. Тоа е ВМРО!

Прес конференција на СДСМ, Кети Штерјова

Тагови: Кети Штерјова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Лишен од слобода странски државјанин на ГП „Табановце“ - возел 164 км/ч на место каде дозволената брзина е 80 км/ч

На 22.08.2026 во 17:53 часот на Граничен премин Табановце, на излез од државата, полициски службеници извршиле проверка на патничко возило „форд“ со полски национални ознаки, управувано од М.Ј.(46) од Полска.

При извршената проверка, преку системот „Безбеден град“ било констатирано дека М.Ј. бил евидентиран како сторител на кривично дело по член 297-А од Кривичниот законик - „безобѕирно управување со моторно возило“, односно управувал со возилото со брзина од 164 километри на час на место каде максималната дозволена брзина изнесува 80 километри на час. М.Ј. е лишен од слобода и против него ќе биде поднесена соодветна кривична пријава.

Тагови: безбеден град

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ЦУК: Ангажирани се сите ресурси за ставање под контрола на пожарот во Палиград

На терен е ангажиран голем број екипи и сили за гаснење на пожарот во реонот на Палиград и Китка.

Во интервенцијата се вклучени 3 авиони и два пинцгауери на ДЗС, 1 хеликоптер на МВР, екипите на Противпожарната бригада на Град Скопје, како и екипите на Национални шуми.

Директорот на ЦУК, Мухамед Али акцијата ја координира директно од терен. Сите екипи дејствуваат со засилен интензитет за локализирање и гаснење на пожарот, како и за спречување на неговото понатамошно ширење.

Во моментов нема опасност за селото Палиград, ниту за другите села во подрачјето на Каршијак.

Состојбата континуирано се следи, а сите екипи остануваат во целосна готовност за навремена реакција, со цел заштита на жителите и спречување на каква било потенцијална опасност.

Тагови: ЦУК

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.