Култура

Врвни странски слависти на 48. Меѓународна научна конференција на МСМЈЛК при УКИМ

Најавено е учество на истражувачи од САД, Русија, Јапонија, Франција, Полска, Словенија, Хрватска и Србија, како и од нашата земја.

Седумдесетина македонисти, слависти и балканисти од земјата и од странство ќе учествуваат на 48. Меѓународна научна конференција на Меѓународниот семинар за македонски јазик, литература и култура при Универзитетот „Св. Кирил и Методиј" во Скопје (МСМЈЛК при УКИМ), којашто денес и утре ќе се одржи во Конгресниот центар на УКИМ во Охрид и виртуелно – на далечина. Најавено е учество на истражувачи од САД, Русија, Јапонија, Франција, Полска, Словенија, Хрватска и Србија, како и од нашата земја. Најголемиот дел од нив ќе ги изложат своите истражувања на носечката тема на Конференцијата – „100 години од раѓањето на Блаже Конески – стожер на македонскиот јазик, литература и култура". Оттука, годинешното издание на традиционалната конференција на МСМЈЛК при УКИМ е и еден од најголемите научни собири посветени на великанот Конески во рамките на досегашното одбележување на стогодишнината од неговото раѓање.

Свеченото отворање на Конференцијата ќе се одржи денес, со почеток во 10 часот. Поздравни говори ќе одржат проф. д-р Весна Мојсова-Чепишевска, директорка на МСМЈЛК при УКИМ и проф. д-р Станислава-Сташа Тофоска, којашто е и координаторка на лингвистичката секција на Конференцијата. Во рамките на свеченото отворање ќе биде промовиран и зборникот од минатогодишното издание на конференцијата, при што промотивна реч ќе одржи директорката на Институтот за македонска литература, проф. д-р Наташа Аврамовска. По отворањето, паралелно ќе се одвива работата на лингвистичката секција и на секцијата за литература и култура, и тоа во текот на првиот работен ден со физичко присуство во Конгресниот центар на УКИМ, а во текот на вториот работен ден, виртуелно.

Особено радува што меѓу учесниците на Конференцијата коишто ќе претстават свои истражувања за делото на Конески се и врвни странски слависти. Меѓу другите, за првпат на конференција организирана од МСМЈЛК при УКИМ ќе учествува и истакнатиот јапонски славист, проф. д-р Мотоки Номачи, којшто пред неколку години ја најде првата современа Граматика на македонскиот јазик – нарачана од президиумот на АСНОМ, а напишана во 1947 година од рускиот професор, Самуил Борисович Бернштејн, но необјавена заради влошените советско-југословенски односи, по што седумдесет години се сметаше за исчезната. На конференцијата, тој ќе говори за интеракцијата меѓу Конески и Берштајн, преку исчитување и анализа токму на новопронајдени, архивски материјали. Учесничка на Конференцијата ќе биде и проф. д-р Ирена Савицка, којашто е едно од најголемите имиња на полската лингвистика и е соавтор на „Фонологија на македонскиот стандарден јазик". Како соавтор на реферат, на Конференцијата ќе учествува и проф. д-р Грејс Филдер, којашто е еден од најистакнатите балканисти од САД – познавач особено на историјата и културата, како и проф. д-р Елена Вержникова од Московскиот државен универзитет „Ломоносов". Тие се само дел од значајните научни имиња коишто се дел од лингвистичката секција на Конференцијата.

Во секцијата за литература и култура пак, меѓу другите, од Московскиот државен универзитет „Ломоносов" ќе учествува академик Ала Шешкен, којашто претходно учествуваше и на 54. Летна школа на МСМЈЛК при УКИМ, а беше промовирана и нејзината најнова книга за македонската книжевност. Исто така ќе учествува и академик Златко Крамариќ од Филозофскиот факултет на Универзитетот „Јосип Јурај Штросмаер" во Осиек, којшто е еден од најпосветените истражувачи на македонската култура во Хрватска. Меѓу поистакнатите учесници од странство, во оваа секција ќе учествува и проф. д-р Намита Субиото од Филозофскиот факултет во Љубљана, којашто веќе повеќе години покрај тоа што е исклучителен истражувач на македонската книжевност, како универзитетски професор и преведувач е еден од најголемите афирматори на македонската култура во Словенија. Координатор на секцијата за литература и култура е проф. д-р Трајче Стамески.

Од Конференцијата ќе биде објавен и зборник, којшто се очекува да биде една од најзначајните научни публикации за делото на Конески, коишто ќе произлезат од активностите оваа година, по повод стогодишнината од неговото раѓање.

48. Меѓународна научна конференција е дел од годишната програма на МСМЈЛК при УКИМ, а се остварува како дел од Програмата на манифестацијата „2021 – Година во чест на Блаже Конески".

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Јанчев: Детското игралиште во Михајлово омилено место за најмладите

[🤸] Детската смеа е најубавиот доказ дека ова беше вистинска инвестиција.

Детското игралиште во Михајлово веќе подолго време е омилено место за најмладите. Секојдневно е исполнето со дечиња, млади луѓе и семејства кои уживаат во играта, дружењето и времето поминато на отворено. Современите детски реквизити овозможуваат безбедна забава, но и придонесуваат за развојот на моторичките способности и физичката активност кај децата.

Со вакви проекти создаваме простори кои живеат секој ден – места каде што се создаваат насмевки, пријателства и убави детски спомени.

[💚] Продолжуваме да инвестираме во содржини што го подобруваат квалитетот на животот на сите генерации, напиша на својот фејсбук првиот човек на Кавадарци, Митко Јанчев.

Тагови: Митко Јанчев

Европа

Видео: Драма во Трст: Автомобил падна во морето, кадети од Воената академија го спасиле возачот

Вистинската драма се одвивала во Трст, кога автомобилот заедно со возачот завршил во Јадранското Море.

Благодарение на брзата и одлучна реакција на припадниците на Воената академија од Модена, возачот бил спасен само неколку секунди пред возилото да потоне.

Италијанското Министерство за одбрана објави дека членовите на Воената академија, кои во тој момент биле во посета на градот, без двоумење дошле на помош. Војниците скокнале во морето, допливале до возачот и го извлекле на брегот, каде што потоа го предале на екипите на брзата помош.

Во официјалното соопштение беше истакнато дека оваа брза реакција е израз на вредностите што Воената академија им ги пренесува на идните офицери на италијанската армија и карабињерскиот корпус, имено храброст, чувство за должност, несебичност и дух на служба.

Questa mattina a Trieste, durante una visita in città, alcuni militari in servizio presso l'#AccademiaMilitare di Modena sono intervenuti senza esitazione dopo aver assistito a un drammatico incidente: un'auto è precipitata in mare in Piazza Unità d'Italia con il conducente a… pic.twitter.com/3hjm6Arm9n
— Ministero Difesa (@MinisteroDifesa) July 12, 2026

Италијанскиот министер за одбрана Гвидо Кросето, исто така, ја пофали храброста и обуката на војниците. „Тие дејствуваа инстинктивно, ставајќи ги сопствените животи во служба на спасување на друг човек. Тоа е највистинското значење на воениот повик - да ѝ служите на вашата земја и да го заштитите човечкиот живот, секогаш, дури и кога тоа не е официјална обврска. Ви благодарам“, рече Крозето.

Македонија

Филипче: Изнуденото извинување не го брише срамот на Мицкоски, тоа ли е премиер, професор, пример за младите?

Изнуденото извинување не го брише срамот на Мицкоски, вистинското извинување подразбира признавање на грешката, менување на начинот на однесување, порача претседателот на СДСМ, д-р Венко Филипче

Изнуденото извинување не го брише срамот на Мицкоски, вистинското извинување подразбира признавање на грешката, менување на начинот на однесување, порача претседателот на СДСМ, д-р Венко Филипче, во однос на вчерашните навреди од страна на Мицкоски во Собранието. Филипче посочи дека вистинското извинување подразбира преземање одговорност, а не формален обид за спас на политичкиот углед.

„Ќе беше културно и достоинствено ако се извинише, но тој само создаде привид, се извини во празна сала, кога опозициските пратеници ја напуштија салата, само за да направи еден политички театар. Едно срамежливо, изнудено извинете. Меѓутоа, тоа не може да ги избрише навредите и неговиот начин на однесување. Вистинското извинување подразбира признавање на грешката, менување на начинот на однесување и санкции за Јован Стоилковиќ, кој што истото го направи во собраниската сала. Граѓаните заслужуваат почит, достоинство, заслужуваат премиер кој што обединува, а не човек кој што ги дели и ги навредува“, рече Филипче.

Тој додаде декаа ваквото однесување не е срам само за премиерската функција, туку и за институциите што Мицкоски ги претставува, и со ваквото однесување премиерот испраќа крајно погрешна порака и до младите и до меѓународната јавност.

„Ова е срам и за функцијата која што ја извршува, и за универзитетите, и за Собранието, и за Владата, и за државата. Каква порака им испраќа примерот на младите? На студентите? Каква порака им испраќа на граѓаните на Македонија? При тоа, ова не го гледа само Македонија и граѓаните тука, ова го гледа цела Европа. Вакво однесување од еден претседател на Влада до сега не е видено. Ниту кај нас, ниту пак сега има било каде во Европа. Ваков потценувачки однос кон граѓаните, кон пратениците во Собранието, нема никаде во Европа“, истакна Филипче.

Воедно, Филипче укажа дека нервозата на Мицкоски е последица на падот на довербата кај граѓаните и на неговите неисполнети ветувања.

„Спуштањето на политичката комуникација на ова ниво не може да се оправда со ништо, најмалку со нервозата што произлегува од падот на довербата кај граѓаните и од личниот рејтинг, кој самиот премиер го урна со секојдневните лаги и неисполнетите ветувања изминатиот период“ , рече Филипче.

Скопје, 14.07.2026

СДСМ