Здравје

Враќање на идеалот витка фигура – Како да ги заштитиме децата од притисокот?

После годините во кои се истакнуваше разновидната телесна градба и позитивната слика за сопственото тело, се чини дека се врати популарната култура со загрижувачкиот идеал на екстремно витка фигура.

Медиумските натписи за брзото слабеење на познатите личности, виралните фотографии и постојаното „брборење“ за лекови како Оземпик ги преплавуваат социјалните медиуми. За децата и тинејџерите кои растат опкружени со таква содржина, речиси е невозможно да ја избегнат пораката „подобро е да си слаб“ што може некогаш да доведе до сериозни последици, пишува Today’s Parent.

„Знаеме дека постојаното изложување на идеалот за витка фигура може да поттикне незадоволство од сопственото тело, што е главен фактор на ризик за нарушувања во исхраната“, вели д-р Дебра Кацман, лекар во Програмата за нарушувања во исхраната во болницата SickKids во Торонто. „Децата се споредуваат со слики кои често се нереални, многу изменети и прикажани на начин што ја нормализираат рестриктивната исхрана, а губењето на тежината ја нормализираат како здраво и вредно.“

Пораст на нарушувања во исхраната

Овој културен притисок доаѓа во време кога нарушувањата во исхраната кај младите луѓе веќе се во пораст. Според неодамнешното истражување на Канадското педијатриско друштво (CPS), една третина од канадските девојчиња на возраст од 10 до 14 години држеле диети, а до осмо одделение, повеќе од половина од младите се обиделе да ослабат. Истоврмено, студијата на SickKids покажа дека нарушувањата во исхраната се зголемиле за речиси 60 проценти од време на пандемијата COVID-19.

Д-р Кацман вели дека пандемијата создала клима погодна за проблемот: социјална изолација, зголемено време пред екран, нарушени рутини и ограничен пристап до здравствена заштита. „Децата беа на часови онлајн, се дружеа онлајн и цел ден гледаа во екраните“, објаснува таа.

Што можат да направат родителите?

Д-р Кацман вели дека разговорот е најмоќната алатка што родителите ја имаат и советува отворен, љубопитен и неосудувачки пристап. „Започнете со нагласување дека телата имаат различни форми и големини и дека изгледот не го одредува здравјето“, вели таа.

„Фокусирајте се на тоа што може да направи организмот, а не како изгледа телото. Наместо да кажете „Трчаш брзо поради твоето витко тело“, кажете „Обожавам да гледам колку си силен кога трчаш“ или „Во последно време изгледаш навистина полн со енергија“, советува таа.

Таа исто така предлага да се користат секојдневни ситуации, како што се насловни страници на списанија во продавница или објави на TikTok за слабеење на познати личности, како повод за разговор. Ако детето коментира дека некоја актерка или пејачка „сега е многу слаба“, д-р Кацман ги охрабрува родителите да го истражат коментарот наместо да го игнорираат. „Можете да кажете: „Забележувам дека размислуваш за тоа. Како се чувствуваш ти во врска со тоа?“ Тоа ја отвора вратата наместо да ја затвори.“

Кога децата директно прашуваат за апчиња за слабеење или изразуваат желба да го променат своето тело, целта е разговорот да се базира на сигурни информации и факти, а не на предавања. „Можете да ја признаете нивната забелешка и да објасните дека некои луѓе користат лекови или екстремни диети, но тоа може да биде небезбедно, особено за тела во развој“, вели д-р Кацман. „Здравите навики и балансираната исхрана се најбезбеден начин да се грижите за себе.“

Оваа порака се совпаѓа со ажурираните упатства на CPS, кои ги охрабруваат здравствените работници да усвојат пристап „здравјето пред сè“. Овој пристап дава приоритет на балансираната исхрана, пријатното вежбање и одржливите навики наместо рестриктивните диети фокусирани на тежината. Д-р Ален Тулани, коавтор на новите упатства и доктор во болницата SickKids, објаснува колку е важно да се пренесе пораката дека „најдобрата“ тежина не е нужно „идеална“. „Тежината на една личност е онаа тежина што може да се постигне со практикување безбедни, одржливи, здрави навики и уживање во животот“, вели д-р Тулани.

На што да внимавате

Родителите треба да обрнат внимание на предупредувачките знаци како што се прескокнување оброци, избегнување на заеднички оброци, опсесивно броење калории, прекумерно вежбање, раздразливост, социјално повлекување или зголемена раздразливост во врска со тежината и изгледот.

Доколку се појави загриженост, д-р Кацман ја нагласува важноста на раната интервенција. „Започнете со грижлив, неосудувачки разговор и побарајте стручна помош - од вашиот семеен лекар, педијатар или специјалист“, советува таа. „Колку порано интервенираме, толку подобар ќе биде исходот.“

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Над 5.000 заболени, 22 дена вода со фекалии а Мицкоски и ВМРО-ОКГ слават во Гостивар!

Вчера Христијан Мицкоски и ВМРО-ОКГ славеа во Гостивар, во градот каде над 5.000 граѓани беа отруени.

Што славеа, труењето на граѓаните?

Мицкоски нема ниту трошка морал. Ниту срам.

Наместо одговорност за една од најголемите здравствени кризи во Гостивар, партиска прослава.

Тоа е вистинското лице на оваа криминалната власт.

ВМРО-ОКГ слави а граѓаните на Гостивар 22 дена пиеја вода со фекалии, над 5.000 луѓе завршија во болница.

И пет недели се уште нема документ, извештај, потврда, за водата во градот.

Ако сè е во ред тогаш прашањето е многу едноставно:

Зошто пет недели нема официјално објавени резултати од анализите на водата во Гостивар?

Зошто документите се кријат од јавноста?

Кој ги потпишал анализите? Која институција официјално гарантира дека водата е безбедна за пиење?

Криењето на документите од страна на власта на Мицкоски создава несигурност, недоверба и паника меѓу граѓаните.

Министерот Клековски вели дека анализи на водата се прават секојдневно.

Ако анализите се прават секој ден, каде се резултатите зошто не се објавени?

Пет недели власта тврди дека водата е исправна, а пет недели нема јавен документ што го потврдува тоа.

Наместо стручни лица и надлежни институции, пет недели гледаме полицајци како се занимаваат со вода.

Стручно лице кое ќе застане пред јавноста – нема.

Институција која со потпис и печат ќе потврди дека водата е безбедна – нема.

Само изјави, контрадикторни информации и „чувства“.

Граѓаните на Гостивар не бараат славење, партиски прослави и здравици.

Бараат документ и бараат чиста вида. Бараат вистина, бараат одговорност.

Објавете ги веднаш анализите за водата во Гостивар.

Прес конференција на СДСМ, Наташа Поповиќ – членка на Извршниот одбор

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Интер бара ново засилување во Ангалија

Италијанскиот фудбалски шампион Интер продолжува со „шопинг“ во Англија.

Откако ова лето го ангажираше централниот дефанзивец Џон Стоунс (32) од Манчестер Сити како слободен играч и му плати 30 милиони евра на Тотенхем за десниот бек Џед Спенс (26), италијанскиот тим кој ја освои двојната круна тргнува по уште еден Англичанец.

„Газета дело Спорт“ пренесува дека Интер ќе понуди 30 милиони евра за играчот за врска на Ливерпул, Кертис Џонс (25) – сума за која се очекува да биде доволна, со оглед на тоа што договорот на Џонс истекува следното лето. Џонс има одиграно 228 натпревари за Ливерпул, при што постигнал 22 гола и забележал 25 асистенции.

Тагови: Интер Ливерпул

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Средно училиште во Белгија воведува курс наречен „Размислување за безбедноста“

Идејата за курсот се појави пред околу три години, а училиштето беше поддржано во неговата имплементација од Министерството за одбрана, локалната полиција и покраинските власти.

Средното училиште Heilige-Drievuldigheids college (HDC)“ во Лувен воведува курс наречен „Размислување за безбедноста“, во кој припадниците на белгиската војска и локалната полиција ќе ги учат учениците за геополитика, заштита на податоци, радикализација и конфликт.

Курсот, кој ќе биде воведен во септември, ќе го посетуваат студенти од трета година по спортски науки еднаш неделно, а „HDC“ ќе биде првото училиште во Белгија што ќе воведе таква програма, објави „VRT“.

Директорот на училиштето, Франк Бајенс, рече дека целта е учениците подобро да ги разберат безбедносните прашања и да ја развијат способноста да формираат свои мислења, наместо да ги подготвуваат за кариера во војската.

Покрај геополитиката и радикализацијата, лекциите ќе опфаќаат превенција, право, етика и заштита на податоци.

Учениците нема да учат како да ракуваат со оружје или самоодбрана како дел од курсот.

Идејата за курсот се појави пред околу три години, а училиштето беше поддржано во неговата имплементација од Министерството за одбрана, локалната полиција и покраинските власти.

Директорот рече дека учениците генерално позитивно реагирале на новиот предмет, но дека некои родители изразиле загриженост за можното поттикнување на „воена реторика“. Бејнс одговори дека целта е токму спротивна - учениците да можат да формираат свои мислења преку познавање на безбедносните прашања.

Фото: ВИ

Извор: Б92

Тагови: Белгија Средно училиште

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.