Четири воени дронови ја прекршиле зоната за забрането летање и го насочиле авионот на украинскиот претседател Володимир Зеленски пред да слета на аеродромот во Даблин во понеделник, објави Телеграф.

Авионот на Зеленски слета малку порано од планираното, околу 23 часот, но според проценките, дроновите би биле директно на патеката на пристап на претседателскиот авион доколку слеташе на време.

Не е познато кој ги лансирал

Потоа нерегистрирани дронови кружеле над брод на ирската морнарица кој бил тајно распореден во Ирското Море пред првата посета на украинскиот претседател на Ирска.

Извори на Журнал велат дека дроновите полетале од област североисточно од Даблин и летале околу два часа. Не е познато кој ги лансирал или каде се наоѓаат во моментов.

Безбедносни извори се сомневаат дека целта на дроновите била да го попречат пристигнувањето на Зеленски во Даблин, со оглед на тоа што авионот имал вклучени светла. Тие исто така тврдат дека станува збор за воени дронови и дека инцидентот би можел да се класифицира како форма на хибридно војување. Јавноста претходно беше посебно предупредена дека над Даблин ќе биде воспоставена „зона без дронови“ за време на претседателската посета.

Европратеникот од Фијана Феил, Бери Ендрус, изјави: „Прекршок е да се управува со дрон во таа област без дозвола“. Тој им се заблагодари на ирските воздухопловни сили и на полицијата за, како што рече, успешната заштита на претседателот и неговата сопруга Олена Зеленска.

Европа во висока готовност поради серија упади со дронови

Европските земји се во висока готовност во последните месеци по серијата напади со дронови што ги затворија аеродромите во Брисел, Данска и Берлин. Русија е обвинета дека ја користи својата флота во сенка, мрежа од танкери за нафта, за лансирање дронови од отворено море, што постојано ги нарушува европските аеродроми и воената инфраструктура.

Анализа на Телеграф, заснована на податоци за сообраќајот на бродови, го смести танкерот Боракеј во Балтичкото Море во периодот кога во септември беа регистрирани серија роеви дронови. Бродот беше на 50 наутички милји од Копенхаген на 22 септември кога активноста на дронови го парализираше аеродромот во данската престолнина неколку часа. Во следните денови, танкерот помина покрај најсеверниот 'рт на Данска и пловеше по неговиот западен брег, додека беа забележани нови видувања на беспилотни летала. Иако Боракај подоцна беше запленет од француската крајбрежна стража, други танкери од флотата во сенка се уште активни. Таа флота е најмногу позната по заобиколување на санкциите и финансирање на руската воена машинерија со транспорт на нафта.

Се верува дека Копенхаген е првиот пат кога танкер е користен за извршување напад со беспилотни летала, што укажува на новиот метод на хибридно војување на Москва. Зеленски беше првиот што предупреди дека Русија користи бродови од флотата во сенка за „лансирање и управување“ со беспилотни летала над европските градови, повикувајќи се на домашни разузнавачки информации на 28 септември.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.