Во Собранието денеска ќе заседаваат Комисијата за култура и туризам, Законодавно-правната комисија, Комисијата за финансирање и буџет, Комисијата за транспорт, дигитална трансформација, животна средина и просторно планирање и Комисијата за економски прашања, труд и енергетска политика.
Во рамки на Комисијата за економски прашања, труд и енергетска политика ќе се одржи јавна расправа за Предлог- законот за работно ангажирање на лица со кој се предвидува поедноставување на постапката на работно ангажирање преку воведување на поедноставен систем за регистрација, кој ќе биде управуван од Агенцијата за вработување. Со законското решение се очекува да се регулира начинот на воспоставување на работни ангажмани со или без прекини кои ќе имаат значајна улога за вклучување на одредени категории лица во рамки на формалната економија. Исто така, се очекува да се поттикне фер конкуренција, осигурувајќи дека сите работодавачи ќе можат да ангажираат работници под исти услови, особено во периоди со зголемен обем на работа, создавајќи поинклузивен и подинамичен пазар на труд.
Како што образложи на 4 април пратеникот на ВМРО-ДПМНЕ Тони Јаревски, Законот дава можност и заштита за ангажман и за средношколците односно за лица помлади од 18 години кои согласно општите прописи од работните односи ги исполнуваат условите за засновање на работен однос.
Пред членовите на Комисијата за култура и туризам се Предлог измените на Законот за авторското право и сродните права, во второ читање, а истиот закон е на дневен ред и на Законодавно-правната комисија која ќе треба да ги разгледа и Предлог-измените на Законот за процена.
На Комисијата за финансирање и буџет се Годишниот извештај за работата на Државната комисија за жалби по јавни набавки за 2024 година, Годишната програма за работатa на Државната комисија за жалби по јавни набавки за 2025 година, Стратешкиот план на Државната комисија за жалби по јавни набавки за 2025 година и Финансискиот план на Државната комисија за жалби по јавни набавки за 2025 година, сите во второ читање.
На Комисијата за транспорт, дигитална трансформација, животна средина и просторно планирање се Годишниот извештај за работа на Јавното радиодифузно претпријатие Македонска радио-телевизија за 2024 година, Извештајот за работа на Агенцијата за аудио и аудиовизуелни медиумски услуги за 2024 година, Годишниот извештај за работа на Агенцијата за регулирање на железничкиот сектор за 2024 година, Извештајот за работа на Агенцијата за електронски комуникации за 2024 година.