Светлана Живкова од Центарот за јавно здравје информира дека последниот извештај за периодот од 27 јануари до втори февруари покажува дека се евидентирани 126 заболени од грип што е четирикратно повеќе во однос на претходната седмица.
Живкова апелира, матичните лекари и специјалистичките ординации да ги доставуваат извештаите до Центарот за да има меродавни бројки и реална состојба на заболените. Нејзина оценка е дека бројот на болни се зголемува, а најпогодени се лицата од 15 до 64 години. Таа за МИА вели дека допрва се очекува зголемување на бројката, бидејќи во февруари е и пикот на грипот.
Началникот на Инфективното одделение во штипската Клиничка болница, Дијана Шишкова забележува дека нивната амбуланта ја посетиле 13 пациенти, а во моментов на оваа Одделение се хоспитализирани осум лица кои поради хроничните болести имаат одредени компликации и затоа се под лекарски надзор.
Во штипските училишта евидентно е отсуството на ученици, а според директорот на Општинското основно училиште „Ванчо Прќе", Методија Папаров, забележано е отсуство на еден отсто од вкупниот број ученици или над 100 ученици не ја посетуваат наставата поради грип. Раководителот на Секторот за образование, јавни дејности и ЛЕР, Билјана Казанџиска вели дека ја следат состојбата во училиштата, а во текот на утрешниот ден ќе излезат со конкретни бројки на отсутни ученици во сите училишта, по што ќе утврдат какви мерки ќе се преземат. /МИА