Прво се појави британската варијанта, следена од јужноафриканската и бразилската. Овие три соја се единствената закана веќе некое време.

Сепак, неодамна се појавија извештаи за седум нови соеви во САД, нова мутација во Финска и супер соеви или соединенија од неколку различни варијанти.

Се поставува прашањето што се случува и зошто одеднаш нè преплавија бројни мутации на коронавирусот.

Финските експерти денеска објавија дека е забележана дополнителна мутација во лабораторијата во Хелсинки, верзијата Fin-796H. Оваа мутација претходно била евидентирана во британската и јужноафриканската варијанта на вирусот, но сега е евидентирана во „единствена“ комбинација.

„Овој сој го откривме минатата недела кај еден пациент, така што сè уште не знаеме детали за нивото на инфективност и потенцијалната отпорност на тој сој кон вакцините“, рече молекуларниот биолог Тару Мери од лабораториите Вита.

„Малку е веројатно дека овој сој потекнува од Финска поради релативно ниските стапки на инфекции во земјата“, додаде таа.

Петри Авинен, директор на Институтот за биотехнологија на Универзитетот во Хелсинки, рече дека видот не потсетува генетски на ниту една позната варијанта.

Според истражувањето објавено пред четири дена во архивите MedRxiv, неодамна се пријавени седум варијанти на коронавирус во САД, со мутација на истата генетска буква.

Охрабрувачки е што ова не се сосема различни мутации, туку седум слични. Но, проблематично е што сите овие мутации наликуваат на позаразните соеви - британскиот и јужноафриканскиот.

Една од варијантите, Q677P, за прв пат е регистрирана во Соединетите држави на 23 октомври, но во Луизијана се проширила толку многу што помеѓу 1 декември и 19 јануари, претставувала 27,8% од сите случаи на инфекција.

"Очигледно нешто се случува со оваа мутација. Сите овие варијанти имаат мутација на истата аминокиселина", изјавил вирусологот Џереми Камил од Универзитетот во Луизијана за Њујорк Тајмс.

Научниците ги забележале овие седум соеви во различни држави низ САД, но сè уште не е познато дали тие се позаразни или се поотпорни на вакцините.

Американски научници пред неколку дена објавија дека две верзии на ковида-19, британската и калифорниската, се споиле во мутиран хибрид од кој може да се појават неколку различни соеви.

Не е познато од кога точно датира анализираниот примерок, но се претпоставува дека е земен пред околу еден месец на подрачјето на Калифорнија, пишува New Scientist.

Експертите забележуваат дека тоа може да биде контаминиран примерок или рекомбинација на вирусот што се случило по земањето на примерокот, а не во заразено лице. Во тој случај, тоа би било лабораториска грешка, а не нова верзија која циркулира во областа Калифорнија.

Комбинација или рекомбинација на два различни соеви може да се случи ако индивидуа се инфицира со двете варијанти истовремено. Тогаш и двата соја со два различни генома завршуваат во човечката клетка. Имено, ензимот на коронавирус кој го реплицира неговиот геном честопати може да се лизне од синџирот РНК што го копира и подоцна да се врати таму каде што застанал. Во случај да има два соја во клетката, ензимот може постојано да скока од едниот до другиот, создавајќи нов мозаик на геноми.

Рекомбинацијата е поверојатно да се појави во два многу поврзани соеви, но исто така е документирано дека се случила во прилично различни коронавируси.

Можно е, на пример, САРС-CoV-2 да се комбинира со безопасниот коронавирус што предизвикува обична настинка. Ова сè уште не се случило и не е познато какви ќе бидат последиците од таквата рекомбинација.

Неодамнешните истражувања покажале дека варијантата што најпрво е откриена во Велика Британија, позната како Б.1.1.7, е за 35 до 45 проценти позаразна од другите соеви. На пример, бројот на британски инфекции на вирус во САД се удвојува на секои 10 дена.

Иако некои студии покажале дека британската верзија може да биде 30-70 проценти посмртоносна од оригиналната варијанта на коронавирусот, предизвикувајќи потешки форми на болеста не е во некој посебен еволутивен интерес на вирусот. За нив најкорисни ќе бидат оние мутации што ќе им овозможат повеќе да се размножуваат. Вирусот ебола е многу смртоносен, но е помалку опасен за општата популација затоа што премногу брзо ги убива своите домаќини и го отежнува ширењето.

Но, понекогаш се случува да надвладее повеќе смртоносен вид. Ова се случило со шпанскиот грип што се проширил меѓу војниците во Првата светска војна. Во тоа време, малку болните војници останале изолирани од поголемиот дел од населението на фронтот, а посериозно болните биле пренесени од фронтот во заднината, во куќи или во болници каде можело да се прошири поопасниот вирус.

Епидемиолозите и вирусолозите веќе подолго време предупредуваат за појавата на нови соеви или рекомбинацијата на постојните. Колку повеќе вирусот се шири низ популацијата, толку е поголема можноста да се појават нови верзии.

Една од причините за воведување мерки е тоа што контролирањето на бројот на заразени ја намалува веројатноста за појава на нови варијанти. Со оглед на тоа што тие веќе се појавија, сега треба да се работи во борбата против нив преку рестриктивни мерки и ефективна програма за вакцинација. Од голема важност е вакцинацијата да се спроведува во сите земји во светот со цел да се спречи појавата на опасни соеви. Варијантата отпорна на вакцини може да потекнува насекаде, во некој далечен агол на Африка, и многу брзо да се рашири во поразвиените и побогатите земји.

Нешто вакво се случило со јужноафриканската варијанта за која се покажало дека е доста отпорна на вакцината на AstraZenecа. Тестовите на „Фајзер“, „Модерна“ и „Џонсон и Џонсон“ покажуваат дека нивните вакцини сè уште се доволно ефикасни против новите соеви, но не се знае колку ќе бидат ефективни за суперсоевите или идните верзии со различна мутација.

Доколку се појават соеви отпорни на вакцините САРС-CoV-2, можеби ќе треба да се ажурираат вакцините. Добрата работа е што фармацевтските компании кои развиле вакцини засновани на делови од РНК вирусот, можат да развијат нови вакцини со нови шифри во рок од неколку недели.

Дополнително, ако циркулираат нови варијанти со постари соеви, може да бидат потребни мултивалентни вакцини, ефикасни против неколку соеви, како што редовно се случува со вакцините за сезонски грип.

Но, дури и во случај на брз одговор од фармацевтските компании, може да се случи вакцинираните лица да немаат имунитет на новоформираните соеви веќе некое време, што би ги изложило на ризик иако ги примиле обете дози.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.