Во САД има недостиг на мајмуни поради експериментите со вакцината против корона

Глобалната трка за вакцина против коронавирус, која треба да помогне да се стави крај на пандемијата, предизвика недостиг на - мајмуни.

Според американските медиуми, пред да се тестираат потенцијалните вакцини врз луѓе, со претклиничкото истражување се испитува безбедноста и ефективноста на вакцината врз мајмуните. Но, со повеќе од 100 можни вакцини кои моментално се во игра, побарувачката за мајмуни ја надмина понудата.

„Имаме недостиг“, изјави д-р Скип Бом за USA Today, кој е помошник директор задолжен за ветеринарна медицина во Националниот центар за истражување на приматите во Њу Орлеанс.

USA Today наведува дека, како и во многу други аспекти на општеството, пандемијата го истакна постојниот проблем.

Особено, истражувачките центри на приматите со години се со проблеми поради ограничувањата на увозот на мајмуни од земји како Кина и Индија, но и недостатокот на финансии за одгледување мајмуни во САД.

„Отсекогаш сме биле во состојба каде нашето производство едвај ја задоволува побарувачката за мајмуни што се користат во истражувањата, а кога избувна пандемијата на коронавирус, тоа нè турна уште подолу “, објасни Бом.

Иако групите за заштита на правата на животните се спротивставуваат на употребата на примати во научни експерименти, истражувачите велат дека ваквите практики се клучни за развојот на медицината.

Центарот во Њу Орлеанс на својата веб-страница наведува дека се обидуваат да користат најмал можен број на животни потребни за валидни научни резултати. За жал, во моментов не е можно целосно да се замени употребата на животни со компјутерски модели или мобилни истражувања.

„Реакциите на имунолошкиот систем на мајмунот се многу слични на она што го гледаме кај луѓето и затоа овие експерименти можат да ни дадат многу добри показатели за безбедноста и ефективноста на вакцината“, изјави Џеј Рапапорт, директор на Центарот, за USA Today.

Песната „Сакам да кажам" од Нокаут победничка на 35-то издание на „Макфест"

Победничка песна на 35-то издание на „Макфест" е „Сакам да кажам"  од групата Нокаут, втората награда е за „Ден по ден" изведена од Ѓоко Таневски и трета награда за „Ако те изгубам" во изведба на Омар Џаферовски.

Никола Перевски-Пере од Нокаут за МИА вели дека ова е награда по 24 години работа, а слатка трема немал да почуствувано никогаш.

-По 24 години конечно нешто да освоиме, публиката тоа го примети дека има некаков квалитет, што сме го направиле. Се разбира тука е жирото кое гласаше за нас и веројатно жирото, тоа го почуствувало. Најважно е за мене да почуствува песната, да се пренесе енергијата, кај публиката, еве и кај жирото и сметам дека е заслужено, вели Пере од Нокаут.

Тој во разговорот за МИА открива дека песната е направена пред три години, а инспирацијата доаѓа од љубовта. Прашан како го доживува „Макфест" по 35 години, одговорот му е „Како никогаш досега, затоа што „Макфест" досега се правеше на затворено, а сега за првпат е кога „Макфест" се организира под отворено небо и навистина чувството е прекрасно и мислам дека треба да продолжи во ваков некаков континуитет, рече Перевски-Пере од Нокаут.

Досега на „Макфест" имал две композиции едната е „Танго" во 2014 и победничката е втора песна со која настапи на 35-то издание.

Публиката синоќа не гласаше, изборот на наградите го направи стручното жири, составено од познати македонски музички имиња, актери, од модата. Што се однесува за почитувањето на здравствените протоколи фестивалот беше беспрекорно организиран. Волонтерите на ОО Црвен Крст постојано беа меѓу публиката, кои предупредуваа на држење дистанца и задолжително носење на заштитни маски./MИА

Сончево и топло преку ден, утринските температури ниски

Сончево време со мала до умерена локална облачност ќе преовладува денеска во земјава. ќе дува и слаб до умерен ветер од променлив правец.

За денеска, според метеоролозите, утринската температура ќе се движи од 6 до 16 степени, а дневната од 24 до 29 степени.

Слично време ќе преовладува и во Скопје каде утринската температура ќе се спушти до 13-тиот степен, а дневната ќе се искачи до 28-тиот степен.

Се најавува период на претежно стабилно време но со ниски утрински температури. Во вторник и во среда во западните делови можна е појава на нестабилна облачност со повремен дожд и ретки грмежи.

Oдбележување на Европска недела на мобилност во Скопје

Во рамки на одбележувањето на Европската недела на мобилност денеска кај Школка во Градскиот парк ќе се одржи настан „Вело Родео" во организација на здружението на граѓани „Еко Логик".

Настанот е поддржан од Делегацијата на Европската унија во Скопје, а право на учество имаат учениците од 4 до 9 одделение од основните училишта кои имаат желба да возат велосипед и едукативно да се забавуваат.

Програмата вклучува едукативни игри како „Еко Не лути се човече" (во реална големина), „Вело Меморија" (мега верзија, карти и онлјан апликација), Еко квиз, Вело Маало,Твистер, покажување и унапредување на велосипедските вештини, творење во рамки на креативна работилница и други изненадувања и активности.

Поради пандемијата со Ковид-19, организаторите најавуваат дека настанот ќе се одржува согласно официјалниот протокол за организирање на јавни настани со целосно почитување на здравствените мерки.

Европската недела на мобилност, која традиционално секоја година се одбележува од 16 до 22 септември, годинава се одржува под мотото „Мобилност со 0 емисии за сите".

притисни ентер