Во Нови Сад голем комеморативен собир: Илјадници луѓе ноќеска по полноќ одржаа 16-минутен молк - Канал 5

Балкан

Во Нови Сад голем комеморативен собир: Илјадници луѓе ноќеска по полноќ одржаа 16-минутен молк

 Во српскиот град Нови Сад голем број луѓе од целата држава ќе одржат денеска комеморативен собир со цел - оддавање почит на првата годишнина од загинувањето на граѓани поради уривањето на бетонската настрешница на железничката станица во Нови Сад.

Во Нови Сад голем комеморативен собир: Илјадници луѓе ноќеска по полноќ одржаа 16-минутен молк

На државно ниво денеска Ден на жалост.

Пред една година - на денешен ден во Нови Сад - загинаа 16 луѓе, а едно девојче беше тешко повредено кога се урна бетонска настрешница на реновирана железничка станица во тој град, трагедија за која досега не е утврдена кривична одговорност.

Бетонската настрешница се урна во 11 часот и 52 минути, тогаш загинаа 14 луѓе, меѓу кои и четири деца на возраст од шест, 10, 16 и 17 години, а три лица беа тешко повредени. Уште две лица починаа подоцна поради повредите.

Меѓу загинатите беше и Македонецот Васко Саздовски (46) - истражувач во Институтот Биосенс во Центарот за сензорски технологии, како виш истражувач во рамките на проектот ANTARES. Докторирал на Универзитетот Кренфилд, Обединето Кралство. Претходно магистрирал електротехника на Универзитетот „Св. Кирил и Методиј“ и дипломирал воздухопловство на Воената академија во нашата држава.

Илјадници луѓе ноќеска по полноќ во Нови Сад одржаа 16-минутен молк со што им оддадоа почит на жртвите од трагедијата, пред големиот комеморативен собир со кој денеска ќе се одбележи годишнината од страдањето на 16 луѓе кои загинаа при падот на бетонската настрешница на реновираната зграда на станицата.

Новосаѓани изминатите два дена ги пречекуваа групите студенти и граѓани кои дојдоа пеш од цела Србија за да им оддадат почит на загинатите. Во градот се веќе присутни и групи велосипедисти, моторџии, ветерани и земјоделци со трактори.

По собирањето во центарот на градот, тие по полноќ се упатија во колона кон железничката станица. Студентите на чело на колоната, во тишина, носеа 16 венци бели цвеќиња со имињата на жртвите од трагедијата.

Бројни жители на Нови Сад им се придружија во целосна тишина во текот на ноќта при што пред станицата палеа свеќи.Студентите кои пристигнаа во Нови Сад се сместија во кампусот - една од 16-те локации во Нови Сад од кои ќе се движат денеска кон железничката станица.

Веднаш по падот на настрешницата, прво Железничката инфраструктура на Србија објави дека настрешницата не е реконструирана, а потоа тоа го повтори и тогашниот премиер на Србија Милош Вучевиќ, кога дојде со министерот за внатрешни работи Ивица Дачиќ и градоначалникот на Нови Сад Милан Ѓуриќ да го посетат местото на несреќата.

„Неверојатно е дека 60 години таа настрешница не е обновена. Дури и кога целата станица беше реконструирана, настрешницата не беше. Некој ќе мора да објасни зошто“, рече српскиот претседател Александар Вучиќ во порака до јавноста.

Од таа вечер на 1 ноември, активисти на студентската организација СТАВ (Студенти против авторитарната влада) организираа бдеење со свеќи за жртвите на Плоштадот на слободата.

Од следниот ден, граѓаните и опозициските активисти почнуваат да организираат собири, барајќи одговорност од надлежните.

На 3 ноември беше организиран протест во Белград поради трагедијата во Нови Сад. Граѓаните оставија траги од „крвави раце“ на зградата на Владата на Србија.

На 5 ноември беше организиран протест „Раџете ви с крвави“ пред Градското собрание во Нови Сад и пред железничката станица. Се бараа оставки од премиерот Вучевиќ и градоначалникот на Нови Сад, Милан Ѓуриќ. Претседателот на државата, Александар Вучиќ тој ден дојде во Нови Сад за првпат по несреќата, го посети Градскиот комитет на СНС. На 15 ноември во Нови Сад беше одржан првиот протест - 14 минути тишина за 14 жртви.

Една недела подоцна приврзаници на владејачката СНС, меѓу кои имаше и многу партиски функционери, нападнаа студенти и професори на Факултетот за драмски уметности во Белград кои им оддаваа почит на загинатите во трагедијата во Нови Сад.

Четири дена подоцна - наставата на ФДУ е прекината. Студентите побараа МВР на Србија да поднесе кривични пријави против лица познати на јавноста и да ги идентификува другите членови на организираната група што физички ги нападна студентите и професорите.

Од 29 ноември лани почна и првата блокада на Ректоратот. Одржан е првиот пленум. Студентите на белградски факултети ја прекинуваат наставата со барања за јавно објавување на документацијата за реконструкцијата на железничката станица во Нови Сад.Од 13 декември - веќе сите факултети во Белград и во Нови Сад беа во блокада.

На 15 март оваа година во Белград беше одржан најголемиот протест во историјата на Србија

Според Архивата на јавни собири, на улиците на Белград имаше помеѓу 275.000 и 325.000 луѓе. Сомневања постоеја дека на тој ден полицијата употребила и звучен топ, но еден ден подоцна, МВР на Србија ќе го негира тоа, а на 16 април ќе биде „потврдено“ и од Федералната служба за безбедност на Руската Федерација чии експерти вршеа анализи.

Од почетокот на мај студентите во блокада објавија дека бараат и одржување предвремени парламентарни избори, барање што го одби српскиот претседател.

Министерот за градежништво, транспорт и инфраструктура на Србија, Горан Весиќ, поднесе оставка на 5 ноември, наведувајќи дека поднесува оставка „од морални причини“ бидејќи несреќата се случила во ресорот што го води.

Горан Весиќ и уште 11 лица, вклучувајќи ја Јелена Танасковиќ, в.д. директорка на „Железничка инфраструктура“, која поднесе оставка неколку дена претходно, беа приведени на 21 ноември поради падот на настрешницата.

Апсењата по наредба на Обвинителството за организиран криминал, чија истрага опфати 15 лица, вклучувајќи го и Томислав Момировиќ, беа извршени на 1 август оваа година.

Меѓу другото, уапсени се Момировиќ и неговата тогашна помошничка, Анита Димоски, како и Небојша Шурлан, кој беше вршител на должноста генерален директор на компанијата „Инфраструктура на железница на Србија“ од мај 2020 до март 2024 година.

Во моментов, три случаи се во фаза на истрага и се уште не е потврдено обвинение, па затоа не е покрената судска постапка.

Покрај таа постапка, за потенцијална корупција за време на модернизацијата на железницата до границата со Унгарија, се води една истрага за падот на настрешницата во Нови Сад и Белград.

Истрагата на Вишото јавно обвинителство во Нови Сад, со одлука на Вишиот суд во Нови Сад, на 12 март оваа година, беше вратена на дополнување.

На 18 јуни, Вишото јавно обвинителство го обвини Вишиот суд за опструкција, а по неговото дополнување, на 16 септември, објави дека поднело ново обвинение, против истите осомничени и за истите кривични дела.

Вишото јавно обвинителство во Белград покрена обвинение против тројца осомничени вклучени во истрагата на Обвинителството во Нови Сад, но за кривични дела со „коруптивни елементи“.

Оценките на експерти, вклучително и членови на независна Анкетна комисија, беа дека постапката во Белград всушност била обид за опструкција на постапката во Нови Сад.

Во изминатите неколку недели државни функционери наведуваат дека е можно падот на бетонската настрешница да бил предизвикан од терористички чин.

„Анализата и стручното испитување на над дваесет примероци од пронајдени траги, спроведени од Техничкиот оддел на Националниот центар за криминалистичка форензика при Министерството за внатрешни работи, не утврдија присуство на експлозивни супстанции...спроведената анализа покажа дека уривањето на настрешницата на железничката станица не е резултат на тероризам“, објави Вишото јавно обвнителство во јули.

Претседателот на Србија, Александар Вучиќ, вчера во обраќање до јавноста нагласи дека му е жал за работите што им ги кажал на демонстрантите и студентите и уште еднаш ги повика граѓаните на дијалог по први ноември.

Тој потсети дека пред една година Србија доживеала ужасна трагедија во Нови Сад и најави дека денеска ќе оди во црква и ќе му се помоли на Бога и ќе запали свеќа за секоја жртва.

Како што рече, знае дека многумина се лути што виновниците за тој настан не се утврдени и нагласи дека тоа е разочарувачки и за него.

„Можам да го разберам гневот, особено на семејствата на жртвите и оние кои беа директно погодени од трагедијата“, нагласи тој.

„Би сакал први ноември да помине мирно, со повеќе тишина отколку бучава“. Вучиќ рече дека е потребно да се открие вистината „која е поткрепена со докази“. Тој рече дека денешниот ден не треба да биде ден што секој ќе го користи за своја политичка корист и повика на дијалог во општеството.

Како и пред двата големи протести во Белград на 15 март и 28 јуни, „Србијавоз“ и овојпат го прекина патничкиот сообраќај кон Нови Сад - претходните двапати причина беа „дојави за бомби“, но сега нема официјално објаснување на официјалната веб-страница на „Србијавоз“.

Патничките возови кон Нови Сад не сообраќаат од вчера попладне и утрово.

Пред три дена, јавното претпријатие „Патишта на Србија“ објави дека на 29 октомври стапила на сила привремена промена на режимот на сообраќај, што ќе трае до 10 ноември 2025 година. Во тој период, неколку правци до Нови Сад ќе бидат затворени поради „работи за обнова“.

„Целата оваа омраза што врие во нашето општество не носи ништо добро, само води кон поголемо уништување“, рече вчера во обраќањето српскиот претседател.

YouTube video

Тагови: настрешница Нови Сад

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

„Ќе се срушиме, ќе се срушиме!“- последни зборови на пилотот пред експлозијата на авионот со 9 лица (ВИДЕО)

Девет лица загинаа кога приватен авион „Лирџет“ на пат кон Бахамите се урна и експлодираше во округот Палм Бич, Флорида, во недела попладне, соопштија властите.

„Ќе се срушиме, ќе се срушиме!“- последни зборови на пилотот пред експлозијата на авионот со 9 лица (ВИДЕО)

Според Националниот одбор за безбедност на сообраќајот (NTSB), ова беше втората најсмртоносна авионска несреќа во Соединетите Држави оваа година.

Во јуни, авион што превезуваше падобранци се урна во Мисури, при што загинаа 12 лица, објави CNN.

Властите сè уште не ги идентификувале деветте лица во авионот, ниту пак кажале колкумина биле патници или членови на екипажот.

Гувернерот на Флорида, Рон ДеСантис, ја опиша несреќата како „како ракета што се врти кон земјата“.

Нема пријавени жртви на земјата, рече тој, но делови од авионот биле расфрлани на широк простор по ударот.

Околу 600 луѓе не можеле да се вратат во своите домови бидејќи несреќата го блокирала пристапот до заедницата за мобилни домови. Локалните власти обезбедиле привремено сместување за нив.

Министерот за транспорт на САД, Шон Дафи, го потврди бројот на жртви и ја опиша несреќата како „страшна трагедија“.

Федералната администрација за воздухопловство (FAA) и Националниот одбор за безбедност на сообраќајот (NTSB) ќе ги истражат околностите на несреќата.

„Ќе се срушиме!“

Несреќата во Флорида е најсмртоносната досега во која е вклучен авион „Лирџет 60“, според Фондацијата за безбедност на летовите.

Во септември 2008 година, четири лица загинаа кога авион од ист тип, кој летал за Лос Анџелес, се урна за време на полетувањето во Колумбија, Јужна Каролина.

Авионот што се урна во Флорида полета од меѓународниот аеродром „Остин-Бергстром“ во Тексас и беше на пат кон Бахамите, соопшти FAA.

Според официјалните документи, авионот бил регистриран на друштво со ограничена одговорност од Делавер и бил рекламиран на интернет за чартер летови.

Авионите „Лирџет“ станаа синоним за приватна авијација.

„Лир 23“, дизајниран од Бил Лир, стана популарен меѓу богатите и славните веднаш по неговото воведување во 1960-тите.

Брендот последен пат го произведуваше канадската компанија „Бомбардие“, која престана да произведува нови авиони во 2021 година, но продолжува да обезбедува техничка поддршка за постојните авиони.

Последните зборови на пилотот пред несреќата

Неколку минути пред несреќата, пилотот пријавил формирање мраз во авионот, надворешна температура од минус 47 степени Целзиусови и умерена турбуленција, што предизвикало промени во висината на летот до околу 213 метри.

Оваа информација е снимена во аудио-снимка од комуникацијата помеѓу пилотот и контролата на летање, која е достапна на платформата LiveATC.net.

„Имаме чист мраз што можеме да го контролираме и умерена турбуленција“, пријавил пилотот во контролата на летање во Мајами.

Неколку моменти подоцна, откако пријавил почеток на врнежите и побарал дозвола за искачување повисоко, пилотот прогласил вонредна состојба.

„Губиме висина на 8.000… Мејдеј, мејдеј! Се спуштаме со 10.000 стапки во минута“, се вели во снимката.

Кратко потоа следело подраматично предупредување: „Се наоѓаме во ситуација на пребрзо движење, се спуштаме со 20.000 стапки во минута, или околу 20.000 стапки во минута… Ќе се срушиме!“

Според податоците за следење на летот објавени од ADS-B Exchange, авионот изгубил околу 27.000 стапки надморска височина за само една минута пред да престане преносот на податоци.

Во времето на несреќата имало изолирани грмотевици во областа, а авионот поминал низ посилна ќелија за бура само неколку минути пред да започне со неконтролирано спуштање.

Сè уште не е познато дали бурата придонела за несреќата. Сепак, авионот се наоѓал во област за која FAA издаде предупредување за бури и опасности за воздушниот сообраќај во тој момент.

Натрупувањето мраз на крилата и другите делови од авионот може да претставува сериозна опасност, особено за приватните авиони.

NTSB издаде безбедносно соопштение во јануари 2024 година за ризиците од формирање мраз за време на летот. Како што е наведено, овој феномен може да доведе до губење на контролата врз авионот, да го отежни одржувањето на насоката и брзината, а исто така да го спречи авионот да одржува стабилна надморска височина.

Силата на ударот оставила огромен кратер на патот

Ударот бил толку силен што асфалтот на местото на несреќата бил деформиран, а на патот се создал и голем кратер, според снимките објавени од филијалата на CNN, WPBF.

Сообраќајната несреќа се случила во близина на Милитари Треил, помеѓу булеварот Крестхавен и 10-та Авенија Северна, соопшти канцеларијата на шерифот на округот Палм Бич.

Сите ленти во двата правци засега се затворени, а на возачите им е советувано да ја избегнуваат областа и да користат алтернативни патишта.

„Околу 600 луѓе морале да ги евакуираат своите домови поради штети и блокирани патишта“, рече Џоел Флорес, локален службеник во округот Палм Бич, кој бил меѓу првите што пристигнале на местото на настанот.

Жителите во погодената област се испратени во две привремени засолништа додека истрагата продолжува.

„Слушнав тресок и почувствував тап удар“, изјави Ендру Манино за CNN.

Тој рече дека струјата веднаш снемала и дека не е повторно воспоставена, а набрзо почувствувал мирис на чад и видел „огромен црн облак“ како се крева во воздухот.

Местото на несреќата е околу 6,4 км јужно од аеродромот Вест Палм Бич, кој оваа година беше преименуван во чест на американскиот претседател Доналд Трамп.

Авионот се урна и околу 13 км југозападно од неговиот имот Мар-а-Лаго.

Трамп бил во Вест Палм Бич во недела наутро, но го напуштил аеродромот со Ер Форс Уан нешто повеќе од еден час пред несреќата.

Сведоците опишуваат моменти на ужас

Естебан Руиз, жител на заедница за мобилни куќи во близина на местото на несреќата, рече дека се одмарал кога слушнал силен тресок, проследен со звуци како капки дожд што удираат по покривот на неговата куќа.

Сепак, се покажа дека станува збор за метални делови од авионот што паднале врз куќите по ударот. Веднаш излегол надвор и затекнал хаотични сцени.

„Помислив дека можеби удрила гром“, рече тој, опишувајќи го кратерот што останал по падот на авионот, пишува Њујорк Тајмс.

Стефани Плат, друга жителка на населбата, била на својата тераса со своето семејство кога слушнала гласен шум, сличен на сообраќајна несреќа.

Набрзо била изненадена кога нејзината мобилна куќа почнала да гори поради деловите од авионот што биле однесени по ударот. Соседите се обиделе да ѝ помогнат да го изгасне пожарот.

Стефани се сеќава дека видела човечки остатоци расфрлани низ областа.

Во хаосот што следел, таа го изгубила и своето куче, Муси, кое избегало од страв откако авионот се срушил. Се надева дека животното успеало да најде засолниште некаде во близина.

„Сè беше во пламен. А по пожарот, почнале да паѓаат парчиња метал“, рече таа.

Што е познато за падот на авионот во Флорида?

Аналитичарката за авијација на CNN и поранешна генерална инспекторка на Министерството за транспорт на САД, Мери Скијаво, изјавила дека снимките од камерите на контролната табла ќе играат важна улога во утврдувањето на причината за несреќата.

Таа објасни дека пилотот, наместо да го продолжи летот во такви временски услови, можел да почека времето да се подобри на аеродромот.

„Ова не било контролирано спуштање. Авионот практично ја надминувал дозволената брзина на воздух и стапка на нуркање. Во тој момент, јасно е дека, што и да се случило, тие ја изгубиле контролата врз авионот“, објасни Скијаво.

Таа додаде дека наслагите од мраз можат да бидат толку силни што авионот го губи подигнувањето и влегува во режим на застој, состојба во која крилата повеќе не можат да обезбедат доволно подигнување за стабилен лет.

Според неа, екстремно стрмното нуркање можело да предизвика делови од авионот да се одвојат пред да удрат на земјата.

Исто така, постои можност експлозијата да го уништила снимачот на податоци за летот, таканаречената црна кутија.

Во моментов не е познато ниту дали авионот имал снимач на гласови во пилотската кабина, кој би можел да им обезбеди важни информации на истражителите на NTSB.

Прописите на FAA бараат авионите со повеќе мотори да имаат таков уред ако се користат комерцијално, односно за превоз на патници со надомест.

Документите покажуваат дека авионот што се урна во Флорида бил понуден и за чартер летови.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Со емотивна снимка се огласи ќерката на Мишо Ковач, прв пат по неговата смрт (ВИДЕО)

По смртта на легендарниот хрватски пејач Мишо Ковач, неговата ќерка Ивана Ковач за прв пат се огласи на социјалните мрежи.

Со емотивна снимка се огласи ќерката на Мишо Ковач, прв пат по неговата смрт (ВИДЕО)

Наместо долго проштално писмо, таа сподели видео на Инстаграм во кое нејзиниот татко зборува за верата, тема што му беше исклучително важна, објави Телеграф.

Ивана не објави долга порака со видеото, но самиот избор на видео привлече големо внимание. Во него се наоѓаат зборовите на Мишо за неговиот однос со верата и длабокото убедување што го имал.

„Католицизмот не е вера, туку реалност“

- Имам крст околу вратот што ми го дадоа Јањевци, почестена сум што ми го дадоа. Го имам Исус што ми го дадоа во Австралија. Жив Исус! Како? Католицизмот не е вера, туку реалност, бидејќи Тој е жив - рече Мишо во видеото.

Времето и местото на погребот се познати

Проштавањето со легендарниот пејач Мишо Ковач ќе трае три дена, а со музичкиот великан прво ќе се збогуваат во Шибеник, потоа во Сплит, додека последното збогување ќе биде организирано во Загреб.

Познати се и датумите на главните настани, па така во вторник, на 3 ноември, ќе се одржи голема проштална церемонија на сплитскиот Пољуд, додека ден подоцна семејството, пријателите и обожавателите ќе се соберат во Загреб.

Како што дознавме, прошталната церемонија на Пољуд е закажана за вторник во 16 часот, а се очекува да присуствуваат бројни музички ѕвезди и обожаватели на Мишо. По церемонијата во Сплит, ковчегот ќе биде пренесен во Загреб.

Тагови: Мишо Ковач

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Колку случајот со Алта банка може да направи потрес во банкарскиот систем?

Колку случајот со Алта банка може да направи потрес во банкарскиот систем и дали Народната банка можеше да спречи ваков развој на настаните? 

Колку случајот со Алта банка може да направи потрес во банкарскиот систем?

Случајот со АЛТА банка не претставува директна закана за финансиската стабилност на државата, но може сериозно да ја наруши довербата и кредибилитетот на банкарскиот сектор, оценува поранешниот министер за финансии Кирил Миноски. Иако оваа банка не е системски значајна за нашата земја, проблемите со пристапот до сопствените средства на клиентите во банката создаваат негативна слика и отвораат сомнежи кај граѓаните, вели Миновски.

„ Сето тоа нормално ја намалува довербата и сомнежот. Ние во изминатиот период, почнувајќи од независноста, имавме многу вакви ситуации и навистина како и во животот, довербата тешко се гради, меѓутоа многу лесно се губи.“

Случајот го отвора и прашањето за одговорноста на Народната банка и гувернерот, односно дали како регулатор навремено ги препознале ризиците поврзани со сопственикот на АЛТА банка, пред да го одобрат преземањето. Миноски смета дека постоеле повеќе индиции кои требало да бидат сериозен сигнал за претпазливост, од информациите и сомнежите во јавноста околу контроверзната сопственичката структура, до постапката што Европската централна банка ја презела во 2024 година.

„ Во дадениов случај дефинитивно за оние што беа сопственици на банката постоеше определен сомнеж, информации во јавноста во однос на сопственичката структура и мислам дека во тој дел можеби требало да се биде повнимателен. Кога била преземена определена постапка од страна на Европската централна банка, требало тоа да го вклучи црвениот аларм... Освен тоа, на сопственикот на банката му беше забранет влез во Црна Гора... Сето тоа се индиции коишто требало сериозно да се земат предвид пред да се донесе одлука.“

Миноски смета дека уште пред да се дозволи влезот на банката на македонскиот пазар, требало да се земат предвид и информациите со кои располагаат и други институции, особено оние поврзани со спречувањето перење пари и безбедносните ризици.

„ Во целиот тој процес не е вклучена само Народната банка, туку се вклучени и други институции: и во делот на контрола на парите, на перењето на парите, Управа за финансиско разузнавање и други институции, делот од разузнавачките служби коишто треба внимателно да ги следат сите овие економски текови и да даваат соодветни информации.“

Преземањето банка не е исто што и преземањето обична приватна компанија, вели Миноски. Затоа, според него, неопходни се координација и размена на информации меѓу надлежните институции, за да не се дозволи потенцијалните ризици да бидат препознаени дури откако со нив ќе се соочат граѓаните и компаниите.

YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер