Познат како Национален и локален иновативен центар за човековидна роботика, оваа установа во Шангај зафаќа повеќе од 5.000 квадратни метри. Главната намена е олеснување на размената и употребата на податоци меѓу развивачите на роботи.

Според „Глобал тајмс“, повеќе од 100 видови роботи со вештачка интелигенција се веќе во процес на учење, со цел да се воспостави сеопфатна база на податоци за индустриски, услужни, медицински и земјоделски апликации. Според Ксу Бин - генерален менаџер на центарот, објектот се обидува да одговори на клучните предизвици во истражувањето и развојот на роботиката.

- Имено, говорам за споделената технологија, индустриските екосистеми и решенијата за клучните сценарија за примена. Го создадовме центарот за да овозможиме споделување и користење на податоци од големи размери, со што ќе ја зајакнеме целата индустрија, изјави Ксу.

Различни производители на човековидни ВИ-роботи се разликуваат и во дизајнот и во функционалните модули, па затоа сега е потребна разновидна база на податоци.

- Во почетната фаза, центарот ќе обучува роботи за приближно 45 основни вештини, т.е. задачи како што се фаќање, собирање, поставување и пренос. За време на овие задачи, роботите ќе учат од податоците за повторливи движења, појасни Јанг Женгје, одговорен за пазарни системи во центарот.

Установата е во фаза на тестирање и генерира од 20.000 до 30.000 записи на податоци дневно. Откако ќе биде целосно оперативна, дневното производство може да достигне 50.000 записи на податоци со цел да надмине 10 милиони записи на податоци годишно.

- Меѓу долгорочните цели е да создаде платформа за размена на податоци, така што роботичарите ќе можат да споделуваат податоци специфични за одредени сценарија, како што се домашни апарати или здравствена заштита - сè тоа, и за да се спречи дуплирање. Во иднина, податоците собрани од различни човековидни роботи ќе се користат за развој на општа намена за најовремените интелигентни модели, додаде Јанг.

Со здружување на податоци, ВИ-моделот „Супермозок“ ќе може да раководи роботи од различни производители.

Како што роботите се сѐ поспособни за секојдневните задачи во производствените погони, јавните служби итн., така се зголемува и нивниот потенцијал да ја дополнат или заменат човечката работна сила.

Со систематско собирање и подредување податоци преку повеќе роботски платформи, сега инженерите можат да ги подобрат вештачкоинтелигентните алгоритми и да споделуваат нови откритија и наоди многу побрзо отколку во изолирани средини. Ксу вели дека објектот претставува „фундаментална инфраструктура за развој на ВИ“, успешно поврзувајќи хардвер, софтвер и собирање големи количини на податоци во еден беспрекорен процес. Набљудувачите внимателно го следат развојот на центарот, којшто летово се очекува да го достигне својот полн капацитет.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.