Тој на средбата, како што што соопшти неговиот Кабинет, изрази големо задоволство за континуираниот германски интерес за унапредување на соработката на сите нивоа, вклучително и на парламентарно ниво.

Сојузна Република Германија, рече претседателот на Собранието, е наш силен поддржувач во изминатите децении за остварувањето на нашите стратешки цели – претходно членството во НАТО и актуелно, напорите за наше што поскоро зачленување во Европската Унија, за што сме особено благодарни.

Гаши, исто така, се осврна и на трговската размена.

-Германија е наш најголем трговски партнер, рангирана на прво место, со кој остварувaме најголем обем на трговска размена со светот во последните 10 години. Високата трговска размена е резултат на значајни германски инвестиции, истакна Гаши.

Членовите на Делегацијата изразија благодарност за приемот и на Гаши му посакаа успех на неговата нова функција како претседател на Собранието.

Тема за дискусија беше и образовниот систем, при што беа разменети мислења за дуалното образование. Гаши нагласи дека таа тема е многу важна за нашата држава и дека, благодарение на интересот на германските компании да инвестираат во нашата земја и проектот за поврзување на образовниот систем со дел од компаниите, дуалното образование е вклучено во седум средни училишта во земјава.

Двете страни се согласија за продлабочување на парламентарната соработка, како и и за соработката на сите други нивоа.

Министерот за одбрана Владо Мисајловски заедно со началникот на Генералштабот, генерал-потполковник Васко Ѓурчиновски денеска беше во посета на Командата на операции во Касарната „Боро Менков“ во Куманово, каде оствари средба со командантот, бригадниот генерал Бесник Емини, началникот на штабот бригадниот генерал Мирче Ѓоргоски и најодговорните офицери во командата.

Како што се наведува во соопштението од Министерството за одбрана, за време на денешната посета министерот Мисајловски беше брифиран за мисијата и задачите кои ги остварува оваа команда, главниот двигател на Армијата во чиј состав се најголемиот број на армиски единици од сите родови и служби кои заеднички придонесуваат за заштитата на територијалниот интегритет и суверенитет на државата и во операции за поддршка на мирот и безбедноста предводени од НАТО, Обединетите нации и Европската Унија.

Мисајловски на денешниот брифинг упатил огромна благодарност до сите припадници на командата за сето она што го направиле досега и порачал дека максимално ќе ги поддржи сите активности и потреби кои ги има оваа Команда и единиците од нејзиниот состав.

-Сакам да ги запознам нашите припадници, чувари на мирот и безбедноста од блиску, да се запознам со вашите потреби и состојби и да направиме се што е потребно вашата работа да ја извршувате беспрекорно. Во мене имате сојузник на кој можете да се потпрете, порачал министерот Мисајловски.

На денешната средба министерот Мисајловски беше брифиран за идните чекори на Командата за операции, опремување и модернизација, обуката и вежбите и прифаќањето и имплементацијата на НАТО стандардите.

Интензивни зголемувања на речните водостои и локални комунални проблеми во градските урбани средини може да предизвикаат најавените врнежи кои попладне, според прогнозите, на повеќе места ќе бидат поројни, предупредува УХМР и додава дека посебно треба да се обрне внимание на скопскиот, кумановскиот, кривопаланечкиот, кратовскиот и тетовскиот регион.

УХМР препорачува внимателно движење покрај помалите реки и суводолиците, како и претпазливост на оние места каде се очекуваат поинтезивни врнежи од дожд.

-Согласно најавата дека попладне ќе биде нестабилно со пороен дожд и грмежи, а на повеќе места ќе има појава на невреме со обилен пороен дожд (над 30 l/m2), доколку процесите бидат интензивни и доколку на одредени места локално за кратко време навранат поголеми количини дожд, можно е да дојде до забрзано зголемување на водостојот на малите реки и суводолиците, каде на одредени локации е можно да се јават локални проблеми. Доколку се јават овие интензивни врнежи, можни се и локални комунални проблеми во градските урбани средини, наведува УХМР.