Во Бразил почна вакцинацијата на деца од пет години и повеќе

Петнаесет бразилски деца вчера ја примија вакцината против Ковид-19, неколку недели откако државниот здравствен регулатор издаде одобрение за вакцината „Фајзер" за деца на возраст од пет до 11 години.

На 16 декември, државниот здравствен регулатор издаде одобрение за употреба на вакцина за деца на возраст од пет до 11 години, развиени од Фајзер.

Одлуката го налути бразилскиот претседател Жаир Болсонара, кој се противи на вакцинацијата на децата, велејќи дека нема да дозволи неговата 11-годишна ќерка да ја прими вакцината и предупреди на можни несакани ефекти.

Наместо да ги следи упатствата на регулаторот, Министерството за здравство на Болсонаро постави онлајн анкета со прашањето дали лекарите треба да препишуваат вакцинација на децата. Некои од поддржувачите на Болсонаро водеа кампања на социјалните мрежи, повикувајќи ги луѓето да гласаат против.

И покрај тоа, мнозинството од речиси 100.000 учесници во анкетата одговориле дека поддржуваат доброволна вакцинација и давање приоритет на децата со здравствени проблеми, но се спротивставуваат на барањето лекарски рецепт за примање на вакцината.

Министерството за здравство минатата недела соопшти дека ќе дозволи вакцинација на деца.

Масовната вакцинација на децата ќе почне в понеделник.

Дојран доби детско игралиште во чест и сеќавање на донорката на органи Емилија Динева

Донаторите на органи, како нашата Емилија Динева, ќе останат засекогаш запаметени во поновата медицинска историја кај нас и нивните имиња ќе се споменуваат како синоним за добрина, хуманост и човекољубие.

По повод две години од смртта на Емилија Динева, чие донирано срце, благодарение на несебичноста на нејзиното семејство продолжи физички да живее, пријателите, роднините, соседите и почитувачите на нејзиното дело, ја исполнија нејзината желба да биде опкружена со деца и со донации го изградија новото детско игралиште во Дојран за трајно зачувување на споменот на нивната драга сограѓанка.

– Донаторите на органи, како нашата Емилија Динева, ќе останат засекогаш запаметени во поновата медицинска историја кај нас и нивните имиња ќе се споменуваат како синоним за добрина, хуманост и човекољубие, истакна дојранскиот градоначалник, Анго Ангов, при пуштањето во употреба на новото детско игралиште.

Ангов се заблагодари за добрината која Динева ја остави зад себе и, како што рече „ветуваме дека твоето име ќе биде забележано во колективната меморија на нашиот народ"

Бретон: Рекордно ниво на инфлација во светот првпат од почетокот на векот

Порастот на инфлацијата е глобален и достигна рекордно ниво од почетокот на 21. век, предупреди еврокомесарот за внатрешен пазар Тиери Бретон во интервју за францускиот информативен канал ЛЦИ (LCI).

– Првпат од почетокот на векот гледаме такво ниво на инфлација. Тоа е глобален феномен, посилен во САД, отколку во Европа, истакна Бретон.

Како што тој додаде, последен пат слична инфлација имало пред 40 години, во 80-те години на минатиот век.

Еврокомесарот забележа оти инфлацијата почнала да се зголемува уште пред конфликтот во Украина.

– Пандемијата на коронавирусот, забрзувањето на економското закрепнување, цените на енергијата, суровините и ретките метали – како резултат на овие фактори, инфлацискиот тренд беше силен уште пред почетокот на украинскиот конфликт. Инфлацијата е особено распространета во САД и многу тешко е да се контролира, смета Бретон.

Еден од начините за ограничување, според него, е да се зголемат банкарските камати, што веќе се случува во САД.

Просечната годишна стапка на инфлација во светот веќе е 7,4 отсто, според францускиот портал Статиста (Statista). Но, во некои земји процентот на инфлација може да биде значително повисок, поради локални фактори. Вкупната стапка на инфлација во речиси 80 земји може да се движи од пет до 10 отсто во текот на годината, пишува Статиста.

Ковачевски: Не закажувам јас седници

Не закажувам јас седници, ниту можам да му наредам на Собранието како ќе го спроведува Етичкиот кодекс.

Вие бегате од прашање, а не јас од одговор, затоа што наместо вие да му го поставите прашањето на претседателот на Собранието, ми го поставувате мене, а јас не сум негов портпарол, рече премиерот Димитар Ковачевски одговарајќи на пратеничко прашање од Драган Ковачки.

Пратеникот од ВМРО-ДПМНЕ го повика претседателот на Владата да го осуди однесувањето на Талат Џафери кон собраниските служби бидејќи на прес-конференција на новинарите веќе им признал дека на телевизиската снимка од 11 мај е неговиот глас и нема сомнежи околу автентичноста на снимката. Праша и зошто неговиот сопартиец од СДСМ Панчо Минов не ја закажува седницата на Комисијата за деловнички и мандатно-имунитетни прашања по пријавата од пред две недели на ВМРО-ДПМНЕ за однесувањето на Џафери.

-Доколку не побарате од Минов да свика седница, а од Талат Џафери оставка, ќе покажете дека Етичкиот кодекс е мртов и дека повеќе не важи, рече Ковачки на седница посветена на пратенички прашања.

Претседателот на Владата Ковачевски во одговорот рече дека пристојноста во однесувањето нему му значи и тоа, рече, зависи лично од секој човек на кој начин комуницира и е предмет на етичките стандарди кон кои се придржува. Во однос на барањето за седница на Комисијата, одговори дека голем број седници на собраниските тела се откажани поради бојкотот на опозицијата и дека парламентарните седници не ги закажува премиерот.

-Уште првиот пат кога дадов изјава, реков дека не можам да му наредувам на Собранието на кој начин ќе го спроведува Етичкиот кодекс на однесување, туку за тоа постои соодветна Комисија. Исто така, не може на пратениците некој од надвор да им ги закажува седниците. Поради бојкотот на опозицијата во Собранието, голем број седници се откажани и голем број законски решенија не се носат. Ако може премиер да се јавува и тогаш веднаш да ги закажуваат седниците, тогаш да воспоставивме таква пракса. Но не може закажување на некоја седница, а на некоја не, да биде исклучок само затоа што некому тоа му одговара, рече Ковачевски.

Незадоволен од одговорот, пратеникот Ковачки рече дека премиерот Ковачевски „демонстрира класичен мазохизам и покажува дека е уценет".

-Не осудувате и се обидувате да релативизирате. Имате потврда од самиот Талат Џафери и треба да се одважите да го осудите овој чин, а не да поддржувате нецивилизирано однесување, рече Ковачки.

На говорот на премиерот процедурално реагираше Никола Мицевски, координатор на ВМРО-ДПМНЕ, кој рече дека Ковачевски изнел неточни факти за блокада на опозицијата. Рече дека активна блокада подразбира дека вчера работеле од 11 до 23 часот и дискутирале и пратеници на ВМРО-ДПМНЕ и коалицијата.

-Таа активна блокада ќе ја имате, нефункционирање на Собранието и незакажување седници ќе го барате во своите редови и за тоа не ја обвинувајте ја опозицијата, рече Мицевски, додавајќи дека не дошле на ред да се разгледаат две интерпелации што ги поднеле – за Бојан Маричиќ и за Љупчо Николовски.

Ковачки го праша премиерот и дали смета дека Талат Џафери е опасност/закана за национална безбедност зашто, како што рече, криел дека на средба со претставници на Европскиот муслимански форум минатата година присуствувал и Чеченецот Абдул Вајед Нијазов поранешен пратеник во руската Дума кој е поддржувач на претседателот на Русија Владимир Путин т.е. дека Џафери се сретнал со „лица кои се од безбедносен карактер".

-Како може да не ве интересира со кого се среќава вториот човек на државата и дали некој му наметнал да се среќава со нив, рече Ковачки и праша и дали премиерот знае кој иницирал изградба на споменик на Ахмат Кадиров во Тетово.

Премиерот одговори дека на 8 јули претседателот на Собранието имал средба со делегација на Европскиот муслимански форум во кој биле претставници од различни земји и дека содржината на разговорот на мултилатерално ниво како и секогаш, рече, е објавена во веста на веб-страницата на Собранието.

-Пред одржувањето на средбата, според вообичаената пракса, Собранието добива и позитивно мислење од МНР на Македонија и информација дека делегацијата е примена од страна на домаќинот кој треба да ги прими. Вакви средби на претставници на Европскиот муслимански форум имале и други државници во регионот, а во 2018 истиот форум бил гостин и кај претседателот на Република Македонија во тоа време. Кога Европа и светот одржуваат конференции за борба со лажни вести и дезинформации, не е убаво нешто што е објавено и за што постојат записи и што било во минатото да се пласира како сензација која е навистина неточна и има за цел да нанесе штета, прво во Собранието, а и штета на државата, истакна Ковачевски.

Џафери кон ова додаде дека биле известени сите институции и јавноста преку медиумите.

–Така што, вие може да зборувате по однос на ова прашање што сакате, рече претседателот на Собранието.

Во однос на коментарите на социјалните мрежи за одењето на ќерката на премиерот на аудиенцијата кај папата во Рим, Ковачевски рече дека не се пречекорени протоколите и дека не е невообичаено државникот да поведе по свој избор кој било член од семејството. Такви примери, рече, имало и порано кај нас и во светот и дека и тој што го придружува искажува почит и чест кон домаќинот.

притисни ентер