Според GLOBSEC, организаторот на форумот, BELTALKS е посветен на зајакнување на соработката и конкурентноста низ цела Европа и преку инклузивен дијалог и практична соработка, BELTALKS има за цел да ја подобри кохерентноста на политиките и конкурентноста, нудејќи нови можности за усогласување со Планот за раст на ЕУ и Договорот за чиста индустрија. Форумот се темели директно на неодамнешните ангажмани на високо ниво во Белград, вклучувајќи ги и состаноците предводени од претседателката на Европската комисија, Урсула фон дер Лајен, и претседателот на Европскиот совет, Антонио Кошта, кои се фокусираат на растот на Западен Балкан и регионалната енергетска соработка.

„BELTALKS: Белградски економски разговори“ ќе собере повеќе од 150 меѓународни учесници оваа година, вклучувајќи високи претставници на ЕУ, владини претставници, бизнис лидери и експерти од ЕУ и земјите кандидати.

Дискусиите ќе се фокусираат на клучните економски предизвици и можности во регионот, нагласувајќи ја практичната соработка во средина што брзо се менува.

Организатор е GLOBSEC, во соработка со британската амбасада во Белград, француската амбасада во Србија, италијанската амбасада во Белград, Фондацијата Конрад Аденауер, Пријатели на Европа и други европски партнери.

GLOBSEC е глобален тинк-тенк посветен на унапредување на безбедноста, просперитетот и одржливоста во Европа и низ целиот свет.

„Во последниве години, Белград се етаблираше како економски центар на гравитација на Западен Балкан, привлекувајќи значајни европски инвестиции и станувајќи седиште на се поголем број меѓународни компании. Таа економска трансформација го направи Белград природна платформа за дијалог за конкурентната иднина на Европа. Сепак, подемот на градот го привлече вниманието и на други глобални актери - Русија и Кина го проширија своето економско присуство, создавајќи притисок врз регионот чија економска иднина и безбедност фундаментално зависат од подлабока интеграција со ЕУ“, се наведува на веб-страницата на GLOBSEC.

Извршниот директор на GLOBSEC, Даниел Браун, изјави дека Западен Балкан е дел од конкурентната иднина на Европа и дека BELTALKS покажува дека европските институции и економијата стојат зад тоа верување преку континуирано присуство и партнерство.

Конференцијата BELTALKS се занимава со предизвици како што се „како регионот може да ги диверзифицира изворите на енергија и да ја намали зависноста од рускиот гас, а воедно да ја модернизира енергетската инфраструктура“ и „каква улога треба да играат регионалните иницијативи како што е Заедничкиот регионален пазар во подготовките за членство во ЕУ“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.