Здравје

Во „8-ми Септември“ ќе се вршат амбулантски консултативни прегледи и онколошки терапии

Денеска ги посетивме амбулантите за онкологија во „8 Септември“, како и дневната амбуланта која што би требало да функционира за неколку недели.

Министерот за здравство Арбен Таравари кој денеска беше во посета на амбулантите за онкологија во Градската општа болница „8-ми Септември“ изјави дека има решение од Министерството кое помина како одлука на Влада, да можат и во оваа болница да се вршат амбулантски консултативни прегледи. Тој напомена дека во „8-ми Септември“ веќе се вработени двајца онколози и може да се изврши полесна онколошка терапија.

-Денеска ги посетивме амбулантите за онкологија во „8 Септември“, како и дневната амбуланта која што би требало да функционира за неколку недели. Го видовме и акцелераторот којшто моментално не е во функција, но мислам дека може да се стави во функција. Ќе кажеме дека дефинитивно има решение од Министерството за здравство кое е поминато како одлука на Влада за да можат амублантски консултативни прегледи да се вршат во ГОБ „8-ми Септември“. Се надевам дека набргу и на Фондот ќе поминеме да има условен буџет, изјави Тараври по посетата.

Тој најави дека ќе ги посети и општите болници во Битола и во Тетово. Напомена дека во меѓувреме ќе треба да има договор меѓу Клиниката за онкологија и ГОБ „8 Септември“ согласно кој онколошките пациенти би можеле да примаат терапија во „8-ми Септември, за да се растерети Клиниката за онкологија.

-Имаме децентрализација во здравството. Секако, во меѓувреме ќе треба Клиниката за онкологија да има договор со ГОБ „8 Септември“ за ова некако да биде под контрола на Клиничка за онкологија, зборувам за онколошки пациенти. Можам да кажам дека барем за месец дена, одредена терапија ќе започнат да примаат пациенти во „8-ми Септември“ со што делумно ќе ја растеретиме Клиниката за онкологија, рече Таравари.

Тој посочи дека денеска ги посетил и хируршките сали во „8-ми Септември“, за кои потенцираше дека се наоѓаат во незавидна состојба и дека треба да се интервенира. Како што напомена, за ова ќе се разговара и согласно буџетот за 2025 година, приротет освен салите во Клинички центар да бидат и салите во „8 Септември.

Таравари потенцираше дека добил информации за недостиг на среден медицински кадар, но и специјалистички кадар.

-Се надевам дека според програмата која што ја планираме до крајот на годината ќе можеме да вработиме и одреден број на медицински сестри и среден медицински персонал, но и одредени специјализанти онаму каде што има дефицит. Тоа значи дека оние кои што се на четврта, петта или шеста година од специјализација ќе можеме да ги распределиме во болниците каде што има недостиг на кадар, додаде Таравари.

За шест месеци во функција акцелераторот во ГОБ „8 Септември“, најавува Таравари.

Акцелераторот во ГОБ „8 Септември“ се очекува да профункционира за шест месеци откако ќе завршат потребните подготовки, најави денеска министерот за здравство Арбен Таравари.

- За акцелераторот ни треба време, најмалку околу три месеци за да се направат одредени контроли од специјалисти по таа област, да ни кажат што недостасува и што треба да се инвестира. Не би рекол дека пред шест месеци би можеле да го ставиме во функција акцелераторот. Состојбата изгледа добра таму каде што е поставен акцелераторот, ние ќе дојдеме да го промовираме откако ќе бидат третирани двајца или тројца пациенти. Меѓутоа, дајте ни рок, барем шест месеци да ги направиме сите потребни подготовки за да може да функционира, рече Таравари на новинарско прашање по посетата на ГОБ „8 Септември“.

За акцелераторите во болниците во Штип и Битола, рече дека ќе може да информира по посетите на двете болници.

-За штипскиот се уште немам информација. Мислам дека е нефункционален. Меѓутоа, дајте ми време да ја посетам болницата и да видам, а во Битола се надевам дека за две недели ќе бидеме таму. И таму акцелераторот не функционира, меѓутоа амбулантата за среќа функционира. Да видиме што може од она што е останато да ставиме во функција, рече Таравари.

Тој потврди дека стои на ветувањето дека сите податоци што ќе бидат собрани за акцелераторите, ќе бидат доставени до Обвинителството кое ќе треба да провери дали има основ за кривично дело.

– Работат службите во Министерството. За „8 Септември“ немав точни информации, тој е употреблив, само останува за Штип да видиме и за Битола. Во Битола е користен колку што знам, и сега ќе видиме колку може повторно да се активира, меѓутоа сите податоци ќе ги испратиме на крај онаму каде што треба. Тоа ни е обврска, рече Тараври.

Акцелераторите за ГОБ „8 Септември“ и за болниците во Штип и Битола, вредни милионски суми, беа набавени пред околу една деценија, но досега воопшто не беа ставени во функција. Со набавката и ставањето во функција на овие медицински апарати треба да се овозможи пациентите болни од рак кои живеат во внатрешноста, да не мора да патуваат до Скопје за да примат радиотерапија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Талески до Савески: Зошто нема истрага за Алта банка за Мицкоски, Славески и Кочовски?

Пратеникот на СДСМ, Миле Талески, на денешната надзорна расправа за Алта банка во Собранието побара од јавниот обвинител Савески конкретни одговори дали е оформен предмет.

Пратеникот на СДСМ, Миле Талески, на денешната надзорна расправа за Алта банка во Собранието побара од јавниот обвинител Савески конкретни одговори дали е оформен предмет, дали се преземени предистражни дејства и дали ќе се испитува евентуалната кривична одговорност на премиерот Христијан Мицкоски, гувернерот Трајко Славески и министерката за финансии, доколку доказите укажуваат на нивна одговорност.

„Господин јавен обвинител Савески, што повеќе треба да се случи за вие и вашето обвинителство да преземете конкретни предистражни дејства пред евентуални штети да станат уште поголеми? Дали Христијан Мицкоски, како што милува да ви кажува и да ви сугерира по телефон, и за овие работи ви се меша во вашата работа?“, праша Талески.

Тој потсети дека при изборот Савески се обврзал обвинителската функција да ја врши совесно, непристрасно и одговорно. Според Талески, повеќемесечните предупредувања за потеклото на капиталот на Алта банка бараат конкретно постапување, а не само следење на состојбите.

„Вашата функција не ви дава право селективно да одлучувате кои сомнежи заслужуваат внимание, а кои ќе ги оставите да чекаат“, нагласи Талески.

Пратеникот посочи дека граѓаните се соочуваат со страв и неизвесност околу пристапот до сопствените средства, додека носителите на највисоките функции ја префрлаат одговорноста меѓу себе.

„Имаме гувернер, министерка за финансии, премиер кои јавно си ја префрлаат одговорноста за тоа кој знаел, кој требало да знае и кој не знаел за влезот и работењето на оваа банка. И покрај сето ова, вие пред јавноста изјавувате дека обвинителството ја следи ситуацијата. Тоа и сега го потврдивте, но дека сè уште е рано да се зборува за формална истрага“, рече Талески.

Тој побара да се испитаат потеклото на капиталот, сопственичката структура, поврзаните лица и финансиските трансакции, како и евентуалните сомнителни трансфери меѓу Србија и Македонија. Дополнително, побара проверка на постапувањето на Народната банка и на евентуалното политичко влијание врз нејзините одлуки.

„Дали ќе го испитате постапувањето на гувернерот Трајко Славески? Дали при преземањето на банката биле исполнети сите законски услови? Дали Народна банка навремено ги утврдила ризиците и дали презела соодветни мерки? Дали ќе ја испитате комуникацијата на Народна банка и Владата, како и евентуалното политичко влијание врз одлуките на регулаторот“, праша Талески.

Особено ја нагласи потребата од навремено обезбедување на документацијата и финансиските траги, предупредувајќи дека одложувањето може да го отежни утврдувањето на вистината.

„Дали се обезбедени сите документи, електронска комуникација, банкарска документација и финансиски траги? Дали се преземени мерки за да не бидат уништени или прикриени доказите? Дали е побарана соработка со српските правосудни органи? Затоа што секој ден на неоправдано одолговлекување може да се зголеми ризикот од губење на докази и да се отежни утврдувањето на вистината“, истакна Талески.

На крајот, тој побара јасен одговор дали обвинителството е подготвено да постапува неселективно и да ја испита одговорноста на сите вклучени, независно од нивната функција.

„Дали сте подготвени да ја испитате евентуалната кривична одговорност на гувернерот Трајко Славески, министерката за финансии и премиерот Христијан Мицкоски, доколку доказите укажуваат на нивна одговорност? Дали сте подготвени да покажете дека во оваа држава нема недопирливи функционери?“, порача пратеникот на СДСМ, Миле Талески, се наведува во партиското соопштение.

Македонија

Сиљановска-Давкова – Ван дер Белен: Австрија останува важен и искрен поддржувач на македонскиот евроинтеграциски пат

Претседателката Гордана Сиљановска-Давкова, оствари средба со претседателот на Република Австрија, Александер Ван дер Белен.

Претседателката Гордана Сиљановска-Давкова, денеска на маргините на Конференцијата на страните на Рамковната конвенција на Обединетите нации за климатски промени (COP31) во Анталија, оствари средба со претседателот на Република Австрија, Александер Ван дер Белен.

Во разговорот беа потврдени одличните македонско-австриски односи, втемелени врз заемна почит, пријателство и соработка, како и врз споделени европски вредности.

Таа изрази благодарност за принципиелната поддршка од Австрија на македонскиот евроинтегративен пат и за нејзината посветеност кон стабилноста, безбедноста и европската перспектива на Западен Балкан.

Соговорниците разменија мислења за иднината на европскиот проект и процесот на проширување на Европската Унија, при што беше нагласено дека неговата кредибилност се гради врз јасни правила, еднакви критериуми и заслуги, а европската перспектива мора да остане реална и достижна за земјите кандидатки.

Сиљановска-Давкова истакна дека проширувањето не е само политичко и економско прашање, туку и безбедносно, особено во време на геополитички тензии коишто се закана за мирот во Европа.

Обајцата укажаа на можностите за продлабочување на македонско-австриската соработка во економијата, енергетиката, климатските политики, образованието и културата.

На средбата беше изразена подготвеност за интензивирање на политичкиот дијалог на највисоко ниво, а како конкретен чекор во таа насока беше договорено да се реализира официјална средба меѓу двајцата претседатели, соопштуваат од Кабинетот.

Европа

Милиони Шпанци на улиците- прв генерален штрајк по 14 години против станбената криза

Милиони луѓе ширум Шпанија учествуваа во првиот генерален штрајк во земјата во последните 14 години, организирајќи протестни бдеења поради зголемените цени на становите, пред изборите на кои екстремната десница би можела да дојде до власт.

Главната причина за денешниот прекин на работата на национално ниво, кој беше заеднички поддржан од најголемите шпански синдикати и здруженија на станари, е отпорот кон продлабочената станбена криза во Шпанија.

Сандра Мора од Здружението на станари во Мадрид изјави за радиото RNE: „Исклучително е важно да се потсетиме на луѓето дека ние, работниците, кои исто така сме станари или плаќаме станбени кредити, сме тие кои имаат моќ да го запреме производството и да ја парализираме економијата“.

Синдикатите известија за голем одзив на штрајкот во неколку сектори, вклучително и 90 отсто од работниците во автомобилската индустрија и пристаништата и 82 отсто од работниците во секторот за собирање отпад. Сепак, тие изјавија дека учеството не било еднообразно низ целата земја. Најголема поддршка е забележана во крајбрежните региони, како Каталонија и Андалузија, каде што е особено изразен растот на цената на становите.

Според извештаите, многу училишта и универзитети биле затворени или работеле со минимален капацитет. Во Мадрид на штрајкот се приклучија просветните работници кој протестираат речиси еден месец, а кој е инициран поради барањата за подобрување на условите за работа, пишува The Guardian.

Во Барселона, работниците поставија блокади на патиштата, на некои места користејќи запалени гуми, додека јавниот превоз речиси целосно запре. Во Мадрид избувнаа судири меѓу демонстрантите и полицијата во близина на главниот пазар на големо во земјата, додека демонстрантите турнаа големи корпи за рециклирање на улиците за да го блокираат сообраќајот. До средата напладне, владините претставници соопштија дека 27 лица биле уапсени низ целата земја поради помали инциденти.

Плановите за попладневните протестни маршеви низ земјата беа загрозени од невремето, откако шпанската државна метеоролошка агенција издаде 14 предупредувања за две бури кои се очекуваат да донесат силен ветер, немирно море и обилни врнежи.

Незадоволството кај Шпанците поради вртоглавото зголемување на цените на становите , кои се наталожуваа со години, избувна во јавноста во септември, откако 87-годишната Марикармен Абаскал, која живееше во куќата повеќе од седум децении, беше иселена од нејзиниот дом.

Како што избувнаа протести и се појавија протестни кампови ширум Шпанија, вниманието на јавноста беше насочено кон пазарот каде што недвижниот имот се повеќе се користи за изнајмување туристи, како шпекулативен имот и за краткорочно изнајмување. Тоа доведе до зголемување на кириите за 80 отсто за десет години, додека цените на становите и куќите се зголемија за 63 отсто.

Пред денешниот штрајк, Здружението на станари од Гранада се обиде да ја истакне оваа поврзаност со организирање акција во најпосетуваните туристички области во градот, каде што оштети околу 300 кутии со клучеви што ги користеа сопствениците на сместувачките капацитети за краткорочно изнајмување.

„Не за капиталистите, не за барателите на кирии, не за нивните соучесници“, објави организацијата на социјалните мрежи, заедно со фотографии од кутии со клучеви со посебни потреби.

Активистите за станбени права и синдикатите ја повикаа владата да преземе порешителни мерки за да интервенира на пазарот. Здруженијата на станари бараат мерки како што се ограничување на иселувањето на ранливите луѓе, замрзнување на кириите и сузбивање на краткорочното изнајмување на станови.

Унај Сордо, водач на една од најголемите синдикални организации во земјата, Работничките комисии, изјави за радио станицата Кадена Сер: „Постои едно прашање што ја дели земјата: борбата за пристап до домување“.

Во Шпанија, вонредните парламентарни избори се најавени за 29 ноември. Предвременото гласање го свика социјалистичкиот премиер Педро Санчез, откако десничарските партии го поразија законот за вонредни состојби чија цел беше да се реши станбената криза.

Тагови: Шпанци штрајк