Со години запуштен, а некогаш симбол на модерно Скопје и бруталистичката архитектура, надеж за спас на објектот на Централната пошта во Скопје влеваат најавите за негова реконструкција во рамки на програмата „Скопје – европска престолнина на културата 2028“. Според најавите на градоначалникот Орце Ѓорѓиевски, во тек е постапка за предавање на владението на објектот од Владата на Град Скопје, по што треба да започне неговата реконструкција и пренамена во Младински центар.

Објектот на Централната пошта беше значително оштетен во пожарот кој го зафати во 2013тата година, по што во 2021 година се најде и на листата на 7 најзагрозени споменици во Европа. Сега до 2028 година се очекува да стане Младински центар, во рамки на проектот Скопје европска претстолнина на културата.

Координаторот на проектот Лазе Трипков објаснува дека, доколку процесот се одвива според планот, Центарот би можел да започне со работа во 2028 година, каде ќе се одржуваат научно-истражувачки настани од областа на иновациите, технологијата и вештачката интелигенција. Целта, според него, е ваквите објекти да останат трајно наследство и по 2028 година и да продолжат да се користат од идните генерации.

„Поштата е тој сегмент кој што е значаен, нас ни е многу драго и многу ни е важно бидејки тоа е централно средиште едно, во кое што транформацијата природно која ќе се одбележи може да се предаде и да остане на вистинското место заради тоа што една од категориите на наследство се младите и иднината на младите. “

Во рамки на програмата се предвидува активирање и на други значајни објекти, меѓу кои Универзалната сала, скопското Кале, како и аквадуктот, кој ќе биде пренаменет во летна арена. Дополнително, се очекува соработка со сите општини во Скопје, со цел културните содржини да бидат подеднакво достапни за граѓаните.

„Секогаш се артикулира центарот на градот многу повеќе во тие процеси. Ние сметаме дека она што треба да дојде како слоевитост е исто така и вклучувањето на сите општини во Град Скопје, кој е составен од 10 општини кои што заедно партиципираат како една целина. Одвојувањето, десеминацијата на различните сегменти на култура во конзумирањето на сите 10 општини треба подеднакво да биде застапено.“

Иако времето претставува голем предизвик, Трипков уверува дека проектот ќе биде реализиран успешно. Тој додава дека интересот за учество во програмата е голем, а до сега се пристигнати стотици апликации, дел од нив и од европски земји.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.