Економија

Владата го усвои предлог ребелансот на буџетот, се крати и на приходите и на расходите

Помалку приходи и расходи, но без промена на буџетскиот дефицит.

Со вториот ребаланс, Владата ги намалува и приходите и расходите за по 86 милиони евра, поради како што посочи министерката за финансии Гордана Димитриеска-Кочоска, променетите услови на енергетските пазари и мерките за поевтини горива. Приходите се коригираат од 6,17 на 6,08 милијарди евра, главно поради намалените акцизи, кои паѓаат од 554 на 494 милиони евра. Расходите се намалуваат на 6,84 милијарди евра, при што најголеми кратења има кај капиталните расходи, односно кај проекти што доцнат или се уште не се започнати. Најмногу средства се кратат од Министерството за животна средина и од енергетика, додека истовремено дел од нив се пренасочуваат кон социјалната политика и здравството.

-Обезбедуваме стабилен буџет, редовно финансирање на сите обврски и заштита на граѓаните. Правиме корекции таму каде што се неопходни, штедиме таму каде што можеме, но продолжуваме да инвестираме таму каде што е најважно за идниот економски раст. Овој ребаланс не е чекор назад. Тој е навремена адаптација на буџетот на новите услови и потврда дека остануваме посветени на стабилни јавни финансии, заштита на животниот стандард и продолжување на економскиот раст,- Гордана Димитриеска – Кочоска – министерка за финансии.

Димитриеска-Кочоска потврди и дека пред два дена државата се задолжила со 150 милиони евра, наместо 250 милиони колку што претходно било објавено. Задолжувањето е направено со камата од 5,25 проценти, а како што посочи министерката, тоа е веќе предвидено во проекциите од првиот ребаланс и не ги менува проекциите за јавниот долг. Парите, вели, се потребни за сервисирање на обврските кои доспеваат до крајот на годината, односно за отплата на главница и камата.

- Каматата е некаде уште 100 милиони евра за исплата до крајот на годината, 54 милиони евра некаде е главницата. Така што овој износ отприлика ќе го користиме за да го дофинансираме тој дел. До крајот на годината се планирани одредени задолжувања во рамки, како што кажав, не на овој ребаланс, во суштина на првиот ребаланс, каде што ќе треба одредено рефинансирање доспеваат одредени кредити, ќе се задолжуваме за да ги вратиме тие кредити. Така што она што значи отплата на долговите мора да го иссервисираме,- Гордана Димитриеска – Кочоска – министерка за финансии.

Со вториот ребаланс, непроменет останува буџетскиот дефицит, со околу 753 милиони евра или 4,1% од БДП. Непроменета останува и проектијата за економски раст од 3,5%, додека прогнозата за инфлацијата е намалена од 4,5 на 3,8%. Димитриеска- кочоска не ја исклучува можноста за нова прераспределба на средства до крајот на годината, онаму каде институциите нема да ги реализираат планираните средства.

Тагови: ребаланс на Буџетот

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Осуден е швајцарскиот фудбалер Гранит Џака

Фудбалерот Гранит Џака е казнет со условна парична казна од 150.000 швајцарски франци поради случај поврзан со фалсификувана потврда за ковид.

Оваа пресуда на швајцарското обвинителство во Луцерн ја обелодени самиот капитен на репрезентацијата, нагласувајќи дека целосно го прифаќа исходот од правниот процес.

Санкцијата се формулира преку 50 дневни тарифи во износ од по 3.000 франци, со рок на верификација од 24 месеци. Доколку во тој период не го прекрши законот, финансиската обврска нема да се активира, додека судските трошоци се веќе подмирени. По завршувањето на овој случај, играчот се огласи преку социјалните мрежи:

- Пред неколку недели лично се огласив овде и кажав дека ја преземам одговорноста за мојата одлука. Јас стојам на тоа. Откако дадов целосен исказ во јавното обвинителство, обвинителот сега донесе одлука. Бев осуден на условна парична казна од 50 дневни износи од по 3.000 швајцарски франци, со условна казна од две години. Тоа значи дека казната нема да се изврши доколку во тој период не сторам ново кривично дело. Јас веќе ги платив трошоците за постапката. Ја прифаќам одлуката и преземам одговорност. Ви благодариме за многуте пораки за поддршка во изминатите неколку недели. Многу ми значат - изјави фудбалерот.

За потсетување, оваа афера до медиумите стигна во средината на септември кога весникот „Блик“ ја објави веста за покренување на истрагата. Неколку дена подоцна, спортистот призна дека во текот на 2022 година добил неправилна потврда, оправдувајќи ја со моменти на страв и сомнеж во врска со имунизацијата.

Тагови: Гранит Џака

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Муцунски се сретна со бугарската шефица на дипломатијата, Петрова-Чамова, коридорот VIII во фокусот

Министерот за надворешни работи и надворешна трговија, Тимчо Муцунски, оствари билатерална средба со министерката за надворешни работи на Република Бугарија, Велислава Петрова-Чамова.

На маргините на Меѓународната конференција за Коридорот VIII, што денеска се одржа во Софија, министерот за надворешни работи и надворешна трговија, Тимчо Муцунски, оствари билатерална средба со министерката за надворешни работи на Република Бугарија, Велислава Петрова-Чамова.

Министерот Муцунски ја оцени средбата како конструктивна и одржана во позитивен дух, притоа нагласувајќи дека позициите на двете страни и натаму остануваат значително оддалечени.

Во однос на европската интеграција, Муцунски посочи дека меѓу двете страни постои висок степен на недоверба, која, од наша перспектива, е поврзана со предвидливоста на процесот и со досегашното искуство со билатералните барања.

„Нашите позиции се апсолутно јасни. Стратешки интерес и на Бугарија е ние да се движиме напред по европскиот пат. Но, ние сме земја која низ годините постојано се соочувала со билатерални барања. Кога ќе се затворело едно билатерално прашање, потоа се отворало ново“, истакна Муцунски.

На средбата беше разговарано и за продолжување на дијалогот меѓу двете држави во периодот што следи, при што беше потврдена подготвеноста комуникацијата да продолжи и покрај постојните разлики во позициите.

Министерот нагласи дека прашањата поврзани со идентитетот, историјата и културата не смеат да претставуваат пречка на европскиот пат. Тој истакна дека без дијалог не може да се дојде до решение, но и дека самиот дијалог не е гаранција за надминување на разликите, соопштуваат од МНРиНТ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Пукотница пред Градско собрание во Германија- полицијата го неутрализира напаѓачот

Градското собрание во германскиот град Тутлинген е опколено, а пошироката област околу зградата е блокирана.

Полицијата распореди сили околу градското собрание, а денеска околу пладне потврди дека имало „употреба на огнено оружје“. Според весникот „Билд“, полицајците пукале во лице кое претходно наводно го извадило своето оружје.

Криминалната полиција на Германија од Баден-Виртемберг ја презеде истрагата. Портпаролката Александра Вишер изјави за „Билд“ дека засега можат само да потврдат дека полицијата употребила огнено оружје и дека едно лице е погодено. Полицијата сè уште не објавила дали повредениот им подлегнал на повредите. Вишер најави дека повеќе информации ќе бидат познати во текот на денот.

Сè уште не е официјално потврдено што точно се случило пред градското собрание на улицата Хелферајшер. Весникот „Швабише“, повикувајќи се на сведоци, наведува дека лице со оружје претходно било пред зградата или во самата зграда.

Тешко вооружени полицајци во заштитна опрема потоа пристигнале на местото на настанот. Сведоци на пукотницата му кажале на порталот дека слушнале вкупно пет истрели. Полицијата ги предупредила граѓаните преку WhatsApp да ја избегнуваат областа.

Тагови: Германија пукотница

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.