Вирусот што го убива ракот за прв пат е тестиран на луѓе и покажува одлични резултати

Медицината секој ден сѐ повеќе напредува, а тоа го покажуваат истражувањата на научниците кои постојано доаѓаат до нови откритија.

Овој пат добри вести доаѓаат од Велика Британија, каде што научниците дошле до неверојатно откритие - вирус кој во иднина би можел да лекува рак.

Новиот тип на терапија, која што користи вирус чија цел е да ги уништи клетките на ракот, покажала позитивни резултати на првите тестови кај луѓето, потврдија научниците. Кај еден пациент ракот целосно исчезнал, додека кај други се намалил. Лекот што се користи е всушност ослабена форма на вирусот на херпес симплекс модифициран да убива тумори, јавува Би-Би-Си.

Кшиштоф Војковски, 39-годишен градежен работник, е еден од пациентите кои учествувале во првата фаза од испитувањето. Тој објаснува дека во 2017 година му бил дијагностициран рак на плунковните жлезди и покрај операцијата и другите третмани на кои бил подложен, неговиот рак не се намалил, туку продолжил да расте.

"Лекарите ми рекоа дека нема повеќе опции за мене, дека нема решение. Ме советуваа да се откажам, но тоа беше поразително за мене. Ниту една секунда не размислував кога ме поканија да се приклучам на истражувањето. Немав што повеќе да изгубам“, изјави Војковски, кој добил одлична вест по краткото лекување. Неговиот рак го нема.

„Примав инјекции на секои две недели во период од пет недели кои целосно ми го искоренија ракот. Сега веќе две години сум без рак“, додава тој.

Инјекциите кои се инјектираат директно во туморот го напаѓаат ракот на два начина - со инвазија на канцерогените клетки, што предизвикува нивно распаѓање и со активирање на имунолошкиот систем. Во споменатото истражување учествувале околу 40 пациенти, некои ја примиле самата вирусна инјекција, додека други добиле друг лек против рак наречен Ниволумаб.

Авторот и водач на студијата, професорот Кевин Харингтон од Универзитетот во Лондон, изјави за Би-Би-Си дека одговорот на телото на терапијата е „навистина импресивен“ во различни фази на рак, без разлика дали е тоа почетна форма или веќе напреднат.

Северна Кореја истрела неколку артилериски проектили

 Северна Кореја денеска истрела повеќе артилериски проектили во морето како одговор на вежбите на Јужна Кореја долж границата, јави новинската агенција КЦНА.

Ова следува еден ден откако Северна Кореја соопшти дека истрелала повеќе од 130 проектили во морето, од кои некои паднале во тампон зоната меѓу двете Кореи.

Сеул тврди дека ова е кршење на меѓукорејскиот договор за деескалација од 2018 година.

Јужнокорејските и американските трупи од вчера спроведуваат воени вежби во близина на границата, велејќи дека тие се неопходни за одвраќање на Северна Кореја, која тестира рекорден број проектили оваа година и ги продолжува подготовките за првата нуклеарна проба од 2017 година.

Пјонгјанг накратко ги критикуваше заедничките вежби како провокативни и доказ за непријателската политика на Сеул и Вашингтон.

Ковачевски на Самитот Западен Балкан-ЕУ во Тирана

На Самитот е предвидено земјите од Западен Балкан со ЕУ да потпишат декларација за зајакнување на соработката во повеќе сегменти со што се обезбедува подобри услови и бенефиции за граѓаните од земјите од Западен Балкан.

Премиерот Димитар Ковачевски, заедно со лидерите од Западен Балкан, денеска ќе учествува и ќе говори на Самитот за Западен Балкан-Европска Унија во Тирана, Албанија, посветен на справување со последиците од руската инвазија врз Украина, зајакнување на безбедноста и градење отпорност кон странското мешање, одговор на предизвиците од миграцијата, борбата против тероризмот и организираниот криминал.

Ова е прв самит меѓу Унијата и Западен Балкан што се одржува во земја која не е членка на Унијата.

Учесниците на Самитот ќе ги пречека премиерот на Албанија Еди Рама, а најавено е присуство на високите европски претставници, претседателот на Советот на ЕУ Шарл Мишел и претседателката на Европската комисија Урсула Фон Дер Лаjен, како и премиерите на Белгија, Луксембург и други европски земји.

На Самитот е предвидено земјите од Западен Балкан со ЕУ да потпишат декларација за зајакнување на соработката во повеќе сегменти со што се обезбедува подобри услови и бенефиции за граѓаните од земјите од Западен Балкан.

Премиерот Ковачевски на Самитот во Тирана ќе учествува и на две панел дискусии на кои фокусот ќе биде европската перспектива на земјите од Западен Балкан, обезбедувањето на демократија, мир и слобода, како и тесната соработка помеѓу земјите во заедничкото справување со предизвиците наметнати од економската и енергетската криза.

Во состав на владината делегација предводена од премиерот Ковачевски во Тирана се и вицепремиерот задолжен за европски прашања Бојан Маричиќ и министерот за надворешни работи Бујар Османи.

Вчера албанскиот премиер Еди Рама изјави дека самитот Западен Балкан – Европска Унија во Тирана го покажува зголемениот геостратешки интерес на ЕУ за тој регион за време на војната меѓу Русија и Украина.

Според Рама, војната во Украина потсетува на ранливоста на регионот и ѝ даде поттик на ЕУ да ги внесе нациите од Западен Балкан во ЕУ. Додава дека блокот треба особено да работи „тесно со Србија“, која не се приклучи на воените санкции на ЕУ за Русија за време на војната.

Во рамки на Самитот, телекомуникациските оператори од земјите од ЕУ и Западен Балкан ќе потпишат Декларација со која ќе се овозможи намалување на цените за роаминг меѓу ЕУ и регионот во 2023 година.

Како што најави Советот за регионална соработка (СРС), ова ќе придонесе за намалување на оперативните трошоци на бизнисмените, ќе го поттикне бизнисот надвор од матичните граници и ќе даде дополнителен поттик на туризмот во регионот на Западен Балкан.

Откако стапи во сила регионалниот договор за намалување на цените на роаминг, со кој беше укинат роамингот во Западен Балкан од јули 2021 година, СРС тесно соработува со Европската комисија, операторите од Европската унија и од Западен Балкан, како и со властите од регионот да ги намалат цените на роаминг меѓу ЕУ и регионот, се наведува во соопштението.

СРС потсетува и дека лидерите од Западен Балкан потпишаа три важни договори на почетокот на ноември како дел од Акцискиот план за заедничкиот регионален пазар на Берлинскиот процес – за слобода на движење со лична карта, за признавање на високообразовните квалификации и за признавање на стручни квалификации за доктори по медицина, стоматолози и архитекти.

Продолжуваат протестите на приватните автобуски превозници

Приватните автобуски превозници и денеска продолжуваат со протестите преку блокади на неколку од главните сообраќајни точки во главниот град.

Според досегашните изјави од нивна страна, тие нема да ги отстранат автобусите се додека не се исполнат поставените барања за исплата на долгот што го побаруваат од Град Скопје. Најавија дека блокадите може да се прошират низ повеќе сообраќајни точки во Скопје.

– Како што најавивме, денеска автобусите се паркирани и ќе бидат тука се додека нема напредок од состојбава, односно да не викнат на разговори и да си договориме за динамиката за исплата на заостанатиот долг, да продолжат неделните уплати за да можеме да се вклучиме на линија, се со цел да не трпат граѓаните, изјави вчера за МИА Кемал Муриќ од Слобода превоз.

Во текот на вчерашниот ден, преку објава на социјалните мрежи, Слобода превоз упати извинување до граѓаните на Скопје за попреченото движење низ градот.

– Слобода Превоз во име на сите приватни превозници се извинува до сите граѓани на Скопје кои денеска и се до решавање на проблемот ќе бидат попречени во нивното движење низ градот. Приватните превозници бараат подршка од сите граѓани се со цел побргу да се изнајде решение на проблемот, стои во пораката на Слобода превоз.

Граѓаните во меѓувреме, беа принудени да најдат алтернативи во сообраќајот, но, поради зголемената гужва низ алтернативните улици и булевари, имаше застој во поголемиот дел од сообраќајниците во главниот град, додека дел од граѓаните одбраа да патуваат со велосипеди, тротинети, или пеш кон своите дестинации.

Директорот на Слобода превоз, Ленин Јовановски, во изјава за медиумите кажа дека блокадите на приватните превозници во Скопје продолжуваат сè додека не се седне на маса со градоначалничката Данела Арсовска и не се изнајде законски соодветно решение.

Тој побара и од останатите институции да се вклучат во наоѓање решение за овој проблем и најави дека е можно одредено проширување на протестите.

– Не може граѓаните да не критикуваат нас, треба да го критикуваат изворот на овој проблем, а тоа е кај градоначалничката која дозволи ова да се случи. Не смеат граѓаните да дозволат да имаат ваков градоначалник кој не се грижи за нивниот интерес, рече Јовановски.

Соопшти дека и до „Слобода превоз“ вчера е стигнато известување за раскинување на договорот со Град Скопје, а на прашањето од МИА дали има едногласност од страна на приватните превозници дека нема да се пријават на повикот, Јовановски одговори дека никој од нив не би се пријавил знаејќи дека Градот веќе им должи пари.

– Дали овие превозници на кои веќе им се должи четири месеци ќе се пријават на некој оглас и повторно четири месеци ќе работат и финансираат во бизнисот, за повторно градоначалничката да каже дека не ги исплаќа и да ја тужат. Како може да има јавен повик и да очекува некој да се приклучи на нешто што таа нема намера да го плаќа, изјави Јовановски и додаде дека „е комотна во тој дел бидејќи нејзе финансиски не и влијае тоа и можеби нема да биде градоначалник кога ќе се реши проблемот“.

Заклучи дека приватните превозници одлучно остануваат на протест, ако е потребно ќе ги повикаат и своите деца со цел да допрат до градоначалничката и таа да види дека немаат да им обезбедат соодветен оброк за на училиште.

Град Скопје и градоначалничката Арсовска вчера не излегоа со став во однос на протестите и барањата на приватните автобуски превозници.

Премиерот Димитар Ковачевски од друга страна, обвини дека хаосот што во овој период му се случува на Градот Скопје е, како што рече, само поради неспособноста и бизнис интересите на ВМРО-ДПМНЕ и на нивниот претседател Христијан Мицкоски.

– Граѓаните мора да знаат дека ВМРО-ДПМНЕ ја има градската власт во Скопје. Предлози, односно кадри на ВМРО-ДПМНЕ се најзастапени во сите управни одбори и надзорни одбори на јавните претпријатија во Градот Скопје, вклучително и во ЈСП. И тие ја имаат одговорноста целосна за тоа што денес се случува во Скопје, рече Ковачевски на вчерашната прес-конференција.

Министерот за внатрешни работи Оливер Спасовски, пак, апелираше да се седне и да се разговара со оние кои протестираат, а, како што истакна, граѓаните да не бидат заложници на политички субјекти кои се скарани

-Ги разгледуваме сите можни опции, меѓутоа освен разговор со оние кои протестираат нема друга опција, изјави вчера Спасовски, посочувајќи дека кога станува збор за протест или јавен собир доаѓа до судир на правото на слободно движење и правото на протест.

Приватните автобуски превозници бараат од Град Скопје да се подмири долгот кон двете компании кој во целост изнесува преку 90 милиони денари, затоа што, како што велат, немаат средства за понатамошно функционирање поради недостиг на средства.

В.д. директорот на Јавното сообраќајно претпријатие – Скопје, Александар Стојковски, минатата недела во интервју за МИА рече дека долгот го наследил и оти треба да биде подмирен. Но, истовремено спомена дека според последните анализи приватните превозници во последните пет години не уплаќале, односно не задолжувале никакви карти, а тоа, како што кажа, е нивна обврска според членот 5 од договорот меѓу ЈСП и приватните превозници.

притисни ентер