Култура

Викендов Галичка свадба, манифестацијата ќе почне вечер со монодрама за Пулевски

Од денеска попладне до недела во Галичник ќе се одржува традиционалната Галичка свадба на која годинава младенци се Лилјана Михајлоска и Јован Филипоски.

Нивната венчавка во црквата „Свети апостоли Петар и Павле“ во Галичник, со извршување на вековните свадбени обичаи и обреди, ќе биде в недела, 13 јули, што е и централен настан на манифестацијата.

Организаторот на Галичката свадба – Месната заедница Галичник, најави богата тридневна програма, која ќе почне вечер во амфитеатарот пред чешмата Упија со монодрама во чест на Ѓорѓија Пулевски и 150 години од издавањето на неговиот „Речник на три јазика“ (Тријазичникот), со настап на актерот Рубенс Муратовски. Текст за претставата „Ја, Ѓорѓија Пулески – роден су од камен“ е напишан од Миле Бошњаковски и е на автентичен мијачки говор, а режисер на монодрамата е Бојан Трифуновски.

По премиерата вечер во Галичник ќе има забава со диџеј за помладите посетители, а од утре почнуваат свадбарските обичаи - пречек на тапаните, китење и поставување на свадбениот бајрак, симболичното „фрлање пушка“ од куќата на зетот и изведбата на свекрвиното оро.

Како што најави организаторот, особено впечатлив момент ќе бидат ората кои го симболизираат печалбарството и непокорот на луѓето од овој печалбарски крај - „Невестинското“ и „Тешкото“ на националниот фолклорен ансамбл „Танец“, на платото пред чешмата Упија. Во вечерните часови утре невестата, придружувана од свадбарите ќе оди да полни вода – обичај поврзан со семејната среќа.

В недела, денот на венчавката, ќе почне со традиционалните обичаи „канење на мртвите“, „канење на кумот“, „бричење на зетот“ и „тргнување по невеста“, како и карактеристичниот обичај на Галичката свадба - „гледање низ прстен“. По испраќањето на невестата и дарувањето, ќе следува венчавањето во храмот „Св. Апостоли Петар и Павле“. Настанот ќе заврши со свеченото испраќање на тапанџиите и зурлаџиите, кое го означува симболично затворање на свадбената церемонија.

Годинашните невеста и зет Лилјана Михајлоска и Јован Филипоски на прес-конференцијата минатата недела истакнаа дека учеството во манифестацијата за нив претставува исполнување на животниот сон. Јован е потомок на старото галичко семејство Филипоски и, како што рече, уште од мал мечтаел да биде зет на Галичката свадба.

-Оваа традиција треба да се негува. Мене ми беше пренесена од моите баба и дедо, а потоа и од моите родители кои секоја година учествуваат и се дел од традицијата. Честа е огромна и се надевам дека што повеќе посетители ќе дојдат и ќе ја видат оваа убава традиција, изјави Филипоски.

Невестата Михајлоска рече дека честа е голема, но исто така и одговорноста доследно да се пренесе традицијата.

- Огромна чест и задоволство е што сме избрани за невеста и зет, се чувствуваме среќно и гордо. Но, истовремено, голема е одговорноста доследно да се пренесе оваа традиција, веруваме дека сѐ ќе помине во најдобар ред, рече Михајлоска.

Претседателот на Месна заедница Галичник, Огнен Караѓозовски, на прес-конференцијата изрази задоволство што сѐ уште постои интерес кај младите да бидат дел од оваа манифестација.

Институционален покровител на „Галичката свадба“ е претседателката на државата Гордана Сиљановска-Давкова, поддржувач е Министерството за култура и туризам, а „Пивара Скопје“ веќе 50 години е партнер во организирањето на манифестацијата.

Целата програма ќе биде емитувана на видеоекран поставен на централното плато во селото Галичник, а ќе биде емитувана и во живо на социјалните мрежи. За оние што ќе присуствуваат на настанот, во текот на двата дена од викендот во Галичник ќе има посебен сообраќаен режим. Организаторите повикаа на одговорно однесување, особено во консумирањето алкохол и грижата за природата.

Тагови: Галичка свадба

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Владата најостро го осудува вандалскиот чин на опожарување на возила со дипломатски статус во близина на Амбасадата на Бугарија

Владата најостро го осудува вандалскиот и недозволив чин на опожарување на возила со дипломатски статус во непосредна близина на Амбасадата на Република Бугарија во Скопје.

Ваквите постапки претставуваат напад врз принципите на безбедноста, дипломатските односи и меѓународното право и не смеат да имаат место во демократска држава.

Надлежните институции веќе преземаат интензивни мерки за целосно расчистување на случајот и откривање на сторителите. Како Влада сакаме да испратиме јасна порака дека секој обид за предизвикување тензии, ширење омраза или нарушување на безбедноста ќе биде максимално санкциониран.

Државата има капацитет и ќе одговори со целосна сила на институциите и нема да дозволиме поединци да ја нарушуваат репутацијата на Македонија.

Очекуваме брза и ефикасна истрага, целосно расветлување на настанот и соодветна кривична одговорност за сторителите.

Владата останува цврсто посветена на заштитата на сите граѓани и дипломатски мисии во земјата и на зачувувањето на стабилноста, безбедноста и добрососедските односи.

Влада на РМ

Тагови: влада

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

САД и Иран постигнаа мировен договор – во петок ќе биде потпишан во Женева

Затворање на сите фронтови на 60 дена, вклучувајќи го и оној во Либан и отворање на Ормускиот Теснец, и од Иран и од морската блокада на САД

Затворање на сите фронтови на 60 дена, вклучувајќи го и оној во Либан и отворање на Ормускиот Теснец, и од Иран и од морската блокада на САД – Вашингот и Техеран, со посредување на Исламабад, постигнаа прелиминарен договор по три и пол месеци да стават крај на војната, кој ќе го официјализираат в петок во Швајцарија.

Договорот ќе донесе мир и безбедност во регионот, нешто што многу претседатели на САД се обидоа да го постигнат, но потфрлија, порача претседателот Трамп, кој додаде дека „нафтата повторно ќе почне да тече“.

-Лидерите во регионот за прв пад најдоа претседател кој може да им помогне да постигнат вистински мир. Со отврањето на Ормускиот Теснец по потпишувањето на договорот во петок, со цел да се отстранат мините, нафтата повторно ќе тече на двата краја од регионот и во светот,- Доналд Трамп.

Сепак, најтешките теми се оставени за 60 дена примирије, каде ќе следува нова рунда на преговори за најчувствителните прашања – Иранската нуклеарна програма, санкциите од САД и замрзнатите средства на Техеран.

Според САД, договорот е доказ дека Иран е принуден на ограничувања – земјата од Блискиот Исток пак истиот го претставува како дипломатска победа, оти според тамошните власти, Техеран ги зачувал клучните позиции и го приморал Вашингот да седне на маса.

-Непријателот беше принуден да побара прекин на огнот и преговори, а сега ние сведочиме на нацрт – договор во кој сите наши позиции, како и важните прашања кои ги сметаме за неопходни, се вметнати. Како и да е, она што беше поврзано со обврските на Иран се спроведуваат и ќе бидат спроведени. Другте одредби од меморандумот за разбиаре ќе произлезат од формалното потпишување на меморандумот во петок,- - Казем Гарибабади – Заменик министер за надворешни работи на Иран.

Поголемиот дел од светските лидери, вклучувајќи ги и ОН го поздравија договорот – Потпретседателката на ЕК, Каја Калас кажа дека истиот е добредојден и денеска ќе биде тема на дискусија со министрите за надворешни работи, а ЕУ се нуди да даде своја експертиза во неговата реализација.

Бевме во контакт со Иран, но и со партнерите од Заливот, исто така и со нашите американски колеги да понудиме помош, бидејќи имаме експертиза кога станува збор за нуклеарни преговори, на пример.

Наспроти ова, Тел Авив со многу „поладен“ став – според нив договорот е недовршен и потенцијално ризичен компромис. Децидно порачаа, не се повлекуваат од Либан и дека го задржуваат правото на самостојна воена акција, но и на жесток одговор доколку Иран повторно посегне да зајакнува нуклеарно – став кој го потврди и амбасадорката на Израел во Македонија, при нејзината посета.

Ормускиот теснец кој почна да се отвора, но е се уште далеку од нормализација, веднаш доведе до поместувања на берзите. Нафтата од типот Бренд е со пад од 4% и тримесечен минимум од 84 долари по барел. Пред да започне конфликтот, беше 75 долари.

Тагови: Иран САД

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Велика Британија ги забранува социјалните мрежи за лица под 16 години

Британскиот премиер Кир Стармер денеска објави дека на лицата под 16 години ќе им биде забранет пристапот до сите главни апликации на социјалните мрежи.

Стармер истакна дека социјалните мрежи ги прават децата несреќни, отвораат простор за вознемирување и злоупотреба и го оштетуваат нивното ментално здравје.

„Нема да правам компромис во врска со безбедноста и среќата на нашите деца и затоа оваа забрана мора да се спроведе. И ќе се спроведе“, рече тој.

Стармер објасни дека производите што не се опфатени со општата забрана, како што се платформите за игри, ќе мора да ги спречат децата да комуницираат со странци..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.