Притисокот врз Менделсон се зголеми откако американските конгресмени во понеделникот објавија т.н. „роденденска книга“ во која долгогодишниот политичар од Лабуристичката партија во белешка, напишана ракописно, го опишува Епстајн како „мој најдобар другар“.

И покрај ова откритие, премиерот Стармер вчера жестоко го бранеше својот амбасадор, изјавувајќи во Парламентот дека Менделсон ја има неговата „целосна доверба“.

Сепак, само неколку часа подоцна, скандалот се прошири откако агенцијата Блумберг објави низа имејли меѓу Менделсон и Епстајн, во кои Менделсон изразува поддршка за својот пријател и нуди да разговара за неговиот случај од 2008 година со своите политички контакти.

Епстајн се изјасни за виновен за две обвиненија за проституција и помина 13 месеци во затвор по контроверзна спогодба. Но, имејлите до кои дојде Блумберг покажуваат дека Менделсон продолжил да го поддржува Епстајн и по неговата пресуда.

„Мислам на тебе и се чувствувам беспомошно и бесно поради она што се случи“, напишал Менделсон. Тој го советувал Епстајн да возврати користејќи техники од книгата „Уметноста на војувањето“ на Сун Цу.

Во соопштението за Си-Ен-Ен со кое го најави повлекувањето на Менделсон, британското Министерство за надворешни работи соопшти дека имејлите покажуваат оти „длабочината и обемот“ на врската на сега веќе поранешниот амбасадор со Епстајн е „значително поразлична од она што беше познато во моментот на неговото назначување“.

Скандалот околу Менделсон создаде уште една огромна политичка главоболка за Стармер, кој се соочи со прашања за неговата проценка при назначувањето на Менделсон, бидејќи неговото пријателство со Епстајн беше добро познато.

Менделсон, кој досега е принуден да се повлече од три високи владини функции поради одделни скандали, со години ги одбиваше прашањата за неговите врски со Епстајн. Запрашан минатата година за неговата врска со сексуалниот престапник, Менделсон рече дека жали што го запознал, но го отфрли прашањето како новинарска „опсесија“.

Сепак, обвинувањата станаа потешко да се отфрлат откако демократите во Конгресот објавија копии од т.н. „роденденска книга“ на Епстајн за неговиот 50-ти роденден, составена од Гислејн Максвел, неговата тогашна девојка, во 2003 година. Максвел беше осудена за трговија со луѓе во 2022 година и отслужува 20-годишна затворска казна.

Меѓу 238-те страници на книгата има и ракописна белешка, испреплетена со фотографии од Менделсон и Епстајн, која започнува: „Некогаш, еден интелигентен, остар човек што го нарекуваат „мистериозен“, се спушти со падобран во мојот живот.“

Менделсон опишал дека поминувал „многу часови“ чекајќи го овој човек, запознавајќи ги неговите „интересни“ пријатели, и како овој човек го носел со себе во „еден од неговите славни домови“, покрај слика од остров.

„Каде и да е во светот, тој останува мој најдобар другар“, напишал Менделсон.

Во интервју за британскиот таблоид „Сан“, Менделсон вчера рече дека му било „многу непријатно“ да ги чита тие зборови, и изјави дека се плаши дека наскоро ќе излезат уште „многу непријатни“ преписки. Тој истакна дека ја напишал својата порака пред Епстајн да биде осуден во 2008 година.

„Многу жалам што паднав на неговите лаги. Прифатив уверувања што ми ги даде за неговото обвинение, неговиот првичен кривичен случај на Флорида“, додаде Менделсон.

Од Министерството за надворешни работи велат дека „предлогот на Менделсон дека првата пресуда на Џефри Епстајн била неправедна и дека треба да се оспори е нова информација“.

„Со оглед на тоа, и имајќи ги предвид жртвите на злосторствата на Епстајн, тој е повлечен од функцијата амбасадор со итно дејство“, се вели во соопштението.

Менделсон, широко познат во политичките кругови како „Принцот на темнината“ поради неговите макијавелистички вештини, стана директор за комуникации на Лабуристите во 1980-тите. Тој помогна да се претвори партијата во елегантен, глобално насочен, проект пријателски настроен кон капиталот, познат како „Нови лабуристи“, кој на крајот победи со огромна разлика на изборите во 1997 година под водство на Тони Блер.

„Ние не сме комунисти, ние сме Нови лабуристи“, изјави тој на еден собир на корпоративни Американци следната година. „Ние сме многу опуштени во врска со тоа што луѓето се збогатуваат, сè додека ги плаќаат своите даноци.“

Но, критичарите велат дека самиот Менделсон долго време е премногу опуштен со своите односи со богатите. Тој поднесе оставка како владин министер во 1998 година поради тоа што не пријавил заем што го добил од колега милионер. Се врати во Владата следната година, но повторно поднесе оставка во 2001 година поради тврдењата дека ја користел својата позиција за да влијае на барањето за британски пасош на еден богат донатор.

Потоа, Менделсон замина од Вестминстер во Брисел, станувајќи еврокомесар за трговија од 2004 до 2008 година. Потоа се врати во владата по трет пат под премиерот Гордон Браун, пред да премине во приватниот сектор откако Лабуристите ги загубија општите избори во 2010 година.

Кога Стармер победи на изборите минатиот јули, тој првично ја остави Карен Пирс на местото британски амбасадор во САД. Но, откако Доналд Трамп освои втор мандат во ноември, Стармер ја замени, како што се сметаше, сигурната рака со политички тешкаш – способен да маневрира во Вашингтон под водство на Трамп.

Стармер сега загуби двајца високи функционери за една недела, откако неговата заменичка, Анџела Рејнер, поднесе оставка во петокот поради неплатениот данок на имот.

Повлекувањето на Менделсон доаѓа само неколку дена пред Стармер да го пречека американскиот претседател Доналд Трамп во Велика Британија на државна посета, која ќе вклучува и банкет во замокот Виндзор со кралот Чарлс III.

Отпуштањето на Менделсон од страна на Стармер поради неговите врски со Епстајн може да ја направи таа посета понепријатна, со оглед на тоа што и Трамп е вмешан во сопствен скандал поради неговите врски со осудениот сексуален престапник, наведува Си-Ен-Ен.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.