Хајди Елзесер настапува како солист и камерен музичар во концертни сали ширум светот, меѓу кои во салата „Гаво" во Париз, „Тонхале" во Дизелдорф, „Еткер Хале" во Билефелд, познатата концертна сала на „Резиденсиа де Естудиантес" во Мадрид и др. Редовно настапува на бројни фестивали низ цела Европа како и во С. Македонија, Кина и САД. Нејзиниот репертоар е исклучително еклектичен и многустран – од раниот барок, па сѐ до современите дела на 21от век, вклучувајки и бројни светски премиерни изведби на композитори со кои редовно соработува, како што се: Б. Шуман, В. Глобокар, Ј. Андреевска, М. Апелбаум, А. Пејовски, М. Трандафиловски, Х.Ј. Винклер, М.К.Редел, К. Делиниколов, Г. Сантандер, П. Шахов, В. Николов, К. Џерет и други.

Основач е на квартетот за две пијана и два перкусионисти „ Artwork Ensemble" кој ја негува современата музика, а таа е член на повеќе ансамбли за современа музика како што се „Ensemble Horizonte", „Earquaqe Ensemble" и други. Покрај нејзината активна концертна дејност како солист и камерен музичар, Елзесер настапува со оркестарот на Ландестеатер Детмолд, како и со сите македонски оркестри под водство на: Саша Николовски-Ѓумар, Тадеуш Козловски, Ангел Шурев, Александар Лековски, Фимчо Муратовски, Томас Херцог, Карлхајнц Блемеке и други.

Има издадено свој соло компакт диск со дела на Брамс и Шуберт, а учествува и во повеќе продукции на компакт дискови со камерна музика во Германија. Од 2011 година Хајди Елзесер и нејзиниот ансамбл за современа музика се почесни членови на Фондацијата „Томислав Зографски".

Родена е во Скопје. Дипломира на ФМУ во класата на Стела Слејанска, а студиите ги продолжува на Екол Нормал де Музик во Париз каде се здобива со повеќе дипломи, како и на Европскиот Конзерваториум исто така во Париз, Франција. Во овој период нејзин најзначаен професор е Теодор Параскивеско. Круна на нејзините студии се „Концертегзамен" студиите на факултетот за музика во Детмолд, Германија кои ги завршува со голем успех во класата на проф. Жан-Ефлам Бавузе.

Предава на Факултетот за музика во Детмолд, држи национални и интернационални мастер класи, а нејзините ученици и студенти се добитници на награди на повеќе натпревари во Германија.

Српскиот пијанист Ненад Лечиќ уште од мали години го изразува својот голем и невообичаен талент за музика. Уште од мал е добитник на бројни национални и интернационални награди. Од 11-годишна возраст редовно држи рецитали и настапува како солист со оркестри. Во 1991 година ја добива специјалната награда „Млад Европски топ талент" од страна на познатата италијанска ТВ РАИ. На 13-годишна возраст се запишува на Факултетот за музичка уметност во Белград, во класата на Игор Ласло, за набрзо потоа ги продолжува студиите во класата на Арбо Валдма на Факултетот за музика и театар во Келн, каде што на многу рана возраст дипломира и завршува низа од постдипломски студии со највисок успех.

Настапува како солист и камерен музичар во Келнската Филхармонија, Штефанизаал во Грац, Музикгебау – Амстердам, како и на многу видни фестивали како што се: Клавирскиот фестивал во Рур, фестивалите во Алдебург и „Кингс Плејс" во Лондон на други ширум Европа, но и на далечниот Исток во Кореја и Јапонија.

Критиката го оценува како музичар со „беспрекорна изведба на инспирирано и врвно музицирање". Како солист со оркестар настапува со Бамбершките Симфоничари, Европскиот Камерен Оркестар, Оркестарот „Филхармонија" во Лондон и Белградската филхармонија под диригентските палки на: Џонатан Нот, Денис Расел Дејвис и Младен Јагушт. Како камерен музичар тој настапува заедно со: Пјер-Лоран Еимар, Кристоф Рихтер, Ксенија Јанковиќ, Ралф Мано, Гвидо Шифен, Тамара Стефановиќ, Хајди Елзесер и Катарина Десерно.

Од 2004 година, предава на Факултетот за музика во Келн, а од 2007 е член на „Artwork Ensemble". Има снимено четири компакт-дискови со соло и камерен репертоар.

Концертот на Елесер и Лечиќ е од 21 ласот во катедралната црква „Света Софија"./МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.