Свет

Вашингтон го предупреди Брисел да не ја ограничува набавката на американско оружје

Администрацијата на американскиот претседател Доналд Трамп им се закани на европските земји со контрамерки доколку ЕУ ги фаворизира домашните производители на оружје пред американските во набавките, објави бриселскиот портал „Политико“.

Пентагон изрази противење на каква било европска иницијатива за ограничување на пристапот до европскиот пазар за американската одбранбена индустрија, предупредувајќи дека таков потег би предизвикал слични мерки од Вашингтон.

Забелешките, според „Политико“, се вклучени во меморандумот поднесен како дел од јавната консултација од страна на Европската комисија претходно овој месец, откако извршната власт на ЕУ побара повратни информации од владите и претставниците на одбранбената индустрија за европските правила за набавка на оружје.

- САД остро се спротивставуваат на какви било промени на Директивата што би ја ограничиле можноста на американската индустрија да поддржува или на друг начин да учествува во националната одбранбена набавка на земјите-членки на ЕУ, предупредува американската администрација пред планираната промена на закондоавството за одбранбени набавки на ЕУ.

Претходно, и заменик-државниот секретар на САД, Кристофер Ландау, за време на состанок зад затворени врати во декември, остро ги критикувал европските сојузници во НАТО затоа што им даваат приоритет на сопствените одбранбени индустрии пред американските добавувачи на оружје.

Во последните години, Европската комисија се стреми да го зголеми уделот на Европа во договорите за јавни набавки на ЕУ. Со децении, Европа во голема мера се потпираше на американската воена опрема, од ловци Ф-35 Лајтнинг II до ракетни системи М142 ХИМАРС и противвоздушни ракети МИМ-104 Патриот, а речиси две третини од увезените системи за оружје на ЕУ доаѓаат од САД, пишува „Политико“.

ЕУ веќе им дава предност на европските компании преку програми како што се SAFE од 150 милијарди евра и опциите за купување оружје што Украина може да ги искористи од неодамна договорениот заем од 90 милијарди евра за Киев. Парите од ЕУ можат да се користат за купување воена опрема само ако најмалку 65 проценти од вредноста на опремата доаѓа од Европа.

Тагови: оружје САД

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Центарот на градот е исполнет со навивачи, Скопје живее во фудбалски ритам

Скопје денеска живее во фудбалски ритам.

Неколку часа пред дуелот Македонија – Шкотска, центарот на градот е исполнет со навивачи од двете репрезентации, со песна, добро расположение и позитивна атмосфера пред вечерашната пресметка.

Највпечатливи, како и секогаш, се гостите. Шкотите во препознатлив стил – со килтови, знамиња и песна – уште од претпладне ја загреваа атмосферата низ скопските улици.

Добро расположение и кај македонските навивачи. Со надеж дека домашниот терен ќе донесе пресврт, тие очекуваат Македонија да ја прекине лошата серија и да стигне до првиот позитивен резултат.

За македонската репрезентација ова е можност пред домашната публика да го поправи впечатокот по поразите од Швајцарија и Словенија.

Вечерва од 20 часот и 45 минути, атмосферата од скопските улици ќе се пресели на трибините на Националната арена „Тодор Проески“. Таму прогнозите ќе завршат, а ќе почне борбата за првата победа во групата.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Лишен од слобода велешанец, пронајдена дрога и пари, следува пријава

На 02.10.2026 во 18:00 часот во Велес, полициски службеници од Отсек за недозволена трговија со дрога при СВР Велес, го лишија од слобода Н.М.(42) од Велес.

Имено, тој бил забележан како на неколку места остава пакувања со бела грутчеста материја и при преглед на местата во негово присуство, биле пронајдени и одземени бела прашкаста материја, бела грутчеста материја, кафена грутчеста материја и дигитална вага, а при преглед кај Н.М. биле пронајдени и одземени пари.

Исто така, по издадена судска наредба од Основен суд Велес, бил извршен претрес во дом и помошни простории на Н.М., каде биле пронајдени и одземени пари. Тој бил задржан во полициска станица, известен е јавен обвинител и по документирање на настанот против него ќе биде поднесена соодветна пријава.

Тагови: дрога

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Општина Кисела Вода и ЈП „Лајка“ го одбележаа Светскиот ден на животните со настанот „Не можат да зборуваат, но можат да сакаат“

Во пресрет на Светскиот ден на животните, во паркот „Македонија“ се одржа голема едукативно-забавна манифестација под мотото „Не можат да зборуваат, но можат да сакаат“, организирана од Општина Кисела Вода во соработка со ЈП „Лајка“.

Ова дружење привлече голем број граѓани со своите миленици, а главниот фокус беше ставен на подигнување на свеста за одговорното сопствеништво и хуманиот однос кон животните.

Присутните имаа можност да добијат корисни совети од професионалци за тоа што значи вдомување и долгорочна грижа за едно животно, со акцент на соодветната здравствена нега, исхрана и условите неопходни за нивниот среќен живот. Едукативниот дел резултираше и со конкретен интерес кај граѓаните за вдомување на бездомни кучиња од стационарот.

Во рамките на предвидените активности, свој уметнички придонес даде и истакнатиот сликар Живко Поповски - Цветин, кој инспириран од природата и животните сликаше пред присутните.

-Љубовта кон животните е огледало на нашата хуманост и совест како општество. Со ова дружење сакавме да испратиме порака дека милениците не се само момент на радост, туку долгорочна обврска која бара посветеност и време. Ме радува фактот што сè повеќе граѓани покажуваат интерес за одговорно сопствеништво и за вдомување наместо купување. Општина Кисела Вода и понатаму останува посветена на хуманиот третман на животните и на подигнување на јавната свест преку вакви едукативни собири-истакна градоначалничката Стаменкоска Трајкоска.

Општина Кисела Вода упатува огромна благодарност до сите учесници и поддржувачи кои несебично помогнаа во успешната реализација: ветеринарната станица „Вет Тим“, груминг салоните „Grooming Twins“, „Shepa grooming“ и „Мое милениче“, како и пет-шоповите „Аба“ и „Пет Експерт“.

Програмата продолжува и во вечерните часови. Со почеток од 19:00 часот, пред Домот на културата „Билјана Беличанец“ (кино “Киноверзум”), граѓаните и нивните миленици се поканети на бесплатна проекција на отворено на македонскиот документарен филм „Приказната за Силјан“, во соработка со Кино Балкан Дистрибуција

Тагови: Општина Кисела Вода

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.