Експертот за хормонално здравје, Мајк Коксис, од британската компанија „Balance My Hormones“, објаснува како нашето тело, преку хормонски промени, може да сигнализира дека нешто не е во ред во врската, дури и пред да бидеме свесни за тоа.

Ако се чувствуваме исцрпено дури и по добар сон или сме постојано вознемирени, особено во присуство на партнерот, постои голема веројатност нашите нивоа на кортизол - хормонот на стрес – да се значително покачени.

„Кортизолот е главниот хормон на стресот. Неговата функција е да ви помогне да бидете внимателни и брзо да реагирате во опасни ситуации, но ако сте во врска што делува несигурно, непредвидливо или премногу бара труд, телото може да ги перцепира секојдневните интеракции како закана“, изјавува Коксис за „Мирор“. „Затоа постојано сте во блага состојба на „бори се или бегај“.

Кога „пеперутките“ не се среќа, туку тревога

„Возбудата од новата врска може да биде прекрасна, но ако постојано бркате возбуда и постојано барате потврда преку еуфорија, можеби сте во нездрав модел на однесување“, предупредува експертот. „Допаминот е невротрансмитер, хемиска супстанца во мозокот која игра клучна улога во регулирање на расположението, одговорна за чувствата на задоволство и награда. Често се меша со вистинската страст, но може да го следи моделот на зависност: ненадејни издигнувања и падови“, објаснува Коксис.

Од друга страна, ако во врската сме почесто иритирани или потиштени,отколку насмеани, можеби нивото на серотонин е ниско токму поради таквата врска.

„Серотонинот го регулира расположението, сонот, емоционалната рамнотежа, па дури и меморијата. Високите нивоа на серотонин се карактеристични за среќни и стабилни врски. Меѓутоа, ако врската е извор на несигурност, емоционална исцрпеност и постојани конфликти, нивоата паѓаат, а последиците се раздразливост, нестабилност и симптоми на депресија“, вели Коксис.

Ако сексуалните односи со нашиот партнер одеднаш станат напорни или ни изгледаат како обврска, ова може да биде и порака од нашето тело дека нешто не е во ред.

Кога повеќе не чувствуваме поврзаност

Освен хормоналните промени, постојат и други знаци дека врската можеби завршува. Емоционалната дистанца од партнерот може да биде привремена, но понекогаш укажува на подлабок проблем што не треба да се игнорира.

Горчината може да биде и предупредувачки знак. Ако чувствуваме огорченост што не исчезнува, време е да се запрашаме зошто. „Огорченоста не исчезнува сама од себе. Треба да дојдете до нејзиниот извор и отворено да разговарате за неа за да видите дали е можно да простите. Не ги потиснувајте вашите чувства“, изјавил Џесен Џејмс, поранешен психијатриски техничар и стручњак за човековото однесување.

И ако расправиите никогаш не се решат и постојано чувствуваме дека сме во маѓепсан круг, тоа е уште еден показател дека врската можеби повеќе не функционира. „Ако постојано влегувате во истите конфликти и чувствувате дека се вртите во место, запрашајте се дали врската ви користи вам и на партнерот. Ако не, можеби е време да се разделите пријателски“, заклучува Џејмс.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.