Македонија

Вард: Проширувањето на Унијата е важен приоритет на ирското претседавање со ЕУ

Проширувањето на Унијата е важен приоритет на ирското претседавање со Европската Унија, порача на амбасадрот на Ирска во земјава, презентирајќи ја програмата на официјален Даблин.

Брендан Вард пред Националниот совет за евроинтеграции посочи дека ќе настојуваат Црна Гора да ги заокружи преговорите со Унијата до крајот на годинава и да постигнат суштински напредок со останатите три земји кандидатки кои ги започнаа преговорите по кластери. Во однос на Македонија најавува дијалог во рамките на Унијата за земјава да го направи потребниот исчекор.

-Проширувањето на Унијата е значителен приоритет за Ирска и ние ќе работиме кон завршување на пристапните преговори со Црна Гора и ќе настојуваме да постигнеме суштински напредок во преговорите со Албанија, Украина и Молдавија. Исто така, силно ја поддржуваме и Македонија и нејзиното пристапување во ЕУ и ќе работиме заедно со партнерите во Унијата и со властите тука во Скопје за да видиме кој напредок ќе може да се направи на тоа поле,- -Брендан Вард амбасадор на Ирска во Македонија со седиште во Романија.

Поддршка за европските вредности кои во минатото биле занемарени од некои земји членки е еден од трите приоритети на Ирското претседателство, изјави амбасадорот Вард. Да се почитуваат европските вредности упатија повик заменик претседателот на националниот совет за евроинтеграции – Антонијо Милошоски како и пратеничката од опозициските редови – Моника Зајкова. Милошоски од Ирското претседателство побара како што рече, почит и партнерски пристап но и поголема поддршка за „порационално однесување од одредени членки на ЕУ.„

-Македонија е спремна да разговара за тоа што треба да се направи дополнително за владеење на правото, за реформи во администрацијата, но навистина многу ни е тешко да разговараме за поглавја како политички суети и историски фрустрации. Таквите поглавја на историски фрустрации што се случило пред 150 години да биде детерминанта за тоа што треба да се случи утре како наша заедничка европска иднина, сметаме дека не се релевантни параметри за процесот на проширување,- -Антонијо Милошоски, заменик-претседател на Националниот совет за евроинтеграции.

-Апел до Ирското претседателство – ЕУ мора конечно да испрати јасна порака дека вредностите што ги проповеда, навистина и ги применува. Ако се бараат реформи тие треба да бидат мерени по ист критериум, за сите земји, ако се бара доверба, тогаш и европските ветувања мора да бидат предвидливи и исполнети,- - Моника Зајкова, претседателка на ЛДП.

Иако лидерот на СДСМ и претседател на Националниот совет за евроинтеграции – Венко Филипче не беше присутен од како што рече неговиот заменик – Милошоски, оправдани причини, сепак од неговата партија упатија критики за тоа дека како што велат „додека другите напредуваат кон ЕУ, Македонија останува во изолација„ .

Додека четири земји направија нов чекор напред кон Европската унија, Македонија повторно останува заглавена...Наместо да ја искористи оваа шанса, Мицкоски ја држи Македонија во изолација. Со блокирање и со неисполнување на реформите, тој свесно ги затвора вратите за европските фондови, за инвестиции и за подобар животен стандард.

Се вели во партиското соопштение во однос на вчерашниот т.н „Супер вторник„ кога Брисел оддржа дури четири меѓувладини пристапни конференции со првенците – Црна Гора, Албанија, Украина и Молдавија.

Тагови: ЕУ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски на пуштање во употреба на детска градинка во Општина Теарце

Претседателот на владата Христијан Мицкоски денеска ќе присуствува на пуштање во употреба на детска градинка во Општина Теарце.

На свеченото отворање на детската градинка „Фолеја“ во село Пршовце ќе присуствуваат и евроамбасадорот Михалис Рокас и градоначалникот на општина Теарце, Даут Мемиши.

Тагови: Христијан Мицкоски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Копилотот од „Флајдубаи“ сакал да го убие пилотот, а потоа да го урне авионот врз аеродромот во Тел Авив

Копилотот од „Флајдубаи“ сакал да го убие пилотот, а потоа да го урне авионот врз аеродромот во Тел Авив. Тоа го планирал со месеци.

Копилотот кој минатата недела со секира го нападна капетанот на авион на „Флајдубаи“ (Flydubai) и се обиде да ја преземе контролата врз леталото, имал намера да го урне авионот врз меѓународниот аеродром „Бен Гурион“ во близина на Тел Авив, објавија израелските медиуми, повикувајќи се на информации од истрагата.

Според извештаите на израелскиот Канал 12 и порталот „Ynet“, 29-годишниот државјанин на Оман, Хамам ал-Хамами, наводно им рекол на истражителите дека, откако ќе го елиминирал капетанот, планирал да го продолжи летот како ништо да не се случило. Израелските медиуми тврдат дека неговата намера била да ги добие сите неопходни дозволи за слетување и – дури во фазата на завршен пристап – да го урне „Боингот“ врз зграда или авион на аеродромот.

Со тоа, на израелските власти би им останало многу малку време да сфатат што се случува и да реагираат.

Според истите извештаи, истрагата открила дека Хамами не постапил импулсивно. Во последните месеци, тој повеќе пати слетал на аеродромот „Бен Гурион“ како член на екипажот; за време на една посета во јуни, наводно детално го проучил аеродромот и се подготвувал за напад.

Првично планирал да го изврши нападот уште во јули, но се откажал од идејата во последен момент бидејќи меѓу членовите на екипажот бил и еден негов пријател.

Одлучил да ја чека следната можност. Канал 13 објави уште еден детал од истрагата. Според нивниот извештај, Хамами им кажал на истражителите дека намерно барал работа во авиокомпанија што лета за Тел Авив и дека токму поради тоа ја избрал „Флајдубаи“ (Flydubai).

Израелските истражители сè уште лично не го испрашале Хамами. Канал 12 наведува дека информацијата му била пренесена на Израел од саудиски и емиратски истражители, па затоа деталите од неговата изјава сè уште не се официјално и независно потврдени. Тој побарал од пилотот да се помоли, а потоа го нападнал.

Нападот се случи на 30 септември, за време на летот FZ1073 од Дубаи до Тел Авив.

Капетанот на авионот, Смит Мачхар , Индиец, раскажал дека копилотот ненадејно го нападнал од зад грб, околу пет минути откако побарал дозвола да се помоли. Хамами го удрил со секирата за итни случаи што се чувала во пилотската кабина.

Иако тешко повреден, Мачхар успеал да ја отвори вратата од пилотската кабина. Тоа им овозможило на членовите на екипажот и на патниците да влезат и да го совладаат напаѓачот. За време на борбата, авионот преминал во стрмно понирање.

Според податоците од „Flightradar24“ анализирани од „Ројтерс“, леталото изгубило повеќе од 16.000 стапки – или речиси пет километри – висина за нешто повеќе од 30 секунди.

Откако капетанот успеа да ја отвори пилотската кабина, неколку патници го совладаа Хамами, а контролата врз авионот потоа ја презедоа двајца пилоти кои се наоѓаа во авионот како патници. Авионот беше пренасочен кон Табук, Саудиска Арабија, каде што безбедно слета. Во авионот имаше повеќе од 170 патници и членови на екипажот, главно Израелци. Никој од патниците не загина.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Гаши домаќин на поранешните собраниски спикери

Претседателот на Собранието Африм Гаши денеска ќе одржи средба со поранешни претседатели на законодавниот дом.

Поранешните собраниски спикери ќе го посетат Собранието, каде што средбата со Гаши е закажана за 13 часот во Охридската сала.

На средбата се очекува да бидат разменети искуства и ставови поврзани со работата и функционирањето на највисокиот законодавен орган.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.