Односот помеѓу сопружниците директно влијае на емотивниот развој на нивните деца, предупредил своевремено познатиот психијатар.

Владета Јеротиќ (1924-2018.) беше познат академик, лекар, невропсихијатар, психотерапевт, професор и книжевник. Невропсихијатрија специјализирал во 1957 г., а потоа од 1958. до 1961. и психотерапија во Швајцарија, Германија и Франција.

Додека работел на развојот на психотерапијата во Србија, речиси 20 години бил раководител на Одделот за психотерапија каде стекнал огромно искуство во работата со пациенти и станал примариус доктор. Во својата богата кариера честопати зборуваше за семејството, бракот, љубовта и животните вредности.

Детето не може да го среди бракот

Во време кога луѓето сè почесто се разведуваат и кога браковите се распаѓаат и по траење од неколку децении, добро е да се потсетиме на мудрите зборови на Јеротиќ, кој ги советуваше луѓето како да си го зачуваат бракот.

- Во бракот има четири нивоа на комуникација помеѓу партнерите: духовно, интелектуално, емоционално и физичко. За добар брак треба да функционираат барем две нивоа. Кога едно или две од овие нивоа ќе попуштат, треба да се поработи на останатите - објаснил Јеротиќ во една прилика. Тој посочил дека за успешен и долготраен брак потребно е секогаш да бидете подготвени на компромис и промени.

Многу парови, особено жените, веруваат дека кога ќе им се роди дете, тоа е гаранција дека нивниот брак ќе успее.

- Децата не го зацврстуваат бракот. Онаму каде што бракот е добар, со децата може да стане уште подобар. Онаму каде што не е добар, станува полошо. Стабилните бракови се стабилни без разлика колку деца имаат. Значи, детето е токму такво каков што е бракот - објаснил Јеротиќ.

Односот помеѓу сопружниците директно влијае на емоционалниот развој на нивното дете.

- На мало дете повеќе од кога било и повеќе од кого било му е потребно внимание, друштво, заштита, морално охрабрување и љубов. Претпоставката е дека љубовта всушност се раѓа во таа рана возраст, кога детето ќе почувствува оти неговата потреба за сигурност е релативно задоволена, и дека најпрво ја задоволила мајката која ги вложува своите непосредни и несебични чувства. Кога кон мајчината љубов во исполнувањето на емоциите ќе се придружи и таткото, и тоа не само кон детето, туку кога се исполнети емоциите и помеѓу брачните партнери, се создаваат поволни услови детето да има трајна верба во животот – изјавил своевремено Јеротиќ, а пренесува веб-страницата „Зелена учионица“.

Според него, недостатокот на топлина, сигурност и авторитет на самите родители е одлучувачки фактор за погрешен развој кај детето.

- Она што одлучува детето погрешно да се развива е недостатокот на топлина, сигурност и авторитет од самите родители. Затоа што, ако детето е навистина беспомошно на почетокот, од кого би можело да го добие првиот неопходен импулс за да почувствува сигурност и грижа ако не од родителите? Тоа нема друг критериум за сопствената вредност освен признанието што го добива од најблиското опкружување - беа мудрите зборови на Владета Јеротиќ.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.