Македонија

Вајц го презентираше годишниот извештај за Македонија, вели реформи има, уставните измени се услов за евроинтеграцијата

Реформи има, но условот за уставните измени мора да се спроведе за земјата да продолжи по евоинтегративниот пат – порача известувачот во ЕП Томас Вајц, презентирајќи го годишниот извештај за Македонија.

Вајц ја пофали усогласеноста со надворешната политика на Унијата, поддршката за Украина и работата на коридорите 8 и 10 кои ги оцени како клучни за регионот. Сепак, нагласи дека многу работа се уште има во делот на владеење на правото, транспарентноста и слобода на медиумите. Изрази надеж дека годината нема да биде изборна за како што кажа, да не се загуби фокусот на реформите и ја повика владата да ги спроведе обврските на патот кон членство.

-Апликацијата за пристапување е повеќе од 20 години стара и мислам дека е време да се придвижиме напред. Исто така посочуваме дека постои голем прозорец на можности во моментов, за цел регион, но особено и за Македонија да продолжи со пристапувањето кон ЕУ. Има зелено светло колку што можам да видам од Советот, Европскиот парламент дава голема подршка,- - Томас Вајц – Известувач за Македонија во ЕП.

На дебатата која се разви во комитот за надворешни работи во ЕП, дел од европратениците упатија поддршка за земјава и оценија дека вината за застојот во евроинтеграциите не може да се гледа само во земјава, туку и во институциите на самата Унија.

-Тоа што не е во извештајот, се причините за недостатокот на напредок, од страна на Македонците, но и од страна на Советот, бидејќи Советот носи голема одговорност со тоа што не обезбеди кредибилна перспектива за проширување,- - Тијс Ројтен – Европратеник.

-Граѓаните на Македонија со право кажавте дека се изморени, далеку се од ЕУ се повеќе и повеќе и подалеку се од пред 10 или 15 години мислам дека тоа е проблем и делумно тоа е наша вина. Наша одговорност е да го држиме регионот на пат за соработка и мир, а не поларизација,- - Андреа Танџер Кореа – Европратеник.

Бугарските европратеници пак, не ја испуштија можноста да упатат критики кон земјава за почитување на човековите права и како што тие оценија, создавањето на вештачки проблеми од македонска страна. Иако воопшто не беше тема на дебатата, ја отфрлија идејата за асоцијативно членство во ЕУ без право на глас, која се разгледува во Брисел.

-Можам да се согласам со искажаните мислења дека македонскиот... дека луѓето во Македонија чекаа многу, чекаа доволно и веројатно се изморени. Но, политичката елита не изгледа дека е изморена и многу упорно одбива да ги исполни преземените обврски. Со ова темпо, за жал ќе кажам преговрниот процес може да продолжи не 20 години, туку 120 години. / Идеите за некакво компромисно, неполно или неполноправно членство кои се слушаат од некои кругови во Скопје се целосно неприфатливи и неодржливи,- - Станислав Стојанов – Европратеник од Бугарија.

-Властите работат кон политичка поларизација создавајќи вештачки проблеми поврзани со таканаречениот идентитет и зад тој параван тие го успоруваат напредокот во пристапниот процес. Според мене лично, местото на Македонија е во ЕУ, но не по секоја цена. - Ивајло Валчев – Европратеник од Бугарија.

Минатогодишниот извештај на Вајц помина со низа обвинувања меѓу Скопје и Софија, а самиот Вајц откри дека се соочил со притисоци и закани. Во првичниот документ беше нагласено признавањето на македонскиот јазик и идентитет, кој потоа заедно со амандманите од бугарските европратеници кои бараа пред нив да стои придавката „Современ“, како компромисно решение беа избришани од финалниот текст. За актуелниот извештај на Вајц, сега има рок до 6 март за поднесување на амандмани од европратениците, по што повторно ќе биде вратен во комисијата пред да биде гласан на пленарна седница во ЕП.

Тагови: Томас Вајц

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Технологија

Колекционерско издание на „GTA 6“: За 400 долари добивате сè освен самата игра

Ако се суди според огромната возбуда околу „Grand Theft Auto VI“, брзо се приближуваме кон еден од најголемите настани во светот на видеоигрите во последните неколку години.

Новата „GTA“ ветува враќање на сè што ги направи автомобилите клучен дел од серијалот – од брзи потери и трки до уште подетални опции за прилагодување на возилата. Сето ова доаѓа со препознатливата мешавина од криминал, хаос и судири со законот, по кои станаа познати „Rockstar Games“.

Сепак, иако очекувањата се огромни, најновата одлука на „Rockstar“ може да разочара дел од фановите.

Компанијата претстави колекционерско издание насловено „The Goodtime State - Vice City Collection“, со висока цена од 399,99 долари. Проблемот е што во пакетот недостасува најважниот елемент: самата игра.

Што добивате?

„Rockstar“ ја претставува колекцијата како луксузен пакет со предмети за колекционери, инспириран од светот на „Vice City“. Таа содржи разновидни предмети, вклучувајќи очила за сонце „Oakley“, налепници, значки и мапа на Леонида – измислениот регион во кој се одвива дејството на „GTA VI“.

Купувачите добиваат и бејзбол капа, фигура на маскотата на „Vice City“, чашка за жесток пијалак, торба за носење преку тело, приврзок за клучеви, стапче за мешање коктели и магнетно огледало.

Иако колекцијата е очигледно наменета за сериозни колекционери, во кутијата нема да го најдете најважниот предмет: „GTA VI“.

За самата игра, ќе треба да издвоите дополнителни 79,99 долари за стандардното издание или 99 долари за „Ultimate“ верзијата. Тоа значи дека купувачот што го сака целиот пакет ќе мора да плати речиси 480 или 500 долари, во зависност од изданието на играта.

„GTA VI“ без физички диск

Колекционерскиот сет пристигнува во време кога „Rockstar“ веќе предизвика реакции со одлуката „GTA VI“ да биде првиот голем AAA наслов на компанијата без традиционално издание на физички диск.

Играта ќе биде достапна дигитално преку продавниците на „PlayStation“ и „Xbox“, додека физичките примероци во продавниците ќе содржат само код за преземање. Оваа одлука предизвика негативни реакции во дел од гејмерската заедница. Извршниот директор на „Take-Two Interactive“, Штраус Зелник, го бранеше овој пристап, тврдејќи дека физичките дискови веќе немаат голема смисла за потрошувачите.

Ситуацијата е особено интересна за колекционерите. Тие сега можат да потрошат речиси 400 долари за кутија полна со предмети поврзани со играта, а сепак да не ја добијат самата игра во таа кутија.

„Rockstar“ има направено нешто слично и претходно

Сепак, ова не е првпат „Rockstar“ да продава колекционерска кутија без самата игра. Компанијата направи сличен потег во 2018 година со „Red Dead Redemption 2“, изданието „Collector's Box“ објавено тогаш, исто така, не содржеше примерок од играта.

Разликата, сепак, беше во цената. Таа колекционерска кутија чинеше 99 долари – помалку од една четвртина од цената на новата „Vice City Collection“. Денес, оригиналните колекционерски кутии за „Red Dead Redemption 2“ можат да се најдат на „eBay“ по цени што надминуваат 700 долари, што покажува дека вредноста на ваквите производи може да порасне кај колекционерите со текот на времето.

Сепак, останува фактот дека фановите на „GTA VI“, кои ги сакаат и колекционерските предмети и самата игра, ќе мора да ги купат одделно.

Со цена од речиси 400 долари само за колекционерските предмети, „Rockstar“ очигледно цели кон најпосветените фанови на серијалот и кон колекционерите кои се подготвени да платат висока цена за предмети поврзани со еден од најочекуваните наслови во историјата на видеоигрите.

Извор: Б92

Тагови: GTA 6

Живот

„Многу те сакам“: Лука Модриќ им ги разнежни срцата на фановите со нова објава

Лука Модриќ преку социјалните мрежи ѝ го честиташе деветтиот роденден на својата најмлада ќерка, Софија.

По тој повод, хрватскиот фудбалер сподели неколку фотографии на кои се заедно, придружени со кратка и емотивна порака.

На една од фотографиите, таткото и ќерката се насмеани додека позираат заедно, додека другите прикажуваат опуштени моменти од семејниот живот. На пример, на една фотографија се гледа како Софија седи на рамениците на татко ѝ, а на друга Модриќ ѝ помага да си ја исуши косата.

„Среќен роденден на мојата прекрасна и многу посебна мала принцеза! Многу те сакам!“, напиша Модриќ.

Најмладото од трите деца

Софија е најмладото дете на Лука и неговата сопруга, Вања Модриќ. Покрај неа, тие имаат син, Иван, и ќерка, Ема. Лука и Вања стапија во брак во 2010 година, а една година подоцна ја прославија и црковната венчавка во Загреб.

Модриќ честопати преку социјалните мрежи ги одбележува важните моменти од животот на своите деца, особено нивните родендени. Неговото семејство често го придружува на фудбалски настани. Сопругата и децата честопати го бодреле од трибините за време на клучни натпревари и му се придружувале во прославите по големите победи.

Извор: Индекс.хр

Тагови: Лука Модриќ

Свет

Нов потег на Путин: Русите вежбаат со Кинезите, пристигна нуклеарно предупредување

Рускиот претседател Владимир Путин вчера присуствуваше на воена вежба на планините Урал, во која учествуваа војници од Кина и од неколку други земји.

Путин го посети воениот полигон во регионот Чељабинск за да ја следи завршната фаза од вежбата „Центар-2026“. Вежбата се одржа во склоп на вежбата „Интеракција-2026“, спроведена од членките на Организацијата на Договорот за колективна безбедност – безбедносен сојуз предводен од Москва, составен од неколку поранешни советски републики.

Путин изјави дека 47.000 војници учествуваат во вежбата „Центар-2026“, вежбајќи одбивање напади на 11 полигони и во Каспиското Море. Вежбата започна во понеделникот, а завршува денес.

Путин предупреди дека нема да се двоуми да употреби нуклеарно оружје за одбрана на Калининград.

„Околу 6.000 војници од Русија и од други земји учествуваа во завршната фаза на полигонот Чебаркул“, рече Путин.

Тој додаде дека делегации од 55 земји учествувале како набљудувачи.

Според извештаите на руските медиуми, во вежбата учествуваат воени единици од Белорусија, Киргистан и Таџикистан, заедно со војници од Кина, Монголија и Пакистан. За време на посетата, Путин изврши увид во различни видови вооружување, вклучително и новите беспилотни летала „Геран“ на млазен погон, кои руската војска ги користи во нападите врз Украина.

Посетата на Путин уследи еден ден откако Русија го предупреди НАТО дека нема да се двоуми да употреби нуклеарно оружје за одбрана на Калининград, доколку некоја членка на воениот сојуз се обиде да ја отсече таа руска ексклава на западот на земјата од остатокот на Русија.

Извор: Б92

Тагови: Владимир Путин