Балкан

Вадефул од Сараево: Владеењето на правото не подлежи на преговори, ЕУ е конкретна перспектива за Западен Балкан

Германскиот министер за надворешни работи, Јохан Вадефул, синоќа пристигна во Сараево, започнувајќи ја својата обиколка во шесте земји од Западен Балкан, фокусирана на нивниот долгогодишен процес на пристапување кон Европската Унија.

Германскиот министер за надворешни работи, Јохан Вадефул, синоќа пристигна во Сараево, започнувајќи ја својата обиколка во шесте земји од Западен Балкан, фокусирана на нивниот долгогодишен процес на пристапување кон Европската Унија, кој за некои земји се одолжи со децении, јави ДПА.

Веднаш по пристигнувањето, Вадефул се сретна со високиот претставник на меѓународната заедница во Босна и Херцеговина, Кристијан Шмит, кој исто така е Германец и има значителни овластувања за одржување на Дејтонскиот договор од 1995 година, со кој заврши војната во Босна.

- Мирот и стабилноста во срцето на Европа остануваат „задолжителни за нас“, рече германскиот министер и ја повика Владата на Босна и Херцеговина да продолжи по својот пат кон членство во ЕУ. За нас е важно да се почитуваат фундаменталните принципи на Дејтонскиот договор – тоа го гарантира суверенитетот и територијалниот интегритет на државата како целин“, додаде тој.

Потоа тој имаше средба и со српскиот член на Претседателството на Босна и Херцеговина, Жељка Цвијановиќ.

Вадефул денеска ќе ги посети Црна Гора и Албанија, а вечер ќе отпатува за Србија. Тој во Подгорица ќе разговара со премиерот Милојко Спајиќ и министерот за надворешни работи Ервин Ибрахимовиќ, а попладне во Тирана ќе се сретне со министерката за надворешни работи Елиса Спиропали и со шефот на Специјалното државно обвинителство за борба против корупцијата, организираниот криминал и тероризам.

Германскиот министер за надворешни работи вечерва ќе допатува во Белград, каде се предвидени средби со претседателот на Србија, Александар Вучиќ, а во вторник со министерот за надворешни работи Марко Ѓуриќ и со претставници на граѓанското општество.

Потоа шефот на германската дипломатија ќе отпатува за Приштина, каде ќе има средби со претседателката на Косово Вјоса Османи, премиерот во технички мандат Албин Курти и со германски војници во мисијата КФОР.

Утре вечер Вадефул турнејата ќе ја заврши во Скопје. Предвидени се средби со македонскиот премиер Христијан Мицкоски и министерот за надворешни работи Тимчо Муцунски.

Пред да отпатува од Берлин, тој ги повика земјите од Западен Балкан да продолжат со реформите, нагласувајќи дека тоа е од суштинско значење за напредокот на нивните долгогодишни кандидатури за членство во ЕУ и за спротивставување на обидите на Русија и Кина да извршат влијание во регионот.

- Владеењето на правото, борбата против корупцијата и заштитата на фундаменталните права не подлежат на преговори, рече Вадефул. Тој додаде дека посветеноста на заедничките вредности е предуслов за членство во ЕУ.

- Сојузниците во НАТО, Црна Гора и Албанија, забележаа важен напредок, додека останатите земји сè уште треба значително да го надоместат заостанувањето, истакна германскиот министер.

Во 2003 година, ЕУ се согласи дека земјите од Западен Балкан ќе имаат право да станат членки откако ќе завршат низа реформи. Денес, државите се на различен степен на нивниот пат кон пристапување, а разочарувањето од долгиот процес расте. ЕУ стравува дека тоа може да ги турне кон политички ривали како Кина и Русија, коментира ДПА.

- Шесте западнобалкански земји се неделив дел од европското семејство, рече Вадефул и додаде: ЕУ не е далечно ветување, туку конкретна перспектива.

Црна Гора се смета за најнапредна во процесот на пристапување кон ЕУ, но сè уште нема конкретен датум. ЕУ води пристапни преговори со Црна Гора и Србија од 2012, односно 2014 година. Преговорите со Албанија и Северна Македонија започнаа во 2022 година, додека Босна и Херцеговина има статус на кандидат, но сè уште не ги започнала преговорите. Косово е потенцијална земја кандидат.

Тагови: Германија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Видео: Снимател доби отказ поради неа!

Винифер Фернандез долги години важи за една од најубавите и најатрактивни спортистки на светот.

Но, таа исчезна преку ноќ: Каде е и што прави најубавата одбојкарка на светот?

Во изминатите осум години, познатото видео од потезите на Винифер Фернандез на YouTube собра дури 15 милиони прегледи.

Ретко кој не ги видел нејзините фотографии што го преплавија интернетот во 2016 година.

Таа се најде на насловните страници ширум светот, многумина ја прогласија за најубава, односно најатрактивна одбојкарка на планетата, а потоа речиси преку ноќ исчезна од центарот на вниманието.

Во изминатите осум години, познатото видео со нејзините потези на YouTube собра дури 15 милиони прегледи.

Винифер Марија Фернандез (30), одбојкарка од Доминиканската Република, во тој период важеше за една од најпопуларните спортистки во светот.

Речиси и да немаше човек што не ги виде нејзините фотографии кои ги преплавија социјалните мрежи и интернетот, но потоа таа одеднаш исчезна од очите на јавноста. Последниот клуб за кој настапуваше беше „Карибењас“, а со години беше една од најголемите ѕвезди на репрезентацијата на Доминиканската Република. Иако денес не е толку присутна во медиумите како порано, на Инстаграм ја следат повеќе од 65.000 луѓе.

Винифер е висока 169 сантиметри и тешка 62 килограми, а додека играше на Куба, се случи интересна анегдота според која еден снимател наводно добил отказ бидејќи, наместо да го сними одлучувачкиот поен во натпреварот, ја насочил камерата кон младата Винифер Фернандез.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Првиот електричен Ferrari е веќе целосно распродаден

Првиот целосно електричен модел на Ferrari, Luce, можеби не ги освои симпатиите на љубителите на автомобили на социјалните мрежи, но тоа не ги спречи купувачите да резервираат речиси секој планиран примерок.

Иако моделот се соочи со критики во врска со дизајнот и преминот на Ferrari кон електричен погон, првичната серија на производство е веќе целосно распродадена.

Ова потврдува дека јавното мислење не секогаш се совпаѓа со желбите на купувачите кои можат да си дозволат огромни суми за ексклузивни автомобили.

Повикувајќи се на два извори запознаени со плановите на компанијата, Financial Times известува дека Ferrari планирало да продаде нешто помалку од 500 примероци од моделот Luce во текот на првата година, пренесува Računalo.com.

Според извештаите, целата планирана серија на производство за првата година била распродадена уште на почетокот на овој месец, и покрај почетната цена од 550.000 евра (без данок).

Иако Ferrari ги демантираше тврдењата дека купувачите мора да го нарачаат моделот „Luce“ за да го задржат својот привилегиран статус кај брендот, многумина сметаат дека овој фактор можеби придонел за големата побарувачка.

Наводно, од дилерите било побарано да не вршат притисок врз долгогодишните колекционери на Ferrari да го купат „Luce“, туку да се фокусираат на нови купувачи – особено на богати клиенти во Кина и во технолошките центри како Силиконската долина, каде што електричните автомобили веќе се широко прифатени.

Се чини дека оваа стратегија дава резултати. Според „Фајненшл тајмс“ (Financial Times), Ferrari планира да продаде приближно 2.500 примероци од моделот „Luce“ до 2030 година, што изнесува околу 600 возила годишно.

Тагови: ферари

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Бизарно

Уапсен добитникот на 167,3 милиони долари на лотарија

Џејмс Фартинг, добитник на една од најголемите лотариски награди во историјата на Кентаки, повторно е уапсен – што е четврти пат откако го освоил џекпотот вреден повеќе милиони долари.

Педесет и едногодишниот Фартинг од Џорџтаун бил уапсен во неделата, на 26 јули, под обвинение за семејно насилство.

Според затворските евиденции до кои дојде списанието *People*, тој се товари за семејно насилство што вклучува давење и напад од четврт степен со нанесување полесни телесни повреди. Тој моментално се наоѓа во притвор во затворот на округот Скот.

Во април, тој освои 167,3 милиони долари на лотаријата „Пауербол“ (Powerball), што претставуваше најголема добивка во историјата на Кентаки.

Тогаш Џејмс изјави дека планира да ги подели парите со својата мајка, Линда Гризл. „Ќе биде убав Ден на мајката. Ова ќе ми помогне да ги отплатам долговите“, изјави тогаш неговата мајка.

Според полицискиот извештај, наводната жртва – чиј идентитет не е откриен – изјавила дека дошло до расправија по возењето со брод.

За време на расправијата, тој наводно ја фатил за вратот со двете раце, отежнувајќи ѝ го дишењето. Тој се појави пред судот во вторникот, на 28 јули, и се изјасни дека не е виновен. Судот одреди кауција од 15.000 долари, му забрани контакт со наводната жртва и нареди да носи уред за електронски надзор за да се обезбеди почитување на забраната за контакт.

Ова не е првпат добитник на лотарија да има проблеми со законот по голема добивка. Само неколку дена откако го освоил џекпотот, тој бил уапсен на Флорида, каде што се соочил со обвиненија за напад врз полицаец и давање отпор при апсење.

Тагови: милион долари

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.