Вакава изборна кампања очекуваат политичките аналитичари во трката за челното место во 80 општини во земјава и во Градот Скопје. Како што ќе се приближува денот на изборите, така аналитичарите очекуваат засилување на вордингот - меѓусебни обвинувања и напад на кредибилитетот на противникот. Но таканаречена црна кампања, според нив нема да донесе позитивни поени на ниту еден кандидат, туку напротив само ќе укаже на недостигот од креативни политики и идеи на кандидатите за градоначалници.

„Некои партии инсистираат на глобалните теми бидејќи понекогаш им недостига текст и креативност за локалните теми. Затоа повеќе гледаме напад на кредибилитетот на противникот, отколку што гледаме креативни политики и предлози како да се надминат проблемите на граѓаните. Очекувам дека ќе има исклучоци кај кандидатите кои сами ќе преземат товарот на свои плеќи и верувам дека тие ќе бидат поуспешни на изборите“, вели политичкиот аналитичар Алберт Муслиу.

„Очекувам дека кампањата ќе биде критика на она што се случуваше во изминатите 4 години во општините во однос на очекувањата на граѓаните, и она што е сработено и она што не е сработено, а во фокусот ќе бидат и оние најзначајни национални теми, пред се случувањата со пандемијата и се разбира трагедијата во Тетово кога се запали и изгоре ковид болницата. Власта сметам дека треба да биде фокусирана на позитивна кампања во обид да покаже дека нешто направила во изминатиот период, а опозицијата е таа што ја користи негативната кампања како една критика на власта. Но доколку и власта посегне кон критики и навреди, тогаш дефинитивно ќе бидеме сведоци на црна кампања“, посочува аналитичарот Владимир Божиновски.

Според аналитичарите пресудно за изборот на идните градоначалници но и локалните советници ќе биде личниот квалитет и интегритет на кандидатите. Во некои од општините очекуваат да доминираат и независните кандидати, кои според нив, акцентот во кампањата ќе го стават токму на локалните прашања кои директно ги засегаат граѓаните.

„Секако дека личноста на кандидатот влијае и тоа сигурно ќе биде многу повеќе потенцирано кај градоначалниците. Кај некои структури по општините гледам дека партиите се освестуваат и осознаваат дека и структурата на советничката листа е исто така битна“, истакнува Муслиу.

„Овие избори ќе бидат доста интересни бидејќи ќе има пошаренолики состави на општинските совети. Во зависност од општините во некои и независните кандидати за градоначалници имаат доста добри шанси“, смета Божиновски.

Изборната кампања стартува ноќеска на полноќ и ќе трае до 15-ти октомври. Во изборниот натпревар, според статистиката на ДИК, влегуваат близу 11 илјади кандидати за градоначалници и советници во 80 општини во земјава и градот Скопје. На локалните избори в недела на 17-ти октомври право на глас ќе имаат 1.824.864 граѓани.