Здравје

Усни, заби и гради: Колку Албанија заработува од медицински туризам

Некогаш тоа беше европска Северна Кореја, затворена комунистичка диктатура. Но, сега Албанија привлекува милиони туристи годишно, а сe поголем број доаѓаат во потрага по посветла насмевка или подобри гради.

„Не сакам да зборувам за медицински туризам. Звучи малку страшно“, вели Дритан Греми, кој води стоматолошка клиника во главниот град Тирана. „Повеќе сакам да зборувам за среќен туризам“, вели тој.

Греми рече дека неговата клиника нуди „висок квалитет на услуга и опрема“, гарантирана и сертифицирана според европските стандарди. Но, за мал дел од европските цени.

Тој има италијански, француски, белгиски и швајцарски клиенти кои често ги привлекуваат аранжмани кои вклучуваат патни трошоци и трошоци за сместување.

Патувањето на Стефан Пелат во Албанија започна со надеж за нова насмевка по прифатлива цена.

Тој и неговиот брат, од Валенс на југот на Франција, долго време страдале од проблеми со забите што ги навело да подлежат на сложена процедура за имплантирање на забите.

„Во Франција имавме првична проценка која беше многу, многу скапа. Потоа почнавме да бараме онлајн - Бугарија, Турција, Албанија, Шпанија“, изјави Пелат за АФП.

За клиниката Греми дознал на консултации во Лион со албански стоматолози.

По првата посета во август, Пелат и неговиот брат биле задоволни од она што го виделе во Тирана и се вратиле наесен.

Операција за Забен имплант за која тој се одлучи чинеше околу 50.000 евра во Франција, наспроти само 13.500 евра во Албанија.

Тоа не беше мала разлика за него.

„Важно е да се има убава насмевка“, рече тој.

Натали Ганглоф, која работи во старечки дом во Конјак, западна Франција, исто така избрала клиника во Албанија за да ги лекува нејзините проблеми со забите.

За забите платила помалку од 15.000 евра наспроти 42.000 евра што би требало да ги потроши во Франција.

Откако ги извади и ги постави имплантите во февруари, таа се врати во Тирана во средината на септември на завршна работа, среќна што повторно се насмевна.

„За мојата работа е важно да имам убави заби“, изјави таа за АФП, велејќи дека веднаш ја сменила сликата на профилот на Фејсбук за да ја покаже својата нова насмевка.

Клиниката не е хотел со пет ѕвезди

Ниските режиски трошоци и ниските даноци им помогнаа на албанските клиники да привлечат клиенти со пониски цени.

Се проценува дека секторот за медицински туризам во земјата заработува меѓу 200 и 250 милиони евра годишно, а најмалку 50.000 Италијанци секоја година ја посетуваат Тирана на лекување.

Сепак, процедурите не се без ризик.

Претседателот на албанската национална асоцијација на лекари, Фатмир Ибрахимај, рече дека и странските и домашните пациенти не треба да се потпираат само на онлајн рекламирање за козметичките процедури и да внимаваат каде се лекуваат.

„Лекар не е хотел со пет ѕвезди или воопшто не постои“, изјави Ибрахимај на новинарите.

„Се повеќе странски туристи доаѓаат на козметички третмани за разубавување на нивната насмевка“, вели Моника Фида, дерматолог и универзитетски предавач во Тирана.

Особено популарни се инјекциите на хијалуронска киселина во усните.

Пред се, тие сакаат да се чувствуваат добро и да имаат што е можно природно обликувани усни“, додаде Фида, која вели дека годишно нејзината клиника ја посетуваат од 750 до 1.000 странски пациенти.

Вера Панаитов, шеесетгодишна италијанска готвачка од Верона, прво дошла во Тирана да си ги „среди“ забите.

Но, откако беше таму, таа се одлучи и за процедури за градите и половината.

„Треба да бидете убави на која било возраст и среќна во секое време“, изјави таа за АФП, насмевнувајќи се од болничкиот кревет, велејќи дека се чувствува „подмладена“./МИА

Култура

„Шехерезада“ и „Валпургиска ноќ“ на 17 и 24 јануари 2025

На 17 и 24 јануари 2025 со почеток во 20.00 часот на сцената на Националната опера и балет ќе се изведат балетските едночинки „Шехерезада“ и „Валпургиска ноќ“.

Еден од бисерите во балетската литература „Шехерезада“ од Н. Р. Корсаков, работен по мотивите на приказните од „Илјада и една ноќ“ ќе се изведе под диригентската палка на Бисера Чадловска, кореографијата е на познатиот балет-мајстор од Москва, Михаил Крапивин, со првична постановка на Михаил Фокин. Сценографијата е на Марија Ветероска, а костимите на Маја Бурсаќ од Србија, концерт-мајстор е Верица Ламбевска. Балетската приказна ќе ни ја раскажат: Наташа Трендафилова Гицев, Ивана Коцевска, Илијана Данилов, Франциско Хименес Руиз (Шпанија), Балаж Лочеи (Унгарија), Валери Љубенко (Украина).

Во вториот дел ќе се изведе едночинката „Валпургиска ноќ“ од Шарл Гуно. Диригент е Бисера Чадловска, кореографијата е на Михаил Лавровски, пренел и режирал, Јуриј Мјачин од Русија, сценографијата е на Илија Аризанов, а костимографијата на Изабела Поњавиќ, концерт-мајстор е Верица Ламбевска. Настапуваат: Марија Кичевска Шокаровска, Христина Наќевска Митрашиновиќ, Франциско Хименес Руиз (Шпанија), Балаж Лочеи (Унгарија), Валери Љубенко (Украина). Настапуваат првенци, истакнати солисти, солисти, балетскиот ансамбл и оркестарот на Националната опера и балет. „Валпургиска ноќ“ е всушност балетскиот дел од операта „Фауст“ на Шарл Гуно, и е првата премиера на Балетот на тогашниот Македонски народен театар (МНТ), која се извела на 27 јануари 1949 во кореографија на Ѓорѓи Македонски.

Свет

Гувернерот на Калифорнија и Маск се препукуваат околу грабежите во Лос Анџелес

 Гувернерот на Калифорнија, Гевин Њусом денеска го обвини милијардерот Илон Маск дека „поттикнува грабеж во Лос Анџелес погоден од шумски пожар преку дезинформации што ги објавува на социјалните мрежи“.

Како што објави денеска „Гардијан“, гувернерот на Калифорнија реагираше откако Маск, кој е најбогатиот поддржувач на новоизбраниот претседател Доналд Трамп, повторно објави порака на Х, чиј сопственик е, во која лажно ги обвини Њусом и неговите колеги демократи за декриминализирање на грабежите.

- Престанете да охрабрувате грабежи со лажење и велејќи им на луѓето дека е декриминализирано. Не е. Тоа е нелегално – како што и секогаш било, напиша Њусом.

Препукувањата се случуваат во услови на загриженост за грабежи откако сопствениците на куќи кои беа принудени да ги евакуираат своите домови во Лос Анџелес поради ширењето на шумските пожари, се вратија и открија дека нивните домови биле обиени.

Околу 30 лица се уапсени во евакуираните населби во Лос Анџелес, од кои повеќето се осомничени за грабежи, соопшти претходно денеска полицијата во Лос Анџелес. Еден уапсен маж беше пронајден во опожарен дом облечен како пожарникар, додека двајца мажи беа приведени во саботата пред домот на потпретседателката Камала Харис во Лос Анџелес, но подоцна беа ослободени откако не беа пронајдени докази за упад.

Македонија

ВМРО-ДПМНЕ: СДС и Филипче да покажат политичка одговорност

СДС и Филипче да покажат политичка одговорност, проактивно да соработуваат со правосудните органи и да се извинат на граѓаните што не го спречиле криминалот на Груби и ДУИ.

СДС и Филипче додека беа власт се им дозволија на коалициските партнери ДУИ. СДС и Филипче дозволија криминалот да царува а корупцијата да се прошири до пандемиски размери.

СДС молчеше и создаде атмосфера во која се перцепираа како немоќни, а истовремено беа дел и соучесници пред се она што беше очигледно а тоа е мегаломански криминал и пљачкање на народните пари.

СДС и Филипче беа директни сведоци на сомнителни активности, а во јавниот дискурс постојано проектираа слика на незнаење и неинформираност.

СДС и ДУИ да излезат на прес конференција и да се извинат на граѓаните затоа што дозволија 7 години да ги крадат народните пари.

СДС и Филипче да се изјаснат дали навистина имаат намера да покажат политичка одговорност, да започнат со јавно признавање на сопствените попусти и да се извинат пред јавноста за тоа што не презеле ништо за спречување на корупцијата од страна на ДУИ и Груби.

Филипче додека бил функционер во владата на СДС и ДУИ знаел за криминалните активности на Груби и ДУИ но молчел за да опстане криминалната коалиција ден повеќе на власт и токму поради тоа денес Филипче треба да помогне на правосудниот систем за докажување на криминалот.

СДС треба проактивно да соработува со правосудните органи и да ги сподели сите информации за кои има сознанија, за да придонесе кон расчистување на незаконските активности на ДУИ и Груби, во спротивно се друго е прикривање, и ја продолжува штетната практика на неказнивост.

СДС после два месеци откако скандалот и криминалот на Груби ја бранува јавноста се обидува да се дистанцира од ДУИ преку декларативни изјави за несогласување со нивните дејства.

Ваквиот пристап на СДС кој е лишен од конкретни чекори, не само што е површен туку ги прави соучесници и е недоволен за да се врати довербата кај граѓаните.

Ако СДС сака да изгледа барем малку одговорно, треба да се извини што го толерирале Груби, што не го спречиле кога имале шанса. А потоа, сите тие што му овозможија да дојде до оваа точка, мора да се повикаат на одговорност.

Со почит,
Центар за комуникации на ВМРО-ДПМНЕ
притисни ентер