Унгарија ја укина забраната за украински медиуми - Канал 5

Европа

Унгарија ја укина забраната за украински медиуми

Новата унгарска влада официјално ја укина забраната за украинските медиуми, воведена од администрацијата на поранешниот премиер Виктор Орбан, како дел од напорите за подобрување на односите меѓу Будимпешта и Киев.

Унгарија ја укина забраната за украински медиуми

Унгарскиот министер за социјални работи и култура Золтан Тар објави на Фејсбук дека одлуката од септември 2025 година на партијата Фидес на Орбан да блокира 12 украински медиуми имала за цел дополнително да ги продлабочи поделбите меѓу Украина и Унгарија.

Тој додаде дека новата влада на премиерот Петер Маѓар е фокусирана на градење „добрососедски односи“. Најавата на Тар дојде неколку дена откако унгарскиот амбасадор во Украина, Федир Шандор, објави дека забраната ќе биде укината.

Орбан, често сметан за најпроруски европски лидер, ја воведе забраната за време на еден од многуте дипломатски судири меѓу Будимпешта и Киев за време на руската инвазија на Украина.

Забраната беше одговор на потегот на Украина

Во средината на септември, Украина го ограничи пристапот до неколку странски медиуми поради, како што рече, систематско ширење на руски наративи и пропаганда. Меѓу нив беа унгарските медиуми Ориго и Демократа.

Во тоа време, владата на Орбан го нарече потегот на Украина „целосно неоправдан напад“. Како одговор, Будимпешта блокираше 12 украински медиуми, вклучувајќи ги „Украинска правда“, „Европска правда“, „Нов глас“, „Хромадске“ и „ТСН“, некои од најчитаните медиуми во Украина.

Во тоа време, министерот на кабинетот, Гергели Гуљас, ги бранеше унгарските медиуми, тврдејќи дека тие „имале храброст критички да пишуваат за политиката на санкции против Русија, воената помош за Украина и да ги прикажат Европската унија и НАТО како поделени и неефикасни организации“.

Тар сега тврди дека овие медиуми ја прекршиле новинарската етика и дека „наместо тоа ширеле руска пропаганда и закани од Трета светска војна“. Украина сè уште не објавила дали ќе ја укине забраната за унгарските медиуми. Според медиумот „Киев Индепендент“, веб-страницата „Орига“ е повторно достапна, додека порталот „Демократа“ е сè уште блокиран.

Обид за обновување на односите со Украина

Во последните недели, новата влада на Петер Маѓар се обидува да ги врати односите со Украина, кои Орбан систематски ги оштетуваше со години. Порано оваа недела, Унгарците започнаа итна внатрешна истрага против државните институции поврзани со аферата позната како „златен конвој“.

На почетокот на март, унгарските власти запреа две банкарски возила што патуваа од Австрија до Украина, превезувајќи готовина и злато со вкупна вредност од околу 82 милиони долари. Наведената причина беше истрага за можно перење пари.

Вработените во украинската државна банка Ошчадбанк, кои ја следеа пратката, беа накратко приведени, но ослободени веќе следниот ден. Киев ги отфрли сите обвинувања и ја нарече заплената „државен тероризам“.

Тагови: Унгарија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

На сцената на НУЦК „Трајко Прокопиев“ – Куманово вчеравечер одекна силен и долг аплауз за екипата на НУ Народен театар Битола, која со својата изведба повторно ја воодушеви и ја насмеа до солзи публиката која ја исполни салата до последното столче.

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

„Секстет“ и овојпат покажа дека добрата комедија не познава граници – се игра, се чувствува и се споделува со публиката.

„Од срце му благодариме на организаторот на фестивалот „Денови на комедијата“ за поканата, прекрасното добредојде и гостопримството. До следната средба – со уште многу смеа, аплаузи и театарски моменти“, истакнуваат од Битолскиот театар.

Претставата „Секстет“ секогаш го полни гледалиштето до последното место, комедијата од Марк Камолети, во режија на Марјан Георгиевски, па така и овојпат салата беше исполнета со публика која ги награди актерите на Битолскиот театар со долготрајни аплаузи.

Недоразбирања, тајни, љубовни заплети и урнебесни пресврти секогаш ја тераат публиката да се смее од почеток до крај.

Зошто комедија? Затоа што премногу долго сме сериозни.

Живееме во време на прегласни информации и постојани кризи.

Научивме како да бидеме загрижени, заборавивме да се смееме. Во претставата играат: Бернар -Николче Пројчевски, Жаклина-Катерина Аневска Дранговска, Роберт -Александар Димитровски, Сузан-Сандра Грибовска Илиевска, Сузет -Анастасија Чипуровска, Џорџ-Борче Ѓаковски.

Костимографијата е на Андреј Георгиевски, сценографијата на Влатко Чачоровски, музика -Александар Димовски.

29.издание на Фестивалот оваа година се одржува од 23 септември до 5 октомври. Во текот на фестивалските денови, публиката има можност да проследи театарски претстави исполнети со хумор, квалитетна актерска игра и препознатлива фестивалска атмосфера преку изведба на театрите од Македонија и земјите од регионот. Фестивалот ќе биде затворен со претстава надвор од конкуренција, посветена на годинашниот лауреат Игор Џамбазов. Фестивалот е поддржан од Министерството за култура и туризам и од Општина Куманово.

Тагови: Денови на комедијата

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

Директорот на Бирото за јавна безбедност Александар Јанев денеска се обрати на Централниот меморијален турнир во мал фудбал во чест на загинатите бранители 2001–2015, кој се одржува во спортскиот центар „Борис Трајковски“. 

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

На настанот се обрати и министерот за одбрана Владо Мисајловски, кој го отвори Меморијалниот турнир.

Пред членовите на семејствата на загинатите бранители, претставниците на Здружението „Херои на Македонија 2001–2015“, колегите и натпреварувачите, директорот Јанев истакна дека турнирот веќе 24 години ја чува жива меморијата за оние кои ги положија своите животи за Македонија, нејзиниот мир и безбедноста на граѓаните.

„Денес не сме тука само поради традицијата. Тука сме затоа што имаме обврска да паметиме. Да ги паметиме нашите колеги, пријатели, браќа, сопрузи, татковци и синови кои ја носеа униформата со чест и кои, извршувајќи ја својата должност, ја дадоа најголемата жртва што човек може да ја даде. Нивните имиња не се само дел од историјата на нашите безбедносни сили. Тие се дел од историјата на Македонија“, истакна Јанев.

Тој нагласи дека обврска на денешните генерации е споменот за загинатите бранители да се пренесува и на генерациите што доаѓаат, потсетувајќи дека слободата, мирот и безбедноста не треба да се земаат здраво за готово. Посебна почит им оддаде на семејствата на загинатите, нагласувајќи дека институциите имаат обврска да покажат дека жртвата на нивните најблиски никогаш нема да биде заборавена.

Министерот за одбрана Владо Мисајловски истакна дека мора да се чува споменот за оние кои го дале својот живот за татковината и да се пренесе на следните генерации.

„Она што треба да го направиме е да се сплотиме и да покажеме дека хероите не се забораваат. Се заблагодарувам на секој еден припадник на Армијата, сите што ја носат униформата кои секојдневно работат за нашата држава. Министерството за одбрана ќе биде секогаш тука да помогне и достојно да покаже почит кон хероите“, истакна министерот Мисајловски.

На крајот, директорот Јанев изрази благодарност до Здружението „Херои на Македонија 2001–2015“, Министерството за внатрешни работи и сите кои веќе 24 години ја одржуваат оваа традиција, порачувајќи дека хероите живеат сè додека ги паметиме и дека им должиме да ги паметиме со гордост, достоинство и благодарност.

Тагови: Александар Јанев

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВЛЕН: Брисел позитивно ги оцени реформите, земјата доби 140 милиони евра од Планот за раст

ВЛЕН ја поздравува позитивната оценка на претседателката на Европската комисија, Урсула фон дер Лајен, за напредокот во спроведувањето на Планот за раст.

ВЛЕН: Брисел позитивно ги оцени реформите, земјата доби 140 милиони евра од Планот за раст

За време на посетата во Скопје, таа го оцени постигнатиот напредок како импресивен и најави нови исплати во наредните недели. Северна Македонија досега доби 140 милиони евра од овој план.

Овие средства се резултат на сериозната работа и посветеноста на институциите во исполнувањето на преземените обврски.

Министерството за европски прашања, предводено од првиот вицепремиер Беким Сали, го координира спроведувањето на Реформската агенда и го следи исполнувањето на обврските на институции.

За нас, оваа оценка е дополнителен поттик да продолжиме со работата и навреме да ги исполниме следните обврски.

Ги поздравуваме заложбите на Брисел за деблокирање на европскиот пат на земјата и очекуваме да се надминат пречките за земјата да напредува во преговорите со Европската Унија.

ВЛЕН

Тагови: ВЛЕН

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер