Премиерот Виктор Орбан, кој е критикуван од Европската унија за кршење на владеењето на правото, предложи државата да ја игнорира судската пресуда за обештетување на децата Роми во селото Ѓонѓоспата, а наместо тоа, да им обезбеди обука.
Основниот суд и нареди на државата да ги плати трошоците за парницата, што трае скоро една деценија. Унгарскиот Врховен суд наскоро треба да ја донесе конечната пресуда .
Со падот на економијата и намалената важност на неговата антиимигранска кампања, аналитичарите велат дека Орбан сака да ги мобилизира своите гласачи со таргетирање на независните судови, ромското малцинство и невладините организации кои им помагаат.
„Мешањето на владата во реституцијата на Ѓонѓоспата е нелегално и го нарушува владеењето на правото и независноста на судовите“, објавуваат организаторите на протестите на Фејсбук.
Орбан е на власт од 2010 година, а неговата партија Фидеш ја предводи анкетата на јавното мислење за нивниот антиимигрански став. Сепак, Фидеш доживеа изненадувачки пораз на локалните избори минатиот октомври кога опозицијата ја зазеде Будимпешта.
Орбан рече дека „одлуката на судот за сегрегација го разбранува јавното мислење со тоа што им препиша големи суми пари на некои жители Роми“. Тој исто така рече дека адвокатите ја користеле пренатрупаноста во затворите за да покренат 12.000 судски спорови против владата за кршење на затворските стандарди пропишани од Европската унија. Адвокатите велат дека Орбан го поткопува владеењето на правото.
Фидеш тврди дека луѓето поврзани со милијардерот Џорџ Сорос, кој има унгарско потекло им помогнале на Ромите да покренат тужба.
До денес, скоро 500 психолози потпишаа петиција против владината кампања за која велат дека може да предизвика омраза меѓу Ромите и другите жители. Ромите сочинуваат пет до седум проценти од популацијата на Унгарија.