Уморни сте од молчење? Научете како да преговарате - Канал 5

Живот

Уморни сте од молчење? Научете како да преговарате

Колкупати сте одложиле важен разговор бидејќи не сте знаеле како да го започнете? Колкупати подоцна во себе сте се преиспитувале: „Зошто не кажав така“?

Уморни сте од молчење? Научете како да преговарате

Во многу ситуации жените знаат што сакаат. Знаат дека заслужуваат подобра плата, појасна поделба на обврските, поголемо почитување или едноставно – повеќе простор за себе. Меѓутоа, помеѓу желбата и изговорената реченица најчесто стои страв. Страв од конфликт, страв од тоа да бидат погрешно сфатени, страв да не се наруши односот.

Затоа комуникацијата станува место на внатрешна борба. Наместо да биде алатка за разбирање и договор, таа станува извор на анксиозност и преиспитување.

Вештина на дијалогот – Како да го кажете она што ви е важно

Дијалогот не е монолог или разговор без поента. Тој подразбира рамнотежа – помеѓу изговореното и сослушаното, помеѓу сопствените потреби и туѓите очекувања.

Многу жени растеле со пораката дека треба да бидат прилагодливи, стрпливи и фини. Тие особини сами по себе се проблем, проблемот е кога прилагодувањето прераснува во постојано потиснување на сопствениот став.

Вештина на дијалогот значи да умееме :

да го кажеме она што го мислиме без напад

да поставиме граници без драма

да го задржиме мирот дури и кога разговорот е непријатен.

Тоа е способноста да кажеме: Ова ми е важно; со ова не се согласувам; ова не можам да го прифатам.

Без потреба да објаснуваме во 10 реченици, без иронија, без пасивна агресија.

Дијалогот станува квалитетен дури кога во него се појавуваат двете страни- и вие и соговорникот. Ако постојано се повлекуваме или постојано се браниме, рамнотежата е нарушена.

Асертивната комуникација ја враќа таа рамнотежа.

Зошто е преговарањето важно?

Преговарањето често се врзува со деловните состаноци и разговори за плата, но вистина е дека преговараме секој ден – и тоа многу почесто приватно отколку во професионалниот живот.

На пример, преговараме кога со партнерот се договараме кој ќе го земе детето од школо, кога одлучуваме кој ќе остане дома кога детето е болно, или кога ги распределуваме домашните обврски или го планираме семејниот буџет.

Во тие ситуации, често не се доживуваме како „преговарачи“, туку како личности кои треба да имаат разбирање и да бидат флексибилни. Па наместо да прашаме: Како ќе го поделиме ова?

Најчесто велиме: Јас ќе го средам тоа.

Со тек на време, таквата динамика станува непишано правило. Едната страна презема премногу обврски, а другата се навикнува помалку да учествува, а незадоволството се зголемува - без отворен разговор.

Преговарањето во партнерските односи не значи борба за контрола, туку рамноправно учество при носење на одлуки.

На пример, „Оваа недела имам важна обука. Може ли да ги преземеш школото и тренизните“?

„Важно ми е да ги поделиме обврските порамномерно. Ајде да направиме распоред кој ќе биде фер за двајцата“.

„Не можам само јас да ги менувам плановите, ми треба и твоја поддршка“.

Кога преговараме, не создаваме конфликт, туку стануваме појасни.

Преговарањето ја враќа рамнотежата во секојдневните ситуации што често ги земаме здраво за готово. Тоа не е знак на себичност, туку знак за одговорност според сопственото време, енергија и граници.

Активно слушање: основа на секој договор

Комуникацијата не е само говор. Еден од најважните делови на преговарањето е способноста да ја слушнеме и другата страна.

Активното слушање подразбира

непрекинување на соговорникот за веднаш да реагираме

да се обидеме да разбереме што стои зад барањето

да провериме дали добро ја сфативме пораката

Кога луѓето се чувствуваат сослушано, се намалува потребата за одбрана и повишување на тонот. Се отвора простор за решение.

Активното слушање не значи откажување од сопствениот став, тоа значи дека разговараме за да се договориме, а не да победиме.

Но пред секое надворешно преговарање, постои она внатрешното, пред да ја изговориме реченицата.

Дали претерувам?

Можеби не е вистински момент.

Можеби е полесно да преќутам.

Внатрешната борба најчесто е погласна од самиот разговор. Тоа не е слабост, туку резултат на годините навика да бидеме разумни, флексибилни и „добри“. Научени сме прво да провериме дали на другите им е во ред, пред да провериме дали нам ни е во ред.

Затоа преговарањето не е само вештина на комуницирање, тоа е средба на сопствените стравови, од одбивање, неразбирање, од конфликти.

Тука се појавува она што се нарекува тивка моќ.

Тивката моќ не е во доминацијата, не е во потребата да бидеме погласни од другите. Таа се огледува во мирната одлучност. Во способноста да кажеме „не“ без драма. Да останеме смирени кога другата страна го повишува тонот.

Да не се откажуваме од себеси, дури и кога е непријатно

Тивката моќ значи дека знаеме кои сме и што ни е важно – и дека тоа можеме да го изговориме без потребата да се браниме.

Токму таа комбинација на внатрешна стабилност и јасна комуникација го прави преговарањето силно. Не затоа што никого не го надвикуваме, туку затоа што престануваме да го потиснуваме во себе.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Ким Кардашијан има пет дадилки за своите четири деца: „Една е секогаш на должност“

Ким Кардашијан, 45-годишната основачка на брендот „SKIMS“, во ново интервју откри детали за тоа како го организира животот со четирите деца што ги има со поранешниот сопруг, Канје Вест. 

Ким Кардашијан има пет дадилки за своите четири деца: „Една е секогаш на должност“

Заедно ги имаат ќерките Норт (13) и Чикаго (8) и синовите Сејнт (10) и Псалм (7), при што Кардашијан е нивниот примарен старател.

Кардашијан за „Тајмс“ откри дека има помош околу грижата за децата, ангажирајќи пет дадилки кои се менуваат. Таа објасни дека „една е секогаш на должност“, додека „останатите четири се менуваат во смени“.

Таа секој ден ги вози на училиште

И покрај тоа што има помош, Кардашијан вели дека е активно вклучена во секојдневниот живот на своите деца. Таа лично ги вози на училиште и ги зема оттаму секој ден, а секоја вечер заедно вечераат. „Мислам дека сум умерено строга мајка. Многу сум трпелива и им давам многу љубов. Децата сè уште можат да спијат во мојот кревет кога и да посакаат, а јас им читам секоја вечер пред спиење“, рече таа.

Таа се грижи за јавното експонирање на децата

Во интервјуто, таа се осврна и на прашањето за јавното експонирање на нејзините деца – особено на најстарата ќерка, Норт, која е популарна на „TikTok“ и сè повеќе се занимава со музика. Кардашијан призна дека се грижи за учеството на децата во семејното реално шоу „The Kardashians“. „Секое дете учествува онолку колку што се чувствува пријатно. Помалите деца се појавуваат додека снимам, но немаат некои големи улоги во серијата. Норт ужива во тоа малку повеќе од другите, па морам малку да ја ограничувам“, објасни таа. Таа додаде дека Норт е најмногу заинтересирана за проекти кои нудат јавно експонирање, поради што нејзините родители се обидуваат внимателно да ги избираат можностите што таа ги прифаќа, наместо да се согласуваат на сè што ѝ се нуди.

Кога станува збор за музиката, Кардашијан вели дека подобро комуницира со Канје Вест на таа тема. Тие се погрижуваат да бидат усогласени и се осигуруваат дека Норт учествува само во проекти што и двајцата ги одобриле.

Извор: Индекс.хр

Тагови: Ким Кардашијан

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Хаос во Франција: Се затвораат до 500 средни училишта, 24 се запалени или вандализирани

Училиштата се затвораат кога не се исполнети безбедносните услови – било поради оштетување на имотот или поради тоа што вработените биле директно загрозени.

Хаос во Франција: Се затвораат до 500 средни училишта, 24 се запалени или вандализирани

Францускиот министер за образование, Жан-Мишел Бланке, денес соопшти дека утре целосно или делумно ќе бидат затворени меѓу 400 и 500 средни училишта во Франција поради последиците од насилните студентски протести, додека најмалку 24 училишни објекти биле запалени или вандализирани.

„Наставата беше прекината во меѓу 400 и 500 образовни установи во петокот, а веројатно сличен број ќе бидат затворени и во понеделник, иако со делумно и постепено продолжување на наставата“, изјави Бланке, пренесува весникот „Ле Фигаро“.

Францускиот министер наведе дека 78 вработени во образовниот систем се повредени откако започнаа протестите.

Според него, училиштата се затвораат кога не се исполнети безбедносните услови – било поради оштетување на имотот или поради тоа што вработените биле директно загрозени.

Бланке рече дека одредени припадници на крајната левица се приклучиле на протестите, обвинувајќи ги дека го злоупотребиле студентското движење и прибегнале кон насилство.

„Ова претставува ризик и за нашиот персонал и за учениците. Повредени се 78 вработени во образованието – нешто што досега не сме го виделе. Тие беа намерно нападнати бидејќи работат во образованието“, изјави министерот.

Протести низ Франција

Протестите и блокадите на средните училишта започнаа на 17 септември во регионот на Париз, а потоа се проширија низ целата земја. Ситуацијата, како што забележува францускиот весник, ескалираше во четвртокот во неколку француски градови.

Петокот беше одбележан со тензии и повеќе од 1.700 приведени лица, со што вкупниот број на приведени од почетокот на неделата достигна околу 5.000.

Организаторите повикаа протестите да продолжат и во вторник, наведувајќи дека не добиле „конкретни мерки“ од властите.

Учениците што учествуваат во протестите, меѓу другото, бараат повеќе персонал и зголемени средства за образованието, а истовремено се жалат на притисокот од системот за упис на универзитетите, недостигот на наставници-заменици, лошата состојба на училишните згради и преоптоварените распореди на часовите.

Извор: Б92

Тагови: Франција

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Пукање во близина на границата меѓу Норвешка и Шведска: Убиени татко и син

Татко и син загинаа, а трет маж беше тешко ранет во пукање во близина на Халден, во југоисточна Норвешка. Осомничениот, маж на возраст од околу 30 години, бил совладан од присутните на местото на настанот пред да пристигне полицијата.

Пукање во близина на границата меѓу Норвешка и Шведска: Убиени татко и син

Жртвите биле маж во седумдесеттите години и неговиот син, кој бил во четириесеттите години. Сите тројца биле дел од ловечка група собрана на имот во близина на езерото Ершеен, недалеку од шведската граница.

Напаѓачот совладан пред пристигнувањето на полицијата

Според норвешките медиуми, осомничениот не бил дел од ловечката група.

По пукањето, луѓето присутни на имотот успеале да го совладаат и да го задржат до доаѓањето на полицијата. Полицијата верува дека тој дејствувал сам и соопшти дека нема опасност за јавноста.

Според досегашните информации, во нападот била употребена ловечка пушка. Норвешките медиуми исто така известуваат дека осомничениот поседувал дозвола за две парчиња огнено оружје.

Адвокат: Тој ја признал кривичната одговорност

Адвокатот на осомничениот, Оле Ричард Холм-Олсен, изјави дека неговиот клиент ја признал кривичната одговорност за двете убиства и за ранувањето на третото лице.

Според адвокатот, осомничениот писмено ја признал кривичната одговорност и се согласил на притвор, но во моментов не сака да даде изјава пред полицијата.

Мотивот сè уште непознат

Полицијата сè уште истражува зошто осомничениот отворил оган и каква поврзаност имал со луѓето на имотот. Истражителите се сомневаат дека тој ја познавал групата или некои од нејзините членови, но според досега објавените информации, тој не бил во роднинска врска со загинатите или со ранетиот маж.

По пукањето, полицијата ја пребарала околината и блиските објекти за да провери дали има други напаѓачи или жртви. Не биле пронајдени други жртви ниту дополнителни напаѓачи.

Извор: Индекс.хр

Тагови: пукање

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер