Премиерот Денис Смигал рече дека заклучувањето за време на викендот ќе стапи на сила од 14 до 30 ноември.
Оваа одлука ќе значи затворање или ограничување на активностите на повеќето бизниси и продавници за викенд, со исклучок на оние што продаваат намирници. Ќе работат аптеките, болниците и јавниот превоз.
Владата исто така ги заостри ограничувањата за рестораните, кината, спортските сали и јавните настани.
„Ако не сториме ништо, тогаш околу 10, 15 декември, здравствениот систем повеќе нема да може да прима луѓе, нема да има места во болниците, дури ни во ходниците“, рече Смигал на владина седница.
„Задачата е да се намали протокот на луѓе за време на викендите, оние што можат да останат дома треба да останат дома“, рече тој.
Дневниот број на заразени започнал да расте кон крајот на септември и останал висок во октомври, а овој тренд продолжува и во ноември. Владата затоа одлучи да продолжи со некои ограничувања до крајот на оваа година, а меѓу нив да се носат заштитни маски во јавност и се ограничува работата на кафулињата.
Поранешната советска република досега регистрирала вкупно 489.808 случаи на коронавирус, 8.947 жртви и 221.459 закрепнати.
„Имаме прилично напната ситуација, ковидот се шири како ураган“, рече министерот за здравство Максим Степанов на владина седница. „Ние мора да го запреме ова за да немаме 10 000 пациенти секој ден“, истакнал тој.
Сепак, бизнисмените протестираат против плановите за затворање, скоро две илјади луѓе протестирале во Киев, а неколку стотици од нив се собрале пред зградата на владата.
Повеќето вработени во рестораните и киносалите од главниот град носеле транспаренти на кои пишува „Дозволете ми да работам“, „Нема работа, нема даноци“.
Украина е една од најсиромашните земји во Европа и во голема мера зависи од помошта на западните доверители.