Свет

Украина, одбраната, конкурентноста и Блискиот Исток главни теми на октомврискиот Самит на ЕУ

Војната во Украина, зајакнувањето на европската одбрана и конкурентност и најновиот развој на настаните на Блискиот Исток ќе бидат главни теми на Самитот на ЕУ предвиден за 23 и 24 октомври во Брисел.

Војната во Украина, зајакнувањето на европската одбрана и конкурентност и најновиот развој на настаните на Блискиот Исток ќе бидат главни теми на Самитот на ЕУ предвиден за 23 и 24 октомври во Брисел, најави денеска претседателот на Европскиот совет Антонио Кошта во поканата за учество на состанокот упатена до шефовите на држави или влади на членките на Унијата.

Кошта во поканата наведува дека во услови кога Русија продолжува со своите немилосрдни напади врз украинските цивили и цивилна инфраструктура, потребно е зголемување на поддршка на ЕУ за Украина, преку финансиска помош и разгледување на можните опции за користење на замрзнатите руски средства.

- И поддршката за Украина и притисокот врз Русија остануваат двата неопходни услови за постигнување праведен и траен мир, наведе Кошта, додавајќи дека на почетокот на дискусијата за Украина лидерите ќе „имаат можност да го слушнат“ и украинскиот претседател Володимир Зеленски.

Кошта натаму наведува дека ќе продолжи и дебатата за одбраната и во тој контекст лидерите би требало да ги овластат министри за одбрана на земјите членки да обезбедат имплементација на одбранбените иницијативи и планови и да ја зајакнат Европската агенција за одбрана.

- Хибридните напади, регистрирањето на дронови во близина на нашата критични инфраструктура и непријателските упади во воздушниот простор на земјите членки се уште една демонстрација на итноста од забрзување на работата за постигнување на подготвеност на заедничката европска одбрана до 2030 година, посочува Кошта во поканата.

Тој натаму најавува и дебати за конкурентност и дигиталната и зелената транзиција, со посебен осврт на напорите за административни поедноставување на процедурите, истовремено остварување на климатските цели и зајакнување на конкурентноста на Европа и обезбедување на европски дигитален суверенитет.

На Самитот се предвидува да стане збор и за состојбата на Блискиот Исток, во услови кога, како што наведува Кошта, се чини дека по две години војна и страдање на луѓето мирот во Газа е на дофат.

- Со оглед на најновите случувања ќе разговараме како ЕУ може да ги поддржи тековните напори за праведен и траен мир, цврсто заснован на решението за две држави, како и за обновата на Газа, додава претседателот на Европскиот совет.

Кошта во поканата додава дека предвидува на Самитот да се расправа и за економскиот раст и просперитет, за проблемите со домувањето во ЕУ и за зајакнување на меѓународната улога на еврото, за чија цел на лидерите во дебатата по овие прашања ќе им се придружат и претседателката на Европската централна банка, Кристин Лагард, и првиот човек на Еврогрупата, Паскал Донохју, како и да се дискутира за „важната тема за миграцијата“.

- Ќе го започнеме нашиот состанок в четврток (23 октомври) во 10:00 часот со нашата традиционална размена на мислења со претседателката на Европскиот парламент. Како и обично, доколку нашите дискусии го дозволат тоа, ќе се стремам состанок да трае еден ден. Се радувам што ќе ве видам во Брисел, додава Кошта во поканата до лидерите на ЕУ за учество на октомврискиот Самит.

Тагови: ЕУ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Зеленски до Путин: Русија повторно избира војна наместо мир

Пропадна обидот Путин и Зеленски да седнат на преговарачка маса, откако рускиот лидер категорично го отфрли повикот на украинскиот колега, а на терен продолжија борбите.

Украина со 86 дронови го нападна Санкт Петербург, додека руските сили возвратија со воздушни напади околу Запоржје, каде загинаа две лица.

-Не гледам смисла за средба. Имам чувство дека украинската страна сака да го запре напредокот на нашите вооружени сили. Нам ни требаат договори. Во однос на воените дејствија, тие еден ден ќе завршат, безусловно ќе завршат кога ќе ги постигнеме поставените цели, изјави Путин.

Зеленски изјави дека со тоа што неговиот рускиот лидер одбил директни преговори, избрал продолжување на војната.

-За жал, руската страна уште еднаш избра војна. Сите го слушнаа одговорот денеска. Слаб одговор. Тој едноставно не сака крај на војната. Многумина во светот сега се разочарани од таквиот одговор. Тој не сака ништо да промени и не сака да признае дека оваа војна му се допаѓа само нему и на оние кои заработуваат пари од него, заклучи Зеленски.

Неговата изјавата следи откако тој вчера преку отворено писмо го повика Путин на средба лице в лице за ставање крај на војната, но Путин одби, истакнувајќи дека разговорите би немале цел пред да биде финализиран мировниот договор..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Шоу биз

Шакира и Бурна Бој го отвораат Светскиот шампионат во Мексико, шоу и во Торонто и Лос Анџелес

Светската музичка ѕвезда, Шакира и Бурна Бој ќе ја изведат официјалната песна „Dai Dai“ на отворањето на Светското фудбалско првенство 2026 во Мексико Сити, соопшти ФИФА.

Настапот ќе се одржи на 11 јуни, пред првиот натпревар на турнирот меѓу домаќинот Мексико и Јужна Африка.

Церемонијата на свеченото отворање ќе започне 90 минути пред стартот на натпреварот, а покрај Шакира и Бурна Бој, на сцената во Мексико Сити ќе настапат и Алехандро Фернандес, Белинда, Дени Оушн, Џеј Балвин, Лила Даунс, Лос Анџелес Азулес, Мана и Тјала.

„Dai Dai“ е официјална песна на Светското првенство 2026 и е поврзана со FIFA Global Citizen Education Fund, иницијатива што има цел да собере 100 милиони долари за пристап до квалитетно образование и фудбалски можности за деца ширум светот.

ФИФА за ова издание на Мундијалот планира три церемонии на отворање — по една во секоја земја домаќин: Мексико, Канада и САД. Во Торонто, на 12 јуни, пред натпреварот меѓу Канада и Босна и Херцеговина, ќе настапат Аланис Морисет и Мајкл Бабл. Во Лос Анџелес, истиот ден, пред дуелот меѓу САД и Парагвај, најавени се Кети Пери, Лиса, Рема, Анита и Фјучер.

Шакира има долга историја со Светските првенства: настапуваше и на претходни мундијалски изданија, а нејзината „Waka Waka“ од 2010 година останува една од најпознатите фудбалски химни во светот. Со „Dai Dai“, таа повторно се враќа на најголемата фудбалска сцена, овојпат заедно со нигериската ѕвезда Бурна Бој.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Инвеститори веќе нудат 150 милијарди долари за компанијата на Маск

Светот полуде по акциите на компанијата на Маск - Инвеститорите веќе нудат 150 милијарди долари.

Интересот на инвеститорите за првичната јавна понуда на акции (IPO) на вселенската компанија SpaceX моментално е приближно двојно поголем од планираниот износ на емисија од 75 милијарди долари, објави Ројтерс, повикувајќи се на извори запознаени со ситуацијата.

Изворите наведуваат дека инвеститорите досега изразиле побарувачка во вредност од околу 150 милијарди долари. Иако таквото ниво на интерес не е невообичаено за помали јавни понуди, аналитичарите проценуваат дека тоа претставува значаен сигнал за доверба на пазарот, имајќи предвид дека станува збор за најголемата IPO во историјата.

Конечната цена на акциите треба да се утврди на 11 јуни, додека почетокот на тргувањето на берзата Nasdaq е планиран за 12 јуни. SpaceX планира да собере 75 милијарди долари по акција, со цена од 135 долари, што би ја вреднувало компанијата на околу 1,75 трилиони долари.

Компанијата, основана и предводена од американскиот претприемач Елон Маск, е најголемата приватна вселенска компанија во светот и лидер во областа на лансирање ракети и сателитски комуникации.

Нејзината сателитска мрежа Starlink обезбедува интернет услуги низ целиот свет, додека компанијата развива и напредни проекти поврзани со истражување на вселената и вештачка интелигенција. SpaceX доверливо поднесе барање за IPO во април, а се очекува нејзината јавна понуда да стане најголема во историјата на пазарот на капитал.

Тагови: Илон Маск

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.