УЈП ги суспендираше инспекторите опфатени во предистрагата на обвинителството поврзана со пожарот во дискотеката Пулс во Кочани. Откако ИРЛ објави пораки помеѓу Михајло Јованов, синот на газдата на Пулс, и инспектори од УЈП, ДПИ и полицијата, од УЈП за Канал 5 велат дека решението за суспензија е донесено за да се заштити институционалниот интегритет се до додека трае постапката.

„Во објавата беа презентирани комуникации меѓу вработени лица и даночен обврзник, кои укажуваат на можност за оддавање на даночна тајна, како и неовластено информирање за претстојни контроли и координирани активности со други надлежни институции. Ваквото однесување претставува сериозно прекршување на Кодексот на однесување на вработените во УЈП.“

ИРЛ објави комуникација на синот на газдата на Пулс со инспекторот од УЈП Драган Паунов, кој инаку е брат на в.д претседателката на Кривичен, Даниела Димовска, како и со даночниот контролор Дуле Димитирев од УЈП – Штип. Државниот обвинител Љупчо Коцевски потврди дека се води уште една предистрага во која се опфатени не само за инспекторите од УЈП туку и лица од други институции. Прашан околу тоа дали обвинителството ќе истражува евентулани влијанија врз постапката, Коцевски не одговори конкретно, но уверува дека нема да се пропушти ниедно инкриминирачко дејствие.

„Овие податоци изнесени од ИРЛ не се ништо ново. Сите овие пораки се испратени до одбраната, до судот, ги имаше и МВР. Но тоа се многу малку пораки во однос на она што Обвинителството располага во моментов, и има таму можеби уште десетина инкриминирани дејствија. Што значи постапката воопшто не е затворена не само во однос на УЈП туку и во однос на други институции.

Тајна е постапката, не можеме да кажеме кои се сторители, но кажав на почеток, ова е ерозија на системот. Обвинителите нема да пропуштат ниту едно дејствије, ниту потенцијален сторител што извршил инкриминирани дејствија а да не биде опфатен со истрага.“

Обвинението за пожарто во Пулс според најавите од Кривичен ќе биде оценето до крајот на неделава. Предметот за осомничените полициски службеници од Кочани и Штип пак кој го води Обвинителството за организиран криминал и корупција е сеуште во истрага.

Инаку, Советот на јавни обвинители денеска констатираше дека завршува мандатот на претседателката Душица Димитриеска а изборот за нов претседател е одложен до завршување на изборите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.