Нагласувајќи дека неговата улога таму била активна и суштинска, Мицкоски потенцираше дека на форумот учествувал на три различни панели со луѓе од врвот на светскиот бизнис. Кажа дека во Давос имал средби и со шефови на држави и влади, но не откри конкретно со кои. За тоа колку и кои економски проекти и инвестиции договорила македонската делегација на бизнис форумот премиерот побара трпение, а јавноста како што кажа, ќе ги дознае сите еден по еден во следниот период.

-Јас не бев статиста на форумот или по ходници да барам селфи со учесниците на Давос туку бев активен учесник на три панели. Бидејќи беа „четам хаус“, штета што не можеме да ги објавиме моите говори но сите беа проследени со аплауз од страна на присутните. На еден од тие панели до мене беше главниот извршен директор на АС, најгоемата „офф шор“ американска енергетска компанија чии што приходи се мерат во трилиони, илјадници милијарди. Лево од мене беше г-динот Врајт државниот секретар на САД за енергија, до него беше главниот извршен директор на Светската енергетска агенција, изјави Мицкоски.

За критиките од СДСМ и опозицијата дека Владата ја носи земјава во меѓунардна изолација и води антиевропска политика, Мицкоски вели не сака да коментира, но порача дека времето на дипломатија на свиткана кичма завршило.

-Не би коментирал сега тоа што го кажува СДСМ и останатите опозициски партии. Нашата меѓународна активност, дали е изолирана или не, гледаат граѓаните тие се тие коишто кажуваат на избори. Можам да кажам дека времето на дипломатијата на свиткана кичма и снисходливост на црвените дебели килими помина сега е дипломатија која носи реални резултати, дипломатија која што се бори и го чува македонските национални интереси. Инаку да, имав и ќе имам сега на Михенската безбедносна конференција уште такви средби, изјави Мицкоски.

Тет а тет средба со лидерот на ДУИ Ахмети ќе има ама некогаш, одговори премиерот прашан дали и кога би седнал очи во очи со Ахмети, опција што беше спомената по лидерската средба. Овој став на Мицкоски доаѓа откако ДУИ ја откажа првично договорената поддршка за проектот „Сејф сити“ и не гласаше за Законот за прекршоци, ниту за народниот правобранител кој сепак, го доби мнозинството и потребниот Бадентер во Собранието.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.