Македонија

Триесет и шест нови волонтери на Мировен корпус положија заклетва

Ќе работат како специјалисти и наставници по англиски јазик.

Соработката и партнерството кои ги поврзуваат луѓето од различни земји и култури поттикнуваат меѓусебно разбирање, справување со различни предизвици и овозможуваат заеднички просперитет. Ангажманот на волонтерите е пример за моќта на таквата соработка. Тие речиси три децении го вложуваат своето искуство во градењето генерации на ученици со поголеми знаења и вештини, за што сме им многу благодарни, порача денеска министерката за образование и наука Весна Јаневска, на настанот по повод положување заклетва на 36 нови волонтери на Мировниот корпус во Скопје.

Новите волонтери ќе се приклучат на групата која брои повеќе од 900 волонтери кои служеле во Македонија. Ова е дваесет и седмата група која ќе живее и работи во нашата држава од отворањето на првата канцеларија на Мировниот корпус во Скопје во 1996 година.

На настанот денеска беше одбележано успешното завршување на интензивната 11-неделна обука во која волонтерите ги изучуваат македонскиот и албанскиот јазик и култура.

По давањето заклетва, новите волонтери на Мировниот корпус ќе ја почнат својата двегодишна служба во заедниците низ Северна Македонија. Тие ќе работат како наставници по англиски јазик заедно со локални наставници по англиски јазик, а дел од нив ќе служат како специјалисти за развој на заедницата кои ќе работат со различни организации и општини.

Министерката Јаневска во своето обраќање информираше дека волонтерите ќе помагаат за изучување на англискиот јазик во 17 училишта. Таа напомена оти верува дека тие ќе ја засакаат нашата држава и ќе го вложат целото свое знаење и умеење, за да им помогнат на учениците да го совладаат англискиот јазик.

-Денеска ги поздравуваме и им посакуваме добредојде на 36 наши нови пријатели, од кои дел почнуваат со волонтирање во 17 училишта распределени во различни локални заедници од нашата убава држава. Длабоко верувам дека нелагодноста што ги оставиле своите семејства и пријатели и удобноста на домот, во претстојните две години од ден на ден ќе ја заменуваат со радост од запознавањето на нова култура, обичаи и новите луѓе, кои за нас се нашето најголемо богатство. Не се сомневам дека новите волонтери, одбрани со одлични препораки, обуката што ја имаа овде ќе биде значајна помош на заедниците, каде што ќе работат исто како и сите нивни претходници, рече Јаневска.

Таа додаде дека соработката со професорите по англиски јазик во училиштата не само што ќе ги зајакне јазичните вештини на учениците, туку ќе ја поттикне нивната љубопитност преку игри, приказни, практични активности и други креативни методи за учење странски јазик.

Според министерот за локална самоуправа Зоран Перински, волонтерите заслужуваат посебно место поради нивната лична определба и посветеност да ги споделат своето знаење и искуство стекнати во Соединетите Американски Држави, со граѓаните на нашата држава и несебичо да помагаат.

-Граѓаните на Македонија со децении градат цврсти пријателски односи со американскиот народ. Заедно реализираме многу заеднички проекти, директно финансирани од даночните обврзници на САД, проекти кои имаат големо влијание врз животот на нашите граѓани. Мировниот корпус е присутен во земјата безмалку три децении и има голем придонес во зајакнувањето на пријателството. Престојот и работата на повеќе од деветстотини волонтери во земјата, е повеќе од само импозантен број. Тоа се многу повеќе пријателства, некои и трајни, преку кои се шири мрежата на нашите пријатели и добронамерници, рече Перински во своето денешно обраќање.

Како што посочи, до сега 91 волонтер биле вклучени во 49 општини. Напомена дека благодарение на нивната посветеност, организирани се многу курсеви за изучување на англискиот јазик, реализирани се голем број на хуманитарни акции, кои што се во директна соработка со граѓанскиот сектор.

-Во поново време, забележлива е соработката со секторите за локален и економски развој и секако со центрите за регионален развој. На локално ниво, можностите за осмислување и спроведување на заеднички активности се големи. Нашите луѓе се секогаш со подадена рака за гостите кои што доаѓаат со добра намера и отворено срце. Отворени им се вратите на нови волонтери во општините Росоман, Пехчево и Зрновци, додаде Перински.

Амбасадорката на САД во земјава, Анџела Агелер рече дека волонтерите ќе продолжат вредно да работат и да пленат со својата предаденост како амбасадори на Соединетите Американски Држави во оваа земја.

-Во мојата улога како амбасадорка, како и во текот на мојот претходен ангажман во Македонија, имав можност да ги посведочам ентузијазмот и енергијата на волонтерите на Мировниот корпус на дело. Волонтерите ги следам како работат во училишта, граѓански асоцијации, организации, општини, летни кампови и во нивните заедници, каде што живеат и работат, додаде Агелер.

Според амбасадорката, волонтерите го претставуваат најдоброто од она што Америка му го нуди на светот, а што е уште поважно, тие со себе назад ќе го однесат најдоброто од она што Македонија му го нуди на светот.

-Тие градат мостови меѓу луѓето од нашите две држави кои траат со години и продолжуваат да постојат дури и кога волонтерите ќе завршат со својата служба. Мисијата на Мировен корпус е промоција на мирот и пријателството. Кога претседателот Џен Кенеди ја потпиша легислацијата пред 63 години за основање на Мировен корпус, неговата замисла за примарниот ангажман на волонтерите беше да донесат мир и пријателство и да ги промовираат врските меѓу САД и светот, додаде Агелер.

Како што непомена, оваа цел е исто толку значајна денес, колку што била значајна во минатото.

-Ќе научите толку многу од ова искуство, ќе откриете дека сте посилни отколку што сте биле - барем јас така се почуствував, а вашето влијание ќе остави трага како сега, така и во иднина. Со нетрпение чекам да ве посетам во вашите места, ширум оваа прекрасна земја, посочи амбасадорката.

Живот

Млад месар од Италија почина по дводневна треска, го тестираат семејството и пријателите

Јан Балугани (33) од Кореџо, Италија, починал по дводневна треска, а резултатите од обдукцијата покажале дека младиот човек бил заразен од менингитис Б.

Веднаш по неговата смрт, започнала истрага и тестирање на неговите најблиски членови на семејството, како и пријатели за да се утврди дали некој од нив бил заразен со оваа болест, пишува Месаџеро.

Инаку, Јан работел како месар и бил познат во својот град. Веста за неговата смрт ги изненади сите негови сограѓани, од кои многумина лично го познавале.

Младиот човек два дена пред смртта имал висока температура придружена со треска, но сето тоа изгледало како „обичен“ грип. За жал, приказната имала трагичен епилог само два дена подоцна.

„Со тешко срце и длабока тага мораме да ја споделиме веста со вас. Нѐ погоди како гром од ведро небо. Нашиот пријател, составен дел од нашето семејство, Јан Булагани, неочекувано почина на возраст од од 33. За нас тој беше повеќе од колега - работеше со нас девет години, беше столб на нашата продавница. Неговото заминување остави празнина“, напишаа од месарницата во која работел Јан.

Менингитис Б се пренесува преку капки испуштени од заразени луѓе кои зборуваат, кашлаат или киваат на растојание помало од еден метар. Периодот на инкубација е од 2 до 10 дена, обично 3 до 4 дена.

Иако е невообичаен, менингитисот Б (MenB) е сериозна инфекција. Таа е предизвикана од бактеријата Neisseria meningitidis од групата Б, која може да предизвика инфекција на мембраната што го опкружува мозокот и 'рбетниот мозок. Може да предизвика и септикемија, сериозна инфекција на крвотокот.

Свет

Дојдовме до крајот на она што мислевме дека е безбедна зона за човештвото, тврдат научниците

2024 година е најтоплата во историјата на мерењата.

Но, што е уште полошо, тоа беше и првата година во која просечната глобална температура беше повеќе од 1,5 степени Целзиусови над прединдустрискиот просек, што е прагот поставен со Парискиот договор за климатски промени што не смееме да го надминеме.

Сепак, многу луѓе не разбираат што значи тоа и зошто е важен овој праг, ниту колку е важно што ја поминавме таа граница многу побрзо од очекуваното.

Помина само една година, но истражувачите велат дека тоа е јасен показател дека светот навлегува на опасна територија, пишува Nature.

- Ова е и физичка реалност и симболичен шок. „Дојдовме до крајот на она што мислевме дека е безбедна зона за човештвото“, рече Гејл Вајтман, научник за климатски ризик од Универзитетот во Ексетер.

Податоците за преминување на границата ги објавија истовремено неколку меѓународни организации кои ги следат глобалните температури. Иако сите имаат малку различни бројки, податоците покажуваат дека годината зад нас била најмалку 1,55 степени потопла од просекот за периодот од 1850 до 1900 година. Ова се смета за прединдустриска ера не затоа што сè уште немало индустрија, туку бидејќи сè уште не сме почнале да ослободуваме огромни количини на стакленички гасови во атмосферата.

Климатолозите сè уште испитуваат дали овој огромен скок на температурите во 2023 и 2024 година, кога беа поставени и срушени рекорди, е само случајна или значајна промена што укажува на забрзување на глобалното затоплување.

Научниците велат дека овој праг не е магичен, туку само политичка цел од Парискиот договор. Тоа не значи дека светот е безбеден под него, ниту дека сè ќе се распадне над него.

„Тоа е спектар и секое затоплување е важно“, изјави за Nature Кетрин Хејхо, научник од Американската група за заштита на природата.

- Овој температурен скок над поставената граница треба да биде аларм за политичките лидери. Бидејќи ако овој скок не е случаен, туку планетата забрзано се загрева, можеби ќе треба уште побрзо да ги намалиме емисиите на стакленички гасови - вели Карлос Нобре, климатолог од Универзитетот во Сао Паоло.

Без оглед на одговорот, долгорочниот ризик од топење на мразот и промена на екосистемите се зголемува и ќе се зголеми само ако не престанеме да ја загадуваме планетата.

- Последиците веќе ги чувствуваме. И сè само ќе се влошува“, рече Вајтман.

Свет

Меланија откри каде ќе живее по инаугурацијата на Трамп- не во Белата куќа (ВИДЕО)

Меланија Трамп, сопругата на американскиот претседател Доналд Трамп, го потврди она што долго време се шпекулира.

Во интервју за Фокс њуз, таа рече дека нема трајно да се пресели во Белата куќа за време на вториот мандат на Трамп.

Кога ја прашале каде ќе го поминува поголемиот дел од своето време, таа одговорила: „Ќе бидам во Белата куќа. Кога ќе треба да бидам во Њујорк, ќе бидам во Њујорк. Кога ќе треба да бидам во Палм Бич, ќе бидам во Палм Бич“.

„Мојот приоритет е да бидам мајка, прва дама, сопруга“, додаде таа. Таа се осврна и на нејзиниот син Барон, кој моментално живее во Њујорк каде што оди во колеџ, и рече дека верува дека Барон ќе ја посети Белата куќа. „Секогаш го почитувам „да“ или „не“ на Барон, што сака да прави, каде би сакал да биде“, истакна таа.

Уште во септември минатата година, Меланија рече дека Барон одлучил да живее во Трамп Тауер, семејната резиденција на Менхетен, додека е на колеџ. И покрај тоа, има подготвена соба за него во Белата куќа во која може да остане кога ќе одлучи да го посети семејството.

За потсетување, една од нејзините први официјални одлуки беше да не одржи традиционална и симболична средба со првата дама во заминување Џил Бајден во Белата куќа. Поранешниот претседател Џо Бајден потоа беше домаќин на новоизбраниот претседател Доналд Трамп во Овалната соба.

Откако ја напушти Белата куќа во 2021 година, таа поминуваше време помеѓу Палм Бич и Њујорк додека нејзиниот сопруг се соочи со низа правни проблеми и се подготвуваше за својата трета претседателска кампања. Иако другите членови на семејството Трамп редовно му се придружуваа на поранешниот претседател на суд и во кампањата, Меланија главно се повлече од јавниот живот.