Три документарни и три играни филмови на 10. ММФ Киненова од 28 септември до 5 октомври - Канал 5

Култура

Три документарни и три играни филмови на 10. ММФ Киненова од 28 септември до 5 октомври

Три документарни и три играни филмови ќе бидат прикажани на 10. Меѓународен филмски фестивал на дебитантски филм Киненова 2025. Фестивалот ќе се одржи од 28 септември до 5 октомври.

Три документарни и три играни филмови на 10. ММФ Киненова од 28 септември до 5 октомври

На отворањето на фестивалот во Македонската опера и балет ќе биде прикажан филмот „Изгубениот сон на југословенскиот дрим тим“ на хрватскиот режисер Јуре Павловиќ. Останатите филмови ќе бидат прикажани во Киноверзумот во Домот на културата „Билјана Беличанец“ во Кисела Вода.

Директорот на Киненова, Небојша Јовановиќ денеска на прес-конференција рече дека Фестивалот ќе биде отворен со еден од најзначајните филмови за овие простори во последните три декади, филмот на еден од најталентираните хрватски млади режисери Јуре Павловиќ, „Изгубениот сон на југословенскиот дрим тим“.

Посочи дека се работи за филм за кој немам никаква дилема дека силно ќе ги разбранува чувствата на сите генерации особено на оние кои живееле во една друга задничка држава со повеќе братски народи наречена Југославија.

- Се работи за филм во кој учествуваат сите најголеми екс југословенски кошаркарски легенди како што се Јуре Здовц, Дино Раџа, Тони Кукоч, Владе Дивац, Зоран Ивановиќ, Жарко Паспаљ и останати, а неколку од овие легенди ќе бидат дел од свеченото отворање на македонската премиера на филмот на Киненова во Скопје. Дејството на филмот е за време на натпреварите на Европското кошаркарско првенство кое се одржуваше во Италија, буквално во деновите на почетокот на распадот на Југославија, на големата војна со која живееме особено генерациите кои паметат. Зошто овој за отворање на Киненова, затоа што на еден крајно суптилен уметнички начин од здрава дистанца и крајно непристрасен поглед на нештата ги анализира феномените на колективен успех, колективен неуспех, заедништвото кое постоеше во минатото, а исто така и крајно сирово ги спротивставува другарството наспрема националистичките пориви, рече Јовановиќ.

Тој потенцира дека поминале десет неверојатно турбулентни години, десет изданија низ кои ги преживеале филмските и лични приказни на бројни храбри автори од целиот свет.

- Се соочивме со обиди за цензура, за премолчување, за замолчување, обиди дури и за стопирање на подемот на растежот, на развојот на овој пркос од фестивал. Преку Киненова успеавме да создадеме меѓународна мрежа на истомисленици, слободоумни луѓе, уметници, искрени филмски создавачи со кои заедно фестивалот можеше да расте, нивните идеи, советите, концептите и поддршката да бидат вградени во фестивалот, истакна Јовановиќ.

Фестивалот нагласи тој, годинава наградува тројца големи автори во светски рамки меѓу кои и еден Македонец, а тоа е Владимир Самоиловски.

- Годинашен лауреат е една од најголемите и најмаркантните европски филмски диви Лив Улман која ја добива наградата за животно дело, а третиот добитник кој ја добива наградата за особен придонес во филмската уметност е годинашниот победник на Берлиналето, тоа е Даг Јохагн Хагеруд, додаде Јовановиќ.

Селекторот на главната програма Игор Анѓелов рече дека и годинава на фестивалот ќе има вкупно шест возбудливи филмови од различни кинематографии.

- Покрај „Изгубениот сон на југословенскиот дрим тим“ на Јуре Павловиќ, уште еден наслов кој сакам да го потенцирам е словенечкиот филм „Прасловен“ на Слободан Максимовиќ, кој ќе биде прикажан на затворањето на Фестивалот. Третиот документарен филм е од германско-јапонската копродукција „Јохатсу“ („Со малку воздух“) на авторскиот двоец Андреас Хартман и Рата Мори, „Беше некогаш во Газа“ на Араб Насер и Тарзан Насер, „Паноптикон“ на Ѓорѓи Пикарулизе и „Помеѓу боговите“ од Вук Ршумовиќ, додаде Анѓелов.

Уметничкиот директор Гена Теодосиевска рече дека Даг Јохан Хагеруд е ново име во норвешката и во европската кинематографија, бидејќи со своето познавање на литературата тој како да и приоѓа на филмската уметност со една спонтаност, но и со една бунтовност, такви се и неговите филмови.

- Тој за себе вели вака „Јас сум прво библиотекар, потоа сум романописец - писател, потоа сум сценарист, а на крај сум филмски режисер“, посочи Теодосиевска.

За своите филмови тој е добитник на многу награди. Во 2020 година тој за својот втор долгометражен филм „Чувајте се од децата“ (Beware of the Children) награден е со дури девет Аманда статуетки, додека за филмовите од неговата позната Осло трилогија „Секс“ (Sex), „Љубов“ (Love) и „Соништа“ (Dreams) е награден со највисоката награда на Нордискиот филмски совет и со наградата на Здружението на филмската критика на Норвешка. Последниот „Соништа“ му ја донесе Златна мечка за најдобар филм на годинешното 75.Берлинале и наградата на Fipresci. Даг Јохан Хагеруд е роден 1964 година, тој се школувал за библиотекар, а подоцна ги завршува Академиите за филм, театар и креативно пишување и драматургија во Стокхолм и Осло.

Кинематограферот Владимир Самоиловски, кој е добитник на Специјалната награда за особен придонес во филмската уметност, е член на жири комисијата на Киненова.

- Среќни сме што Владимир Самоиловски е наш добитник на специјалната награда „Златна грива“ за исклучителчен придонес во филмската уметност на 10 јубилејно издание на МФФ Киненова. Со него сме горди на македонскиот филм. Неговото професионално портфолио содржи близу 100-тина долгометражни играни, документарни, кратки играни филмови ТВ драми, тв серии, емисии. Потекнува од фамилија на филмски работници, така што веќе доста млад навлегува во тајните на филмската магија и на технологијата на ТВ и филмската камера, мотивиран од својот татко, ветеранот на македонската и југословенската филмска кинематографија, Мишо Самоиловски во чии филмови соработувал како снимател оператор. Роден е во Скопје, во 1953 година. Неговата кариера како филмски работник и професионален соработник на филм ја започнува во 1976 година кога се вработува во продуцентската куќа „Вардар филм“, посочи Теодосиевска.

Таа се осврна и на годинашниот лауреат норвешката актерка Лив Улман, која, како што рече, е една од најзначајните актерки во минатиот, 20 век, векот на филмската уметност.

- За неа е доволно да се каже дека е „муза“ на големиот Ингмар Бергман, играјќи во десет од неговите, според многумина, најдобри филмови. Но Лив Улман, се разбира, е многу повеќе од тоа. Љубовта кон уметноста безброј пати ја докажала и на театарската сцена, но и на режисерското столче, на кое милува да седи во последните три декади од својата богата кариера. Таа се’ уште е витална и полна со енергија, и со радост и’ ја доделуваме највисоката награда за животно дело, заслужено вбројувајќи ја меѓу великаните кои во изминатите години ја добија нашата фестивалска награда. Во 2022 година, Лив Улман ја доби почесната награда „Оскар“ за „храброста и емоционалната транспарентност кои на публиката ѝ подарија длабоко трогателни човечки портрети на екранот“. Лив Улман е родена на 16 декември 1939 година во Токио, Јапонија, додаде Теодосиевска.

Тагови: КИНЕНОВА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

По 12 години штедење, ја отвориле касичката и останале без зборови (ВИДЕО)

Едно семејство по 12 години одлучи да отвори голема касичка-прасе што ја полнеле уште кога децата им биле мали. 

По 12 години штедење, ја отвориле касичката и останале без зборови (ВИДЕО)

Не ги трошеле парите што ги наоѓале на нешто секој ден, туку решиле да ја користат за заедничко патување.

Сара, која споделува семејни патувања и авантури на социјалните мрежи, објави видео од моментот кога конечно ја отвориле својата домашна касичка-прасе. Проект што започнал како детска навика се претворил во повеќегодишна семејна традиција.

Касичка-прасе со посебна приказна

Нивната касичка, која ја нарекле Роузи, не е обичен сад за собирање ситни пари. Направена е во 1996 година, кога сопругот на Сара и неговиот татко ја направиле од стар резервоар за пропан и ја претвориле во форма на прасе.

Сопругот на Сара ја користел касичката кога растел, а подоцна им ја дал на своите деца за да ги охрабри да штедат и да им ја покаже вредноста на парите.

Роузи е дизајнирана да се празни без да се скрши. Едната нога од касичката е шуплива, а на нејзиното дно има отвор што е пробиен за да се испуштаат парите. После тоа, касичката може да продолжи да му служи на семејството.

По 12 години, пристигна изненадување

Видеото го прикажува семејството како користи дупчалка за да го отвори дното на касичката, по што паѓаат бројни монети и банкноти. „Моите деца пораснаа со оваа касичка и ја наполнија со кусур. По 12 години, конечно ја отворивме“, напиша Сара со видеото.

Парите што ги пронајдоа беа повеќе отколку што очекуваа, а дел од сумата беше скриена како изненадување. Со текот на годините, сопругот на Сара фрли неколку поголеми банкноти за да ги забавува децата кога ќе дојде време да се отвори.

„Тој, исто така, фрли неколку поголеми банкноти како изненадување за децата кога конечно ја отворивме“, откри Сара.

Семејството нагласи дека не станува збор за голема животна заштеда, туку за пари што биле случајно собрани со години. „Ова беше само кусур што го внесувавме со години, со некои банкноти кон крајот“, објаснија тие.

Откако ги сортираа и пребројаа парите заедно, при што проверија и дали има скриени ретки примероци меѓу монетите, пресметаа дека во касичката има 2329,27 долари, односно околу 1985 евра.

Ги потрошија парите на семејно патување

Семејството одлучи дека нема да ги остават парите од Роузи настрана, туку ќе ги претворат во заедничко сеќавање. „Ги искористивме заштедите од касичката за патување“, напиша Сара.

Таа додаде дека целото семејство со нетрпение го очекува она што го опиша како „голем семеен одмор“ и искуство што ќе го паметат долго откако касичката конечно се испразни.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Трамп го повика Путин на Флорида

Американскиот државен секретар Марко Рубио потврди дека администрацијата на американскиот претседател Доналд Трамп го поканила рускиот претседател Владимир Путин на самитот на Г20 што ќе се одржи во Мајами во декември.

Трамп го повика Путин на Флорида

Рубио ги даде овие забелешки по средбата со рускиот министер за надворешни работи Сергеј Лавров на маргините на Генералното собрание на ОН во Њујорк.

„За да се решат проблемите, мора да се сретнете со луѓе со кои не се согласувате или имате одредени проблеми. Затоа го поканивме претседателот Путин на Г20“, им рече Рубио на новинарите.

Тој додаде дека Вашингтон го гледа самитот како можност Путин да разговара не само со Трамп, туку и со други светски лидери и дека САД се надеваат дека рускиот претседател ќе ја прифати поканата.

Рубио и Лавров разговараа за војната во Украина

Средбата меѓу Рубио и Лавров се случи во време кога Вашингтон се обидува да ги обнови дипломатските разговори за војната во Украина.

Според Ројтерс, Рубио по средбата изјавил дека и Русија и Украина изразиле интерес за ограничен прекин на огнот што би вклучувал напади врз енергетската инфраструктура и безбедноста на извозот на жито и пловидбата во Црното Море.

„Мислам дека двете страни изразија интерес за некаков вид ограничен прекин на огнот што би вклучувал жито и енергија. Очигледно, ниту тоа нема да биде лесно“, рече Рубио.

Русија сè уште јавно не потврди дека е подготвена да се согласи на таков договор. Ројтерс објави дека по средбата на Рубио со Лавров, не беше јасно дали неговите зборови претставуваат вистинска промена во руската позиција.

Зеленски подготвен да се сретне со Путин

Украинскиот претседател Володимир Зеленски претходно изјави дека е подготвен да се сретне со Путин, вклучително и можноста за трилатерален состанок со Трамп.

Зеленски, исто така, овој месец изјави дека би бил подготвен да дојде на самитот на Г20 во Мајами доколку Путин биде таму, нагласувајќи дека постигнувањето конкретни резултати е поважно од размената на изјави.

Кремљ досега одбиваше таков состанок на неутрален терен и инсистираше дека ако Зеленски сака да разговара со Путин, треба да дојде во Москва.

Путин сè уште не потврди дали лично ќе учествува на самитот на Г20 во Мајами.

„Вашингтон пост“ наведува дека неговото доаѓање би отворило можност за нова средба меѓу Путин и Трамп. Рубио рече дека ако Путин дојде, самитот „сигурно би бил можност“ двајцата претседатели да разговараат.

Кремљ: Сè уште нема услови за пошироки мировни преговори

И покрај новите дипломатски контакти, Кремљ веднаш пред средбата меѓу Рубио и Лавров изјави дека сè уште не ги гледа условите за премин кон пошироки мировни преговори.

„Засега, нема предуслови за премин кон мировниот пат, иако ние, како руска страна, остануваме отворени за мировни разговори“, рече портпаролот на Кремљ, Дмитриј Песков.

Во исто време, Украина соопшти дека е подготвена да ги прекине нападите поврзани со навигацијата на Црното Море и енергетската инфраструктура доколку Русија се согласи на реципрочни мерки.

Зеленски рече дека Киев е подготвен да обезбеди безбедна навигација и снабдување со храна низ Црното Море доколку Москва преземе „вистински чекори кон деескалација“.

„Мора да почнеме од некаде“, рече тој.

Тагови: Владимир Путин Доналд Трамп

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Осуден е холивудскиот предатор- Харви Вајнштајн доби 15 години затвор

Харви Вајнштајн, поранешниот моќен филмски продуцент, е осуден на 15 години затвор во среда за кривично дело сексуален напад, во уште еден пресврт во случајот што го предизвика движењето #MeToo.

Осуден е холивудскиот предатор- Харви Вајнштајн доби 15 години затвор

Вајнштајн беше осуден за сексуален напад врз поранешната телевизиска продуцентка Миријам Хејли. Неговата пресуда следеше по повеќе од шест години правна драма откако неговата првична пресуда во 2020 година беше поништена. Поротата го прогласи повторно за виновен на повторно судење минатата година, објави Асошиејтед Прес.

Некогаш еден од најмоќните луѓе во индустријата за забава, Вајнштајн беше продуцент добитник на Оскар чии филмови вклучуваа „Вљубениот Шекспир“, „Пенивајз“ ​​и „Чоколада“. Неговиот пад започна во 2017 година, кога бројни жени излегоа со обвинувања за сексуално вознемирување и напад, помагајќи да се поттикне глобалното движење #MeToo.

Во 2024 година, Врховниот суд на државата Њујорк ја поништи неговата првична пресуда и нареди ново судење, велејќи дека Вајнштајн бил пристрасен од сведочењето на други жени чии случаи не беа дел од обвинението.

Вајнштајн, 74, се соочуваше со затворска казна до 25 години за сексуален напад врз Хејли во неговиот стан на Менхетен во 2006 година. Тој веќе помина повеќе од шест години зад решетки, бидејќи неговиот случај се повторува одново и одново.

Хејли денеска зборуваше на суд, кратко пред изрекувањето на пресудата.

„Сексуалниот напад од Харви Вајнштајн имаше разорно влијание врз мојот живот и чувство на сигурност кое можеби никогаш нема да исчезне. Мојата одлука да проговорам ќе ме остави да гледам преку рамо со години. За мене, тоа е доживотна казна“, рече таа.

Зошто Вајнштајн беше повторно суден

Вајнштајн првично беше осуден на 23 години затвор откако поротата го прогласи за виновен за напад врз Хејли и силување на актерката Џесика Ман во 2013 година.

Сепак, Врховниот суд на државата Њујорк ги поништи тие пресуди во 2024 година и нареди ново судење.

На повторното судење минатата година, Вајнштајн повторно беше прогласен за виновен за кривично дело од прв степен за сексуално злосторство врз Хејли, позната и како Мими Хејли.

Поротата, исто така, го ослободи од обвинението дека ја принудил друга жена, Каја Сокол, на орален секс додека сè уште одлучуваше за обвинението за силување против Џесика Ман.

Откако повторното судење за силување заврши без едногласна пресуда на поротата во мај, обвинителите од Менхетен ги отфрлија обвиненијата откако Ман изјави дека таа повеќе не може да сведочи.

Ова го отвори патот за казна за холивудскиот предатор.

Обвинителите побараа 20 години затвор

Обвинителите во Менхетен побараа 20 години затвор, што би значело дека Вајнштајн би можел да остане зад решетки барем до доцните 80-ти години.

Неговиот адвокат, Џејкоб Каплан, побара само уште три години, тврдејќи дека подолгата казна би ја зголемила веројатноста дека Вајнштајн ќе умре во затвор.

Вајнштајн има сериозни здравствени проблеми и, според неговиот адвокат, бил хоспитализиран шест пати од 2025 година. Тој страда од рак на крвта, срцева слабост и проблеми со бубрезите, и е во инвалидска количка неколку години.

Тој негира дека силувал или сексуално нападнал некого.

„Ќе бидам прогласен за невин. Ви ветувам тоа“, рече Вајнштајн во интервју за „Холивуд репортер“ од затвор во март.

Тој сè уште може да се жали на новата казна.

Тој се соочува и со ново судење во Калифорнија.

Вајнштајн се соочува и со повторно сослушување за изрекување казна во посебен случај за силување во Лос Анџелес.

Калифорнискиот апелациски суд ја потврди неговата пресуда од 2022 година, но ја поништи неговата првична казна од 16 години бидејќи судијата ги зеде предвид неговите пресуди од Њујорк, кои подоцна беа поништени, како отежнувачки фактор.

Вајнштајн моментално е во медицинското одделение за притвореници во болницата Белвју на Менхетен.

Хејли го опишува нападот

Хејли, 49, поранешна продуцентка во забавната индустрија, која сега работи во рекламирањето, е родена во Финска и израсната во Шведска.

Таа го запознала Вајнштајн преку заеднички познаник и кратко работела како асистент за продукција во реалното шоу „Проект рунда“, кое тој го продуцирал.

Таа рече дека ја прифатила поканата за неговиот стан на Менхетен затоа што, како што рече, се чувствувала засрамено да одбие, бидејќи следниот ден требало да патува за Лос Анџелес на филмска премиера, на трошок на неговата компанија.

Хејли сведочеше дека по краткиот разговор на каучот, Вајнштајн одеднаш се обидел да ја бакне. Таа станала и одбила, но таа рекла дека тој ја зграпчил, ја турнал во спалната соба и сексуално ја нападнал, и покрај нејзините молби да престане.

Таа рекла дека по тој напад, или за време на подоцнежна средба за која таа рекла дека вклучувала несакан, но не и принуден сексуален однос, Вајнштајн ја прашал: „Не мислиш ли дека сега сме многу поблиски?“

Хејли рекла дека по втората средба му рекла: „Знаеш дека не можеш да продолжиш да го правиш ова“.

Тагови: предатор Харви Вајнштајн

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер