Иако урамнотежената исхрана е неопходна за здрава младешка кожа, не е секогаш лесно секојдневно да се внесуваат доволно омега-3 масни киселини, витамини и минерали. Понекогаш е предизвик дури и да се сетите да појадувате здраво и да пиете доволно вода.

Сепак, пред земањето какви било додатоци, важно е да се консултирате со лекар. Но, ако веќе сте добиле дозвола, дерматологот д-р Џошиа Батиа Сарин препорачува три клучни додатоци кои можат да го подобрат изгледот на кожата и да ги намалат брчките.

1. Омега-3 масни киселини

Според оваа жена дерматолог, омега-3 масните киселини, кои се наоѓаат во додатоците како рибиното масло, „го намалуваат воспалението и ја зајакнуваат заштитната бариера на кожата“, истакнува таа во видео на социјалните мрежи. Здравата кожна бариера штити од надворешни стресови и ѝ помага на кожата да ја задржи влажноста, што придонесува за помазен и поздрав изглед.

Покрај преку додатоците во исхраната, омега-3 масните киселини можете да ги внесете и преку самата храна како што се: масната риба (лосос, сардина), чиа семето, лененото семе и оревите.

2. Цинк

Д-р Сарин го опишува цинкот како „витален антиоксиданс“ кој помага во борбата против инфекциите и може да ја намали појавата на акни преку регулирање на лачењето на себумот, спречувајќи го затнување на порите.

Освен тоа, цинкот е од суштинско значење за синтезата на колагенот и има противвоспалителни својства и помага во лекувањето на егзема и псоријаза.

3. Ресвератрол и витамин Ц

Ресвератролот е моќен антиоксиданс кој ја штити кожата од штетното ултравиолетово зрачење, го стимулира производството на колаген и го намалува воспалението. Може да помогне и во регенерација на клетките на кожата, правејќи ја кожата поздрава и поотпорна, вели д-р Сарин.

Иако ресвератролот е присутен во црвеното вино, ќе треба да се консумира во големи количини за да се почувствуваат неговите ефекти, така што додатоците се побезбедна опција.

Друг клучен додаток е витаминот Ц, кој е нешто полесно да се внесе преку исхраната, на пример преку јадење цитрусно овошје и лиснат зеленчук. Меѓутоа, ако се сомневаме дека не внесуваме доволно витамин Ц, вреди да се консултираме со нашиот лекар околу суплементите.

„Витаминот Ц не е важен само за имунолошкиот систем, туку и за синтезата на колагенот - и колку повеќе здрав колаген произведува телото, толку кожата ќе изгледа поцврста и посвежа“, заклучува д-р Сарин.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.