Култура

Трет музејски семинар во рамки на одбележувањето 10 години од Форумот на словенските култури

Во рамки на одбележувањето десет години од Форумот на словенските култури, на 30 октомври во Скопје ќе се одржи третиот музејски семинар „Театарската музеологија во 21 век“ на кој ќе учествуваат театролози, музеолози и културолози од земјите што членуваат во Форумот, претставници на националните музеи во Република Македонија и членови на македонскиот национален комитет на ИКОМ.

Како што соопшти Министерството за култура, на 31 октомври ќе се одржи состанок на Бордот на ФСК како и прво свечено доделување на нововостановената награда на Форумот „Жива“ - за најдобар музеј и за најдобар проект за заштита на културното наследство. Планиран е и концерт на музички ансамбли кои ќе го презентираат нематеријалното културно наследство на земјите-членки на Форумот, како и изложба на досега објавените книги на државите-членки во рамки на едицијата „100 словенски романи“.

Македонија е една од земјите-основачи на меѓународната фондација Форум на словенските култури чија цел е зачувување на културните традиции на словенските народи и нивното промовирање како трајни и универзални вредности во глобални рамки.

Државава е активно вклучена во годинашното одбележување на десетгодишнината од востановувањето на Форумот, со финансиска поддршка на Министерството за култура.

Одбележувањето на јубилејот почна во април кога Архивот на Македонија беше домаќин на заедничката изложба „Главните градови на словенските земји преку архивски материјал“, која минатата година со голем успех беше претставена во седиштето на УНЕСКО. Јубилејното чествување продолжи со заедничката изложба на земјите-членки „Словенските карневали“, која беше претставена во седиштето на УНЕСКО во Париз, на почетокот на јуни, во рамките на традиционалното одбележување на Денот на словенската култура. Носител на македонскиот дел на оваа заедничка изложба беше Заводот и музеј од Битола.

- Почнувајќи од 2004 година, Македонија даде особен придонес во решавањето на заедничките предизвици на Форумот на словенските култури, а довербата и поддршката што ги има Република Македонија беа потврдени минатата година на министерскиот состанок во Република Словенија кога министерката за култура Елизабета Канческа-Милевска беше назначена за претседател на Управниот одбор на оваа меѓународна фондација, информира Министерството за култура./МИА.

Свет

Белата куќа со осуда за „малиот процент“ студенти за предизвикување немири на универзитетите

Белата куќа осуди „мал процент студенти, поттикнувачи на немири“ по ноќните судири и апсења во одредени американски кампуси кои протестираат против војната во Газа.

„Студентите имаат право да посетуваат настава и да се чувствуваат безбедно“, рече портпаролката на Белата куќа Карин Жан-Пјер на прес-конференција, додавајќи: „Ќе продолжиме да нагласуваме дека антисемитизмот мора да биде осуден“.

Според американски медиуми, околу 1.000 луѓе се приведени во судирите на универзитетите ширум САД, и според податоци обезбедени од полицијата и властите во Њујорк, околу 300 луѓе биле приведени на Универзитетот Колумбија, центарот на протестите поради војната во Газа со обвиненија за прекршок, кражба и помали кривични дела.

На Универзитетот во Калифорнија во Лос Анџелес, попознат како UCLA, не се одржуваа часови. Таму во текот на ноќта избувнал конфликт кога, како што пренесуваат американски медиуми, група произраелски демонстранти се обиделе да ги урнат барикадите зад кои во шатори се наоѓале пропалестинските демонстранти.

Неколку часа пред да избијат немирите во UCLA, полицијата упадна во зградата на Универзитетот Колумбија во Њујорк, окупирана од антивоени демонстранти, завршувајќи го протестот кој ја парализираше институцијата.

Протести избија во околу 30 универзитети во САД, со барање САД да престане да го поддржува Израел и со компаниите кои ја поддржуваат војната во Газа. Тоа е убедливо најголемиот студентски протест во САД во 21-от век, а полициската реакција што следеше потсетува на сцени од 1960-тите кога имаше огромно студентско протестно движење против Виетнамската војна, јавија американските медиуми. /МИА

Регион

Во Србија продолжува парламентарна расправа, се чека гласање за новата влада

Српскиот парламент претпладнево ќе ја продолжи првата вонредна седница на која единствена точка на дневен ред е избор на Влада и давање заклетва на претседателот и членовите.

Се очекува дискусијата да продолжи, по што пратениците треба да гласаат, јавија српските медиуми.

Продолжението на првата вонредна седница на Националното собрание во актуелното свикување е закажано за девет часот. На седницата, која почна вчера, излагање поднесе претставникот за состав на новата Влада Милош Вучевиќ.

Во тричасовното обраќање пред пратениците, меѓу другото, тој истакна дека владата што ја предлага ќе биде влада на континуитет во најголема мера, како и дека полноправното членство во ЕУ останува стратешки приоритет на Србија. Тој наведе и дека најголемиот предизвик на новиот кабинет ќе биде одбраната на суверенитетот, ќе се предложи задолжителен воен рок од четири месеци. Вучевиќ порача дека членовите на Владата мора да бидат тим, дека секогаш мора да бидат подготвени да ги штитат националните и виталните интереси на Србија, а неговото прво и единствено барање е несомнената лојалност кон татковината. На Собранието му предложи 31 член на кабинетот, меѓу кои има осум нови личности. /МИА

Свет

Земјотрес од четири степени во поширокото подрачје на Лос Анџелес

Земјотрес со јачина од 4,1 степени според Рихтер синоќа го погоди поширокото подрачје на Лос Анџелес, соопшти Сеизмолошкиот институт на САД.

Земјотресот се случил во областа Корона, во близина на Лос Анџелес, објави Фокс.

Земјотресот бил почувствуван во пошироката област, западно до Лос Анџелес, Лонг Бич, округот Оринџ и Санта Кларита./МИА