Трамп вели дека наскоро би можел да се сретне со Путин во врска со Украина - Канал 5

Свет

Трамп вели дека наскоро би можел да се сретне со Путин во врска со Украина

 Американскиот претседател Доналд Трамп изјави дека во најскоро време би можел да се сретне со рускиот претседател Владимир Путин за да разговара за Украина.  

Трамп вели дека наскоро би можел да се сретне со Путин во врска со Украина

Тој додаде дека работи напорно за да постигне мир во Украина и оти верува дека и Путин и украинскиот претседател Володимир Зеленски сакаат борбите да престанат. На новинарско прашање за можниот датум на средба со Путин, можеби во Саудиска Арабија, Трамп одговори: „Нема конкретен датум, но тоа може да се случи во најскоро време“.

Трамп, исто така, откри дека Стивен Виткоф, кој е и еден од неговите главни советници за меѓународни прашања, имал тричасовна средба со Путин, но не појасни на кој датум се случило тоа.

На прашањето дали Путин има намера да ја преземе цела Украина, Трамп одговори: „Не“. Тоа е прашањето што му го поставив бидејќи ако така постапи, тоа ќе ни создаде голем проблем“, рече Трамп.

Изјавата на Трамп доаѓа додека САД и Русија се подготвуваат за првични разговори во Саудиска Арабија во наредните денови.

Во исто време, руското издание Комерсант објави дека разговорите за Украина ќе започнат во вторник во саудискиот главен град Ријад.

Американски официјален претставник изјави дека американскиот државен секретар Марко Рубио ќе ја предводи делегацијата што ќе ја посети Саудиска Арабија на директни разговори со руски официјални претставници во наредните денови за да се бара крај на руската инвазија врз Украина.

Во разговорите во Ријад се очекува да бидат вклучени американскиот советник за национална безбедност Мајкл Волц, како и специјалниот пратеник на Трамп за Блискиот Исток, Стивен Виткоф, изјави американскиот претставник.

Рубио во врска со можните преговори за Украина изјави дека ништо не е финализирано. Во интервју за Си-Би-Ес, тој рече дека тие преговори ќе бидат можност да се започне посеопфатен разговор кој ќе ја вклучи Украина и ќе го реши прашањето за завршување на војната.

Зеленски синоќа пристигна во посета на Обединетите Арапски Емирати (ОАЕ) каде меѓу целите на неговата посета е да разговара за „голема хуманитарна програма“. „Нашите приоритети вклучуваат враќање на повеќе воени затвореници дома, како и инвестиции и економско партнерство“, објави на социјални мрежи украинскиот претседател.

Претходно оваа недела, Зеленски рече дека ќе ги посети Саудиска Арабија, ОАЕ и Турција во наредните денови. Сепак, тој посочи дека не планира да се сретне со руски и американски претставници, кои треба да се сретнат во Саудиска Арабија за да разговараат за завршување на војната во Украина.

Москва и Вашингтон подготвуваат самит меѓу рускиот претседател Владимир Путин и неговиот американски колега Доналд Трамп, што предизвика загриженост во Киев и Европа, кои не сакаат да бидат исклучени од мировните преговори, јавија француски медиуми.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Наука

Што гледаат луѓето пред смртта- научниците споредиле искуства на 50 лица

Од сите искуства поврзани со искуства блиску до смртта (NDEs), ниту едно не е толку познато како светлината на крајот од тунелот.

Што гледаат луѓето пред смртта- научниците споредиле искуства на 50 лица

Луѓето кои биле на работ на смртта, па дури и оние кои биле мртви неколку моменти, понекогаш опишуваат движење низ темнина, како тунел, кон портал на светлина, премин во друг свет, објавува ScienceAlert.

Сликата станала толку вкоренета во популарната култура што станала моќен симбол на крајот на животот.

Сепак, не сите преживеани блиску до смртта виделе тунел. Некои опишале огромен, осветлен простор, закривен хоризонт или чувство дека се опкружени со светлина, според студија на 50 преживеани блиску до смртта.

Истражувачот за неврофеноменологија Франс Лернер од Универзитетот во Хаифа во Израел и нејзините колеги сакале визуелно да пристапат кон прашањето, верувајќи дека тоа ќе открие обрасци што зборовите не можат, објави веб-страницата.

На учесниците им било кажано да нацртаат облик на простор што го паметат дека го доживеале и да опишат каде се доживуваат себеси во него, како се движат низ него и какви бои се сеќаваат. Потоа научниците составиле база на податоци од овие реконструкции и ги споредиле, барајќи сличности во геометријата на просторите. Откриле дека конусните простори, кои го вклучувале познатиот тунел, се повторувале често, како и широките, закривени простори како лакови.

Учесниците исто така често цртале простори кои изгледале како целосно да го опкружуваат набљудувачот, како што е внатрешноста на сфера или овал.

Од 28-те конусни простори што ги реконструирале учесниците, 22 биле црни, бели или сиви, или во светлина без препознатлива нијанса. Од друга страна, 27 од 31 широки, закривени простори биле перцепирани во боја.

Според Лернер и нејзините колеги, истражувањата за невронауката и перцепцијата веќе документирале некои слични визуелни односи.

Еден пример е тунелскиот вид, кој може да се појави кога е нарушено снабдувањето со кислород до мрежницата или мозокот, стеснувајќи го видното поле. Според неа, доминацијата на црната, белата и сивата боја во простори слични на тунел има научно објаснување поврзано со човечкиот вид.

Во услови на слаба осветленост, нашите очи стануваат помалку чувствителни на бои бидејќи клетките чувствителни на светлина одговорни за гледање во темнина преземаат контрола.

Иако истражувачите претходно идентификуваа повторливи карактеристики кај луѓе кои доживеале искуства близу до смртта, како што се тунели и светла, малку внимание е посветено на просторната структура на овие искуства или на тоа како луѓето се перцепираат себеси додека се движат низ нив.

Студијата е објавена во списанието „Frontiers in Psychology“.

Тагови: научниците смртта

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Судбина

Карикатурист е осуден на четири години затвор- нацртал карикатура на кралот на Мароко

Мароканскиот карикатурист Јасер Мунбир е осуден на четири години затвор за „навреда на кралот“ по објавувањето на карикатура од Мухамед VI, објави денес неговиот адвокат.

Карикатурист е осуден на четири години затвор- нацртал карикатура на кралот на Мароко

Судот во Казабланка, исто така, му наложи на карикатуристот да плати казна од 40.000 дирхами, или 3.600 евра.

Неговиот адвокат, Фарук Мехдауи, објави дека ќе поднесе жалба на пресудата.

Член 179 од мароканскиот кривичен законик забранува „клевета, навреда или нарушување на приватноста на кралот“, а таквите дела се казнуваат со затвор од шест месеци до две години.

Во случајот на 22-годишниот Јасер Мунбир, казната е двојно зголемена бидејќи цртежот е објавен онлајн, објави „Ле Фигаро“.

Мунбир беше уапсен во јуни откако цртал и објавил карикатура од кралот на Мароко на својот Инстаграм профил.

Мароканското здружение за човекови права (AMDH) побара негово ослободување.

Активистите за човекови права во Мароко побараа укинување на законите за кои велат дека ја ограничуваат слободата на изразување, како и помилување на осудените за објави на социјалните мрежи, пишува Фигаро.

Тагови: карикатура Мароко

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Европа

Телефоните на германските министри и пратеници на удар на шпионски софтвер

Apple предупреди дека iPhone-ите на членовите на Бундестагот и членовите на федералната влада можеби биле цел на шпионски софтвер. 

Телефоните на германските министри и пратеници на удар на шпионски софтвер

Германскиот министер за дигитална администрација, Карстен Вилдбергер, изјави дека Федералната канцеларија за информациска безбедност (BSI) им советувала на засегнатите да претпостават дека нивните уреди се компромитирани за секој случај, бидејќи предупредувањето не укажувало дали нападот бил успешен.

Според BSI, овој вид шпионски софтвер може да им даде на напаѓачите пристап до пораки, вклучително и оние испратени преку шифрирани апликации, како и повици, контакти, календари и податоци за локација. Исто така, може да го вклучи микрофонот и камерата на телефоните.

Вилдбергер изјави за ARD дека „добивме известување од Apple дека одредени уреди можеби биле компромитирани од таканаречен шпионски софтвер“, објави Euronews.

Предупредувањата до засегнатите телефони почнаа да пристигнуваат на 29 октомври, според BSI, и тие наведоа дека Apple го открил нападот користејќи „шпионски софтвер“. Министерот рече дека BSI „реагирала супер брзо“ и ги известила засегнатите, со упатства за заштита. Вилдбергер не кажа колку политичари биле предупредени или кои биле цел. Ниту „Епл“, ниту германските власти не кажаа кој би можел да стои зад нападот.

Тагови: телефоните софтвер

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер