Во графикони објавени на социјалните мрежи, Белата куќа ги прикажува ефективните царински стапки за кои тврдат дека другите земји ги наметнуваат на американските производи, вклучувајќи ги и оние преку „манипулација со валутите и трговски бариери“.

Во соседна колона се прикажани новите царински стапки што САД ќе ги наметнат на секоја земја или територија, вклучувајќи ја и Европската Унија. Реципрочните стапки не се нужно единствените царини на САД со кои ќе се соочат овие земји.

Од информациите на графиконот се гледа, дека според пресметките на администрацијата на Трамп, Македонија има 65 отсто царини за САД, а сега се воведуваат царини од 33 отсто за македонскиот извоз во САД.

Трамп го покажа графиконот кога ја претстави својата царинска политика од градината со рози на Белата куќа. Покрај сеопфатните царини по земји објавени денеска, Трамп воведе и основна царина од 10 отсто што ефективно значи царина за секоја земја што не е меѓу 180-те посочени.

- Сите производи увезени во царинската територија на Соединетите Држави, во согласност со законот, ќе бидат подложни на дополнителна ад валорем стапка од 10 отсто“, освен ако не е поинаку наведено, се вели во извршната наредба потпишана денеска.

Трамп, исто така, го задржува правото да ја зголеми оваа основна стапка „доколку производниот капацитет и производството на САД продолжат да се влошуваат“.

Фармацевтските производи се меѓу стоките што нема да бидат подложни на реципрочните царини објавени денеска, според информативниот билтен на Белата куќа. Но, Трамп не ги отфрли своите планови да воведе тарифи специфични за фармацевтските производи наскоро.

Други стоки што не се подложни на реципрочните царини вклучуваат бакар, полупроводници, дрвна граѓа, злато во шипки, енергија и одредени минерали што не се достапни во САД, се вели во билтенот. Тука спаѓаат и производите што веќе се подложни на неодамна објавените царини на Трамп, вклучувајќи челик, алуминиум, автомобили и автоделови.

Трамп . исто така, наметнува вкупна царинска стапка од 54 отсто на увозот од Кина, со важност од 9 април, изјави официјален претставник на Белата куќа.

Кинескиот увоз веќе беше подложен на царини од 20 отсто. Уште 34 отсто во реципрочни царини се додаваат на тоа, изјави официјалниот претставник.

Администрацијата на Трамп вчера објави дека Канада и Мексико засега ќе бидат ослободени од основната царинска стапка од 10 проценти, како и од реципрочните давачки за одредени земји. Царината од 10 отсто ќе стапи во сила само кога оригиналните царини од 25 отсто што Трамп ги наметна на канадскиот и мексиканскиот увоз ќе бидат укинати или суспендирани. Царината од 25% беше заснована на обвинувања дека соседните земји не успеваат да го спречат протокот на дрога и криминал во САД.

Инаку, Трамп го заврши 50-минутниот говор со потпишување на извршна наредба со која се наметнува неговиот сеопфатен план за реципрочни царини.

На почетокот на неговиот говор тој најави дека доаѓа „златно доба за Америка“.

- Ова ќе биде ден за кој се надевам дека во годините што доаѓаат ќе се осврнете назад и ќе кажете: ‘Знаете, тој беше во право. Навистина се покажа како еден од најважните денови во историјата на нашата земја’, рече Трамп.

- Реципрочни. Тоа значи дека тоа што тие ни го прават тоа нам, ќе им го правиме истото и ним. Многу едноставно. Не може да биде поедноставно од тоа, рече Трамп на почетокот на обраќањето за новите царини, нарекувајќи го „декларација за економска независност на Америка“.

Трамп изјави дека „работните места и фабриките ќе се вратат со полна пареа“ и дека реципрочните царини ќе воведат „златно доба“ за земјата.

- Ќе ја зајакнеме нашата домашна индустриска база, ќе ги отвориме странските пазари и ќе ги урнеме странските трговски бариери и на крајот повеќе производство дома ќе значи посилна конкуренција и пониски цени за потрошувачите, рече тој.

Трамп ветува она што го нарекува „Златното доба на Америка“, за кое верува дека ќе донесе повеќе работни места и домашно производство, воведувајќи ново доба на домашно благосостојба.

Сепак, подоцна во говорот појасни дека рецепрочните царини не се баш реципрочни. - Ќе им наплатиме приближно половина од она што тие ни го наплатуваат и ни го наплатувале нам, рече Трамп за неговиот план за реципрочни царини

Значи, царините нема да бидат целосно реципрочни, рече американскиот претседател. Но, таа преполовена бројка вклучува „комбинираната стапка на сите нивни царини, немонетарни бариери и други форми на измама“, појасни Трамп.

За Европската Унија Трамп воведе царини од 20 отсто, тврдејќи дека ЕУ наметнала царини од 39 отсто. Што се однесува на земјите од регионот, воведени се царини од 10 проценти за Турција, реципрочно на турските 10 отсто, за Србија се воведуваат 37 проценти на пресметаните српски царини од 74 отсто, за Косово 10 проценти (реципрочни 10 отсто), Црна Гора 10 отсто (реципрочни 10 отсто), БиХ 35 отсто (проценти 70 отсто царини за САД), Албанија 10 отсто (реципрочни 10).

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.