Комисијата задолжена за организирање изборни дебати во Соединетите држави вчера објави дека воведува дополнителни мерки за „одржување ред“ во следните две конфронтации на кандидатите за Белата куќа.
„Зошто би дозволил комисијата за дебатирање да ги менува правилата за втората и третата дебата кога лесно ја освоив првата?“, праша американскиот претседател на Твитер.
Трамп упорно истакнува - без конкретни докази - дека тој излегол како победник од дебатата со демократскиот противник.
„Јас убедливо ја добив дебатата, тоа се покажува преку анкетите и така натаму“, рече тој на социјалната мрежа каде што најчесто се појавува, без да објасни што значи „и така натаму“.
И покрај многуте обиди, Крис Валас, искусен водител на Фокс Њуз, не можеше да спречи дебатата меѓу двајцата 70-годишни кандидати да се претвори во какафонија.
„Жал ми е што вечерта заврши вака“, призна тој во интервју за Њујорк Тајмс. „Никогаш не мислев дека сè ќе тргне наопаку.
Другите две претседателски дебати треба да се одржат на 15 и 22 октомври во Мајами, Флорида и Нешвил, Тенеси.
Републиканскиот потпретседател Мајк Пенс, во меѓувреме, на 7 октомври во Солт Лејк Сити, Јута, ќе се соочи со кандидатот за потпретседател на Џо Бајден, сенаторката Камала Харис.